Dom Vasila Chadźkova, jaki pratestavaŭ suprać vysialeńnia jaho pry pabudovie mietro, spalili, a samoha jaho zatrymali.
Napiaredadni Vasil Chadźkoŭ začyniŭsia ŭ domie i zapaliŭ u piečy, kab dymam pryciahnuć uvahu minčukoŭ da svajoj prablemy. Praz budaŭnictva linii mietro ŭzdoŭž praśpiekta Dziaržynskaha ŭ Chadźkova zabrali dom ź ziamielnaj dzialankaju, a ŭzamien vydzielili dvuchpakajovuju kvateru — ale nie asobna Chadźkovu, a razam z byłoj žonkaj i jaje paŭnaletnim synam.
Vasil Chadźkoŭ pierasialacca admoviŭsia i padaŭ u sud, ale sud staŭ na bok haradckich uładaŭ i pastanaviŭ vysielić čałavieka prymusova.
17 lutaha da doma Chadźkova znoŭ padjechała budaŭničaja technika, a taksama milicyjanty. Vasila Chadźkova hvałtam zaciahnuli ŭ «varanok» i advieźli ŭ Maskoŭski RAUS. Jamu pahražaje aryšt za niepadparadkavańnie pradstaŭnikam ułady.
Tym časam dom pačali znosić. Kiravaŭ hetym adkazny supracoŭnik «Dyrekcyi budaŭnictva metro» Siarhiej Niaŭraź. Mahutny buldozier «Amkador» złamaŭ pałovu doma, u tym liku i nieastyłuju pieč. Praź niekalki chvilin u razvalinach źjaviłasia połymia, jakoje chutka pierarasło ŭ vialiki pažar.
Tušyć pažar pryjechali try pažarnyja aŭtamabili, ale dom Chadźkova za ličanyja chviliny faktyčna zhareŭ całkam. Pry hetym mahli paciarpieć i pažarnyja: budaŭniki svoječasova nie adklučyli kabiel, jaki padvodziŭ da doma elektryku.
