Na minułym tydni ŭ kadry aficyjnaj chroniki trapiła razmova Alaksandra Łukašenki ź nieviadomaj šyrokaj publicy žančynaj. Jak vyśvietliŭ TUT.BY, na pasiadžeńni Vyšejšaha Jeŭrazijskaha ekanamičnaha savieta ŭ Jerevanie biełaruski lidar razmaŭlaŭ ź ministram handlu JEEK Vieranikaj Nikišynaj.
Žurnalisty «Kamsamołki» źviarnuli ŭvahu na pavodziny Łukašenki padčas adkryćcia samita ŭ stalicy Armienii. Kiraŭniki dziaržaŭ razam sa svaimi supravadžajučymi asobami zajšli ŭ zału i sieli za kruhły stoł. Za ich śpinami raźmiaścilisia členy delehacyj. U «biełaruskim siektary» stajali kiraŭnik MZS Uładzimir Makiej i pasoł Biełarusi ŭ Rasii Uładzimir Siamaška. Adnak da momantu, kali haspadar samita ŭ Jerevanie Nikoł Pašynian pačaŭ svaju pryvitalnuju pramovu, kresła Łukašenka pustavała. Na ahulnych płanach tranślacyi vidać, što ŭ hety čas prezident Biełarusi staić u druhim baku zały i razmaŭlaje ź niejkaj žančynaj u bežavym pinžaku.
Pavodle infarmacyi TUT.BY, Alaksandr Łukašenka razmaŭlaŭ z členam kalehii (ministram) pa handli Jeŭrazijskaj ekanamičnaj kamisii Vieranikaj Nikišynaj.
Surazmoŭcy Tut.by nazyvajuć jaje «vialikim ekśpiertam» u śfiery handlu. Zhodna z aficyjnaj bijahrafijaj, Nikišyna źjaŭlajecca kandydatam ekanamičnych navuk, abaraniła dysiertacyju pa temie «Kiravańnie dostupam rasijskich tavaraŭ na rynki zamiežnych dziaržaŭ u sučasnych umovach».
Da prychodu ŭ JEEK u 2016 hodzie była pamočnikam pieršaha vice-premjera RF. Raniej zajmała kirujučyja pasady ŭ Ministerstvie ekanamičnaha raźvićcia Rasii.
U ciapierašni čas Vieranika Nikišyna kuryruje šerah klučavych dla Jeŭrazijskaha ekanamičnaha sajuza śfier, takich jak mytna-taryfnaje i nietaryfnaje rehulavańnia, ustanaŭleńnie prefierencyjnych handlovych režymaŭ z trecimi krainami, prymianieńnie Jeŭrazijskim ekanamičnym sajuzam achoŭnych mier.
Z 1 kastryčnika ŭłady Biełarusi ŭstanavili minimalnuju canu na cukar na fonie źjaŭleńnia ŭ prodažy tannaha rasijskaha cukru. Hetuju normu Minsk pačaŭ prymianiać jašče ŭ 2018 hodzie. Tady kalehija JEEK adobryła dziaržaŭnaje rehulavańnie cen na bieły cukar u Biełarusi.
«Heta mahła być adna z tem, jakuju abmiarkoŭvali Łukašenka i Nikišyna», — kaža adzin surazmoŭca. Pa inšaj infarmacyi, «Minsk choča atrymać kantrol u handlovym błoku JEEK».