«Prakocim Mašu Vasilevič»: papularnyja jutub-błohiery sabralisia razam, kab pravieści pikiet FOTY
Dadziena: jutub-błohiery Marat Minski (121 tysiača padpisantaŭ), Arciom Šaporaŭ (40 tysiač), Uładzimir Cyhanovič (33 tysiačy), Alaksandr Kabanaŭ i Siarhiej Piatruchin (23 tysiačy), Siarhiej Cichanoŭski (16 tysiač), Andrej Pavuk (11 tysiač), Pavieł Śpiryn (10 tysiač).
Usie jany sabralisia razam, kab padtrymać vyłučeńnie ŭ deputaty ajcišnika, błohiera Mikałaja Masłoŭskaha. Idzie jon u deputaty pa Kalvaryjskaj vybarčaj akruzie №104, toj samaj, dzie kandydatkaj ad ułady idzie «Mis Biełaruś» Maryja Vasilevič. «Prakocim Mašu», — taki łozunh svajoj kampanii abraŭ Masłoŭski.
26 vieraśnia ŭsie jany sabralisia razam na pikiet la kramy «Karona» na vulicy Kalvaryjskaj. Najpierš, kab pryciahnuć uvahu da svajoj kampanii, a taksama pa mahčymaści sabrać krychu podpisaŭ.
Kab vy razumieli pra błohieraŭ, heta sapraŭdy vielmi papularnyja kanały, jakija hladzić vializnaja kolkaść ludziej. Na hetaj ža sustrečy vypadkovyja ludzi, što išli ŭ kramu pa pradukty, padychodzili da Marata Minskaha ci Arcioma Šaporava, kab sfotkacca ci ŭziać aŭtohraf.
«A ja vas viedaju», — časta čułasia ad samych roznych ludziej.
Što było na pikiecie? Jak ni dziŭna, a moža tak i było zadumana, ale sam Masłoŭski byŭ daloka nie samaj hałoŭnaj dziejučaj asobaj. Kaniečnie, niamała ludziej padychodziła i da jaho, ale ŭvaha mnohich była skancentravana na inšych.
Naprykład, da apošniaha tak nichto i nie viedaŭ, ci pryjdzie adzin z samych papularnych jutub-błohieraŭ krainy Marat Minski (Abramoŭski).
«Ja pryjšoŭ siudy, kab prajavić svaju salidarnaść z usioj błohierskaj hramadoj, — skazaŭ jon «NN». — Błohierstva siońnia — heta realnaja infarmacyjnaja alternatyva tamu, što adbyvajecca».
My spytali, a ci nie strašna Maratu pačynać zajmacca palitykaj? «Nie zabyvajciesia, što vy razmaŭlajecie z prajektam KDB (śmiajecca), mnie ŭvohule niama čaho bajacca. Kali kapnuć krychu hłybiej, to vy ŭbačycie, što z palitykaj u mianie našmat bolš ahulnaha, čym z błohierstvam».
Abramoŭski ŭ svoj čas byŭ adnym ź lidaraŭ pratestnaha ruchu «Revalucyja praz sacyjalnyja sietki».
Siarhiej Cichanoŭski (kanał «Kraina dla žyćcia») vyłučajecca siarod prysutnych svaim fakturnym vyhladam. Za im paŭsiul chodziać dva chłopcy: adzin z kamieraj, druhi sočyć za hukam. U Cichanoŭskaha ŭsio ŭ paradku ź mierčam, jon razdaje prysutnym majki i kiepki z nadpisami «Kraina dla žyćcia», aformlenych u bieł-čyrvona-biełaj koleravaj hamie.
U Cichanoŭskim usio vydaje chaleryčny skład charaktaru. Jon hukaje ŭ miehafon, spračajecca, pravakuje, pytajecca ludziej. Praŭda, pieražyvaje, što padpisčykaŭ pakul nie duža bahata, ale choča vieryć, što chutka dabiare.
Arciom Šaporaŭ padobny da zvyčajnaha pacančyka ź luboha mikrarajona, a tym nie mienš jaho kanał «Hramadstva Homiel» hladzić bolš za 40 tysiač čałaviek.
«Kruty dzień, histaryčnaja padzieja — błohiery abjadnalisia. Nam nie duža mocna spadabałasia vyłučeńnie 22-hadovaj Maryi. U čałavieka jość zasłuha — mis Biełaruś, i jana idzie ŭ palityku. Kali ja stanu najlepšym dvornikam horada, to mnie taksama iści ŭ palityku? Ja chaču, kab u palitycy byli piśmiennyja i razumnyja śpiecyjalisty. My pakazvajem absurd dadzienaj situacyi. Ja vielmi rady byŭ usich bačyć, mnie padabajecca atmaśfiera.
Mnie Kola Masłoŭski pazvaniŭ: davaj zamucim takuju temu. Ja kažu, dy nu nafih, chaj jany sami ŭ svaich vybarach udzielničajuć, potym razhavarylisia, vyrašyli ŭsich błohieraŭ pryciahnuć. Siońnia za Mašu źbirajuć podpisy nastaŭniki, nichto navat nie sumniavajecca, što jana stanie deputatam. A my pakazvajem, jakuju padtrymku atrymaje Mikałaj Masłoŭski, ale my nikudy nie projdziem. Jakaja padtrymka ŭ Mašy? Pra jaje ž nichto nie viedaŭ, pakul jana nie pajšła tancavać z Łukašenkam? Ja paru miesiacaŭ tamu navat nie viedaŭ: Vasilevič — heta mis ci mistar Biełaruś», — kaža Šaporaŭ.
Jašče adzin błohier Uładzimir Cyhanovič dakazaŭ, što zdolny pryciahvać da siabie ŭvahu nie tolki ŭ videafarmacie, ale i ŭ reale. Jon chutka źbiraje vakoł siabie natoŭp ludziej, i ŭsie słuchajuć jaho. Pra vybary, pra Vasilevič, pra stan našaha hramadstva, pra prablemy krainy. Cyhanovič padobny da pratestanckaha pastara, tolki voś vyrazy jon užyvaje bolš mocnyja.
Cikava, što pobač akazvajucca lidar i eks-lidar AHP Mikałaj Kazłoŭ i Anatol Labiedźka.
«Anatol Uładzimiravič, vy tut jak błohier?» — pytajemsia ŭ Labiedźki.
«Pa cotnych dniach ja błohier», — žartuje ŭ adkaz Labiedźka.
Palityk miarkuje, što ŭ supracoŭnictvie z błohierami jość vializny patencyjał dla palitykaŭ. Havorym pra toje, što ŭ budučyni kandydatu ŭ prezidenty mahčyma budzie sabrać 100 tysiač podpisaŭ tolki pry dapamozie takich krynic infarmacyi.
Bieraściejski «narodny reparcior» Alaksandr Kabanaŭ jakraz partyjec i jakraz pradstaŭlaje AHP. Kabanaŭ raskazvaje, što ŭ papularnych jutub-błohieraŭ jość svoj čat, dzie i abmiarkoŭvajucca samyja roznyja idei, tam i naradziłasia hetaja z vyłučeńniem Masłoŭskaha.
Sam Kabanaŭ taksama bałatujecca ŭ deputaty, ale ŭ samim Breście. «Spravy z vybarami ŭ Breście nie vielmi, a ź ludźmi dobra. Na siońniašni dzień pałova sabranych podpisaŭ jość — heta prosta šykoŭny vynik. I sabrana heta ŭsio było tolki na pikietach».
Kabanaŭ nabyŭ asablivuju viadomaść padčas zmahańnia suprać akumulatarnaha zavoda, jaki padobna tak i nie zapracuje. «Kali vyviezuć abstalavańnie, kali za heta adkažuć usie vinavatyja čynoŭniki, tady možna budzie havaryć pra kančatkovuju pieramohu», — kaža Kabanaŭ.
Čas ad času źjaŭlajucca razmovy, što Kabanaŭ moža stać kandydatam u prezidenty naleta. «Nie, ni dumak takich nie było, ni prapanoŭ (śmiajecca). Česna, nie», — adkazvaje błohier.
Z kałonak hučyć vielmi dziŭny miks piesień: i niešta pra pčoł, i ŭsio, što zastaniecca paśla mianie ad DDT, i Vajciuškievič na vierš Karatkievič, i «Putinaroda» ad Brutto.
Pikiet — daloka nie samy efiektyŭny srodak pa zbory podpisaŭ, zvyčajna kudy bolš plonu daje abychod kvater i internataŭ, ale za Masłoŭskaha sapraŭdy padpisvajucca. Niekalki dziasiatkaŭ aŭtohrafaŭ jon sabraŭ i na hetaj pijar-akcyi.
Pobač adzinoka stajać zborščyki podpisaŭ za kandydata-kamunista Hienadzia Nasieviča. Heta načalnik darožna-ekspłuatacyjnaha kamunalnaha pradpryjemstva «Ramaŭtador» Frunzienskaha rajona. U jahonaj bijahrafii asobna napisana, što maje padziaku ad jašče mitrapalita Fiłareta za svaju dziejnaść.
«Jak heta stasujecca, kamunist i relihija?» — pytajucca ŭ dziaŭčat, što stajać u pikiecie. «Vy zanadta vuzka myślicie», — hulliva adkazvajuć tyja. Tak i nie ŭbačyli, kab choć chtości raśpisaŭsia za Nasieviča.
«Ludzi prychodzili nie tolki podpisy stavić, ale i vykazvać padtrymku, prynosili prablemy svaje, budziem raźbiracca, rychtavać videa i kankretnaje rašeńnie pytańnia. Paznavalnaść užo raście», — skazaŭ «NN» Mikałaj Masłoŭski.
A jašče było šmat ahulnych zdymkaŭ, bačna, što ludzi stasavalisia sabie ŭ zadavalnieńnie. «Vy ŭžo fotkajeciesia jak pieramožcy», — adznačyŭ niechta z prysutnych. «A my ŭžo i jość takija», — pačułasia ŭ adkaz.
Kamientary