110 deputataŭ, jakija trapiać u parłamient, — praviercie śpis paśla vybaraŭ
Da parłamienckich vybaraŭ zastajecca ŭsiaho ničoha, i sprahnazavać «pieramožcaŭ» u bolšaści akruhaŭ nie składaje nijakaj ciažkaści.
Analizujučy śpis kandydataŭ u deputaty i ich pasady, lohka pradkazać budučych deputataŭ. Važnaja nie papularnaść ci jakaść kampanii — važnaja pasada.
«NN» prapanuje svoj prahnoz. I śpis tych 110 deputataŭ, jakich 18 listapada my ŭbačym u novym sklikańni parłamienta. Praviercie naš prahnoz paśla vybaraŭ.
Bresckaja-Zachodniaja akruha №1
Favaryt vidavočny — heta deputat Pałaty pradstaŭnikoŭ Leanid Bryč, jaki źjaŭlajecca namieśnikam staršyni pastajannaj kamisii pa ekanamičnaj palitycy. Bryču 60 hadoŭ, rodam jon z Drahičynskaha rajona. Pa adukacyi — inžynier-technołah. Pradstaŭlaje kanapnuju Biełaruskuju patryjatyčnuju partyju.
Abnoŭlena: supiernikaŭ u jaho nie zastałosia. Z honki źniali błohiera, fiermiera i praciŭnika akumulatarnaha zavoda Alaksandr Kabanaŭ, jaki pradstaŭlaŭ Abjadnanuju hramadzianskuju partyju, a taksama Palinu Šarendu-Panasiuk, jakaja žorstka krytykavała ŭłady.
Čytajcie. Bresckaja kandydatka ŭ televystupie nazvała Łukašenku dyktataram. I jaje źniali z vybaraŭ
Bresckaja-Centralnaja akruha №2
Chutčej za ŭsio, vyłučencam ad uładaŭ stała zavuč himnazii №2 Maryna Vaśko. Rodam jana z samoha Bresta, joj 44 hady, baćki taksama pracavali ŭ sistemie adukacyi. Sama Maryna Viktaraŭna pa prafiesii — nastaŭnica biełaruskaj movy i litaratury.
Bresckaja-Uschodniaja akruha №3
Jašče adzin dziejny deputat — Anatol Daško. Uvachodzić u kamisiju pa pracy i sacyjalnych pytańniach. Jamu 59 hadoŭ, a rodam ź Niaśvižu. Pracavaŭ doktaram-hiniekołaham. Byŭ hałoŭnym doktaram Bresckaha radzilnaha doma.
Pa hetaj ža akruzie idzie 23-hadovaja nastaŭnica matematyki ź viaskovaj škoły Śviatłana Łysienka.
Bresckaja-Pahraničnaja akruha №4
Hałoŭnym pretendentam bačycca hałoŭny kamisar Bresckaj vobłaści, hvardyi pałkoŭnik Jaŭhien Zajcaŭ. Adnojčy vajskovy kamisar Brestyčny Uładzimir Bazanaŭ užo stanaviŭsia deputatam, a ciapier uznačalvaje fiederacyju futboła. Zajcavu 49 hadoŭ, a rodam jon ź Mścisłava.
Abnoŭlena: jahonaha kankurenta, praciŭnika akumulatarnaha zavoda, pradstaŭnika AHP Uładzimira Maroza, z vybaraŭ źniali.
Baranavickaja-Zachodniaja akruha №5
Mabyć, kandydatam ad ułady tut idzie načalnik baranavickaha haradździeła MNS Ihar Chłabukin. Usio svajo žyćcio jon adpracavaŭ ratavalnikam. Chłabukinu 46 hadoŭ.
Baranavickaja-Uschodniaja akruha №6
Tut prasoŭvajuć moładź. Ad «Biełaj Rusi» i BRSM na vybary idzie prarektar Baranavickaha dziaržaŭnaha ŭniviersiteta Pavieł Papko. Jamu 36 hadoŭ. Podpisy źbirajuć studenty VNU.
Baranavickaja sielskaja akruha №7
Ludmiła Žaŭnierčyk — načalnik adździeła analizu praktyki i mietadyčnaha zabieśpiačeńnia Upraŭleńnia Śledčaha kamiteta pa Bresckaj vobłaści. Da pierachodu ŭ SK pracavała ŭ orhanach MUS. Joj 55 hadoŭ, vyjšła zamuž u 18 hadoŭ.
Biełaviežskaja akruha №8
Žanna Staciŭka — taksama deputatka Pałaty pradstaŭnikoŭ. I taksama ŭvachodzić u kamisiju pa pracy i sacyjalnaj abaronie. Joj 51 hod, rodam z Kamianieckaha rajona (bałatujecca na małoj radzimie). Pa adukacyi nastaŭnica, ale budavała sabie karjeru čynoŭnicy. Pradstaŭnica kanapnaj Partyi pracy i spraviadlivaści.
Pružanskaja akruha №9
Adna z samych dziŭnych akruhaŭ.
Abnoŭlena: kandydat ad ułady tut nie vidavočny, ale miascovyja aktyvisty tłumačać, što heta hałoŭny vieterynarny ŭrač Arančyckaj ptuškafabryki Alaksandr Laŭčuk. Heta paśpiachovaje pradpryjemstva ŭ rajonie.
Praŭda, pra Leŭčuka nie pišuć miascovyja «Rajonnyja budni», a sam jon nie vyłučany ad pracoŭnaha kalektyvu.
Ad apazicyi tut fiermier-chadek Michaił Novik, jaki razvodzić karovaŭ.
Dniaproŭska-Buhskaja akruha №10
U hetuju akruhu ŭvachodziać Drahičynski i Ivanaŭski rajony. Kandydatam №1 tut jaŭna bačycca staršynia Drahičynskaha rajonnaha savieta deputataŭ Śviatłana Bartaš. Jana miascovaja — ź vioski Sałava Drahičynskaha rajona. Vyšejšuju adukacyju atrymlivała zavočna. Pracavała ŭ adździele ekanomiki rajvykankama. Śviatłanie 50 hadoŭ.
Pa hetaj akruzie vyłučyŭsia hienierał-pahraničnik Vasil Hiedźko, jaki kaliści ŭznačalvaŭ Instytut pamiežnaj słužby, ale padtrymki jon nie atrymaŭ.
Ivacevickaja akruha №11
Najchutčej, što deputatam stanie 32-hadovaja BRSMaŭka Natalla Hołub. Jana ŭznačalvaje biarozaŭskuju piarvičku arhanizacyi. Ale cikava, što vyłučyłasia jana ŭsio ž pa susiedniaj akruzie. Kaliści jana była inicyjataram akcyi «Padary vyšyvanku novanarodžanamu».
Kobrynskaja akruha №12
Pa akruzie bałatujecca dziejny deputat Pałaty pradstaŭnikoŭ Vasil Dziemidovič. Jamu 58 hadoŭ, rodam ź Biarozaŭskaha rajona. U parłamiencie adkazvaŭ za budaŭnictva. Da pačatku palityčnaj dziejnaści doŭha pracavaŭ u Kobrynskim mastackim kaledžy, u tym liku i dyrektaram.
Łuninieckaja akruha №13
Tut nie zusim vidavočnaja situacyja. Ale chiba što najbolš imaviernym kandydatam bačycca hałoŭny ekanamist «Śpiecžalezabietona» Anatol Nasienia. Jamu 40 hadoŭ, pa pracy čas u asnoŭnym pravodzić u Mikaševičach. Vyłučeniec «Biełaj Rusi».
Pinskaja haradskaja akruha №14
U Pinsku ŭ deputaty idzie staršynia miascovaha rajonnaha suda Alaksandr Amieljaniuk. U jahonuju inicyjatyŭnuju hrupu ŭvajšło 49 čałaviek. Sudździ 55 hadoŭ.
Pinskaja sielskaja akruha №15
I tut situacyja nie samaja vidavočnaja. Chutčej za ŭsio, kandydatka ad ułady tut Valancina Biahieba, jakaja ŭznačalvaje azdaraŭlalny centr «Śvitanak». Raniej jana była kiraŭnicaj adździeła adukacyi Pinskaha rajvykankama. Kaliści reprezientavała Kampartyju, ciapier idzie jak biespartyjnaja.
Stolinskaja akruha №16
55-hadovy deputat Alaksandr Babałovič choča trapić i ŭ novaje sklikańnie parłamienta. Pracavaŭ u śfierach sielskaj haspadarki i budaŭnictva. U parłamiencie taksama adkazvaŭ za žyllovuju palityku.
Viciebskaja-Horkaŭskaja akruha №17
Zdajecca, tolki pa hetaj akruzie idzie na vybary dziejny kiraŭnik rehijanalnaj administracyi — staršynia Viciebskaha harvykankama Viktar Mikałajkin.
Mikałajkinu 58 hadoŭ, rodam jon ź Vietkaŭskaha rajona. Skančvaŭ palitech, pracavaŭ inžynieram u aŭtakałonie. Apošnija 10 hadoŭ byŭ kiraŭnikom Viciebska.
Viciebskaja-Čkałaŭskaja akruha №18
Tut situacyja absalutna niezrazumiełaja była spačatku.
Abnoŭlena: sprava ŭ tym, što na vybary bałatavaŭsia namieśnik dyrektara «Viciebskaj TEC» Alaksandr Kapleŭski (źniaŭsia), načalnik siektara kadravaj i pravavoj raboty filijała «Vajenservis» Juryj Mielnikaŭ (źniali). Kandydatam ad ułady tut budzie dyrektarka škoły №45 Taćciana Aŭtuchova. Jana ŭžo była deputatam Viciebskaha haradskoha savieta, ciapier čas pajści na pavyšeńnie. Pa adukacyi spadarynia Taćciana nastaŭnica małodšych kłasaŭ.
Viciebskaja-Čyhunačnaja akruha №19
Na akruzie piaciora partyjcaŭ, jakija pradstaŭlajuć ad Partyi BNF da kamunistaŭ i ŁDPB, a taksama pradstaŭnica «ruskaha śvietu» Mirasalimavaj. A deputatkaj ad dadzienaj akruhi stanie 33-hadovaja dyrektarka «Viciebskaha ŭniviermaha» Śviatłana Horval.
Jana rodam z Vałožyna, a vučyłasia ŭ Hrodnie va ŭniviersitecie imia Janki Kupały. U Viciebsk pierajechała ŭ 2013 hodzie. Taksama źjaŭlajecca deputatkaj Viciebskaha abłasnoha savieta. Na miascovych vybarach była samaj bahataj kandydatkaj u Viciebsku.
Viciebskaja-Kastryčnickaja akruha №20
Tut miarkujecca, što deputatam stanie 50-hadovy rektar Viciebskaha dziaržaŭnaha ŭniviersiteta imia Mašerava Alaksiej Jahoraŭ.
Jon rodam z Pskoŭskaj vobłaści Rasii. Vučyŭsia va Ukrainie na pravaznaŭcu. Byŭ dekanam jurydyčnaha fakulteta ŭ Połackim univiersitecie. Ad 2014 hoda ŭznačalvaje hałoŭnuju VNU vobłaści. Praŭda, sioleta ŭ Viciebsku składali pietycyju ab adstaŭcy rektara. Sprava ŭ tym, što ŭ jahonaj VNU dzień rodnaj movy pravodzili pa-rusku.
Haradockaja akruha №21
U adnym z samych paŭnočnych rajonaŭ Biełarusi abrańnicaj losu bačycca staršynia Viciebskaj rajonnaj arhanizacyi Biełaruskaha prafsajuza rabotnikaŭ ahrapramysłovaha kompleksu Iryna Palakova. Joj 40 hadoŭ, žyvie pad Viciebskam. Mienavita Palakova ahučvaje vyniki «bitvy za ŭradžaj», a taksama ŭručaje pryzy tym rabotnikam, jakija najbolš adznačylisia ŭ časie siaŭby ci žniva.
Dokšyckaja akruha №22
Tut jasna ŭsio. U akruzie bałatujecca dziejny śpikier Pałaty pradstaŭnikoŭ — Uładzimir Andrejčanka. I niahladziačy na 70-hadovy ŭzrost, Andrejčanka ŭsio jašče badziory i hatovy da pracy. «Naša Niva» pisała, što Andrejčanka — adziny ŭ Biełarusi palityk, jaki na vybarach nabiraje hałasoŭ navat bolš za Alaksandra Łukašenku.
Lepielskaja akruha №23
Vajskoviec, deputat Pałaty pradstaŭnikoŭ Ihar Martynaŭ iznoŭ idzie na vybary ŭ Lepieli.
Jamu 54 hady, rodam ź Viciebska. Prachodziŭ słužbu na roznych pasadach. Martynaŭ byŭ adnym z tych parłamientaroŭ, jaki aktyŭna prasoŭvaŭ papraŭki ŭ zakanadaŭstvie, kab admianić adterminoŭki na pryzyŭ chłopcam, jakija pastupajuć vučycca ŭ mahistraturu.
Navapołackaja akruha №24
Dzianis Karaś — deputat Navapołackaha harsavieta, jon pracuje načalnikam ustanoŭki «Naftana». Karaś aktyŭničaŭ u Navapołacku, to zładzić subotnik, to pasadzić drevy dla žycharoŭ svajho mikrarajona. Na «Naftanie» jon pracuje ad 1996 hoda.
Aršanskaja haradskaja akruha №25
Najchutčej, što tut staŭka robicca na zahadčycu radzilni pry Aršanskaj paliklinicy Inu Kračak. U 2017 hodzie jana stała «Čałaviekam hoda na Viciebščynie». Spačatku pracavała doktaram-akušeram, a potym i ŭznačaliła miascovuju radzilniu. Uvachodzić u «Biełuju Ruś», była deputam miascovaha savieta.
Abnoŭlena: pa akruzie źniali błohiera «Šeraha kata», jon ža Dźmitryj Kazłoŭ, za ahučvańnie łozunhu «Falšyvym vybaram basta».
Aršanskaja-Dniaproŭskaja akruha №26
Ažno dziesiać kandydataŭ padało zajaŭki na rehistracyju ŭ hetaj akruzie. Ale znoŭ pieraabracca miarkuje dziejny deputat Vital Čudovič. Jamu 49 hadoŭ, jon aršaniec. Byŭ načalnikam łakamatyŭnaha depo ŭ Oršy. U parłamiencie taksama ŭvachodzić u kamitet pa pramysłovaści i transparcie.
Połackaja haradskaja akruha №27
Ad Połacka ŭ parłamient, chutčej za ŭsio, adpraviać taksama miedyka. Heta namieśnica hałoŭnaha doktara «Połackaj centralnaj haradskoj balnicy» Śviatłana Adzincova. Na miascovych vybarach 2018 hoda Adzincova była adnoj z najbahaciejšych połackich pretendentak. Jaje dachod za 2016 hod skłaŭ bolš za 23 tysiačy rubloŭ.
Połackaja sielskaja akruha №28
Bahataja drahičynskaja ziamla na hodnych ludziej. Deputatam pa hetaj akruzie maje stać połacki «mer» Mikałaj Šaŭčuk, jon pachodzić z Drahičyna. Pracavaŭ dyrektaram saŭhasa ŭ Połackim rajonie. Apošnim časam byŭ staršynioj Połackaha rajvykankama.
Pastaŭskaja akruha №29
Choć akruha nazyvajecca Pastaŭskaj, ale padobna, što deputatam stanie pradstaŭnik susiedniaha Brasłaŭskaha rajona. 56-hadovy Pavieł Silčonak źjaŭlajecca staršynioj Brasłaŭskaha rajonnaha abjadnańnia prafsajuzaŭ.
Sieńnienskaja akruha №30
Dastatkova vysokaha stanovišča budzie deputat ad Sieńnienskaha rajona — heta namieśnik hienieralnaha prakurora Alaksandr Dubaŭ. Čamu jon bałatujecca ŭ Siańnie? Sprava ŭ tym, što ad 1987 da 1997 hady jon byŭ prakuroram Sieńnienskaha rajona. Jamu 64 hady, rodam z Uładzimirskaj vobłaści Rasii. Vučyŭsia ŭ BDU na «pravaznaŭstvie». Ad 2014 hoda — namieśnik Alaksandra Kaniuka ŭ Hienieralnaj prakuratury.
Homielskaja-Jubilejnaja akruha №31
Tut u deputaty idzie kiraŭnik Čyhunačnaha rajona Homiela Vital Utkin. Jon skončyŭ ukrainskuju Akademiju ŭnutranych spraŭ. U Homielskim abłvykankamie pracavaŭ ad 1993 hoda. Uznačalvaŭ adździeł pa zvarotach hramadzian. U 2014 hodzie ŭznačaliŭ adzin z rajonaŭ Homiela.
Homielskaja-Sielmašaŭskaja akruha №32
Deputatam tut maje stać načalnik upraŭleńnia biaśpieki Homielskaha zavoda lićcia i narmalaŭ Alaksandr Dančanka. Pra jaho stali šmat pisać dziaržaŭnyja ŚMI. Słužyŭ mužčyna ŭ viciebskim desancie, braŭ udzieł u bajavych dziejańniach u Afhanistanie. Papracavaŭ u kamitecie dziaržkantrola, a taksama na mytni. Ad 2014 hoda — na ZŁiNie.
Homielskaja-Centralnaja akruha №33
Dastatkova ciažkaja dla prahnazavańnia akruha, ale ryzykniem vykazać mierkavańnie, što deputatam tut maje stać pradstaŭnik kanapnaj Partyi pracy i spraviadlivaści Andrej Złotnikaŭ. Jon pracuje namieśnikam dekana jurydyčnaha fakulteta Homielskaha ŭniviersiteta imia Skaryny — kuźni kadraŭ dla siłavych struktur. Złotnikaŭ — kandydat sacyjałahičnych navuk, dacent. U navukovych intaresach — sacyjałohija sporta i zdarovaha ładu žyćcia.
Homielskaja-Savieckaja akruha №34
Tut pradstaŭnicaj ad ułady bačycca načalnik upraŭleńnia ideałahičnaj raboty Homielskaha abłvykankama Iryna Daŭhała. Joj 52 hady, rodam z Kryčava, ale ŭ pieršy kłas pajšła ŭžo ŭ Homieli. Jašče za savieckim časam papracavała ŭ kamsamole. Pa adukacyi — fiłołah i juryst.
Homielskaja-Pramysłovaja akruha №35
Pa joj u deputaty vyrašyŭ pajści jašče adzin rabotnik śfiery adukacyi — dyrektar SŠ №69 Homiela Alaksandr Maškaroŭ. Heta adna z samych pieradavych škoł krainy.
Maškaroŭ rodam z Aršanskaha rajona, vučyŭsia ŭ Mazyrskim piedzie na fakultecie ahulnatechničnych dyscyplin. Ad 2005 hoda jon dyrektar škoły. U hetaj SŠ dzieciam kładuć na hałovy miašečki z sollu, kab u ich była pravilnaja asanka, a ŭ chole ŭstalavali majatnik Fuko. Za takija śmiełyja padychody, mahčyma, Maškarova i vyrašyli pavysić da deputata Pałaty.
Homielskaja-Navabielickaja akruha №36
Cikava, što pra ŭsich homielskich vyłučencaŭ ad ułady napiaredadni vyjšli vialikija narysy ŭ haziecie «Homielskija viedamaści». Zahadčyca piedyjatryčnym adździaleńniem dla niedanošanych dziaciej Homielskaj kliničnaj balnicy №3 Volha Kreč tut nie stała vyklučeńniem.
Čytajcie: «Žyvyja čałavieki», jany ž adepty BSSR, iduć na parłamienckija vybary pa Homieli
Homielskaja sielskaja akruha №37
Zdajecca, što pradstaŭnictva BRSM u parłamiencie značna ŭzraście ŭ paraŭnańni ź minułymi sklikańniami. Najbolš vidavočny kandydat pa akruzie — 33-hadovy pieršy sakratar abłasnoha kamiteta BRSM Ihar Zavalej. Jon adznačyŭsia jak arhanizatar pałatačnych łahieraŭ «Družba», što prachodzić u Homielskaj vobłaści.
Buda-Kašaloŭskaja akruha №38
Na novy termin idzie deputat Pałaty pradstaŭnikoŭ Mikałaj Vasilkoŭ. Jamu 61 hod, a rodam z Karmianskaha rajona. Pracavaŭ terapieŭtam, uznačalvaŭ upraŭleńnie achovy zdaroŭja Homielskaha abłvykankama.
Žytkavickaja akruha №39
Tut taksama čakajecca pieraabrańnie dziejnaj deputatki. Iryna Kralevič — pradstaŭlaje Kamunistyčnuju partyju Biełarusi.
Joj 54 hady, jana rodam z Mazyra. Pa adukacyi — nastaŭnica matematyki. Da Pałaty pradstaŭnikoŭ była prarektarkaj pa navukovaj pracy Mazyrskaha piedahahičnaha ŭniviersiteta imia Šamiakina. U parłamiencie adkazvaje za pytańni ekałohii i nastupstvaŭ Čarnobylskaj avaryi.
Žłobinskaja akruha №40
Vyhladaje na toje, što tut rajonnaja viertykal stavić na staršyniu miascovaha savieta deputataŭ Ihar Vołkava. Jamu 49 hadoŭ, a raniej Vołkaŭ byŭ dyrektaram u škole №2 Žłobina.
Kalinkavickaja akruha №41
Jaŭhien Adamienka na dadzieny momant źjaŭlajecca deputatam Pałaty pradstaŭnikoŭ. Da hetaha jon papracavaŭ staršynioj vykankamaŭ dvuch susiednich rajonaŭ — Mazyrskaha i Kalinkavickaha. Adamienku 59 hadoŭ, jon rodam z Naraŭlanskaha rajona. Pracavaŭ u śfiery sielskaj haspadarki, uznačalvaŭ kałhas. Staršynia pastajannaj kamisii pa sielskaj haspadarcy.
Mazyrskaja akruha №42
Tut čaćviora kandydataŭ — i ŭsie jany siabry niejkich palityčnych partyj. Vyhladaje, što deputatkaj tut maje stać pradstaŭnica Kampartyi, staršynia Mazyrskaha rajonnaha savieta deputataŭ Valancina Nazarenka.
Paleskaja akruha №43
Jašče adzin praŭładny kamunist i jašče adzin dziejny deputat Pałaty — heta Leanid Pisanik. Rodam z Mazyra, jamu 62 hady. Pa prafiesii — vajskoviec. Pracavaŭ zampalitam u vajskovych častkach. Byŭ staršynioj Jelskaha rajvykankama. Za čas pracy ŭ Pałacie pradstaŭnikoŭ ničym asabliva nie adznačyŭsia.
Rečyckaja akruha №44
Vyhladaje, što deputatam pa hetaj akruzie stanie zusim niemiedyjnaja asoba, technar — načalnik naftazdabyvajučaha ŭpraŭleńnia «Rečycanafta» Siarhiej Stelmašok. Jamu 48 hadoŭ.
Rahačoŭskaja akruha №45
Favarytam bačycca dyrektar Homielskaj abłasnoj sielskahaspadarčaj doślednaj stancyi NAN Siarhiej Kraŭcoŭ. Jon vyłučany jak pry dapamozie zboru podpisaŭ, hetak i ad pracoŭnaha kalektyva. Heta vyłučaje bolšaść «kandydataŭ ułady».
Cikava, što Kraŭcova padtrymaŭ miascovy apazicyjanier ź nieadnaznačnaj reputacyjaj Dzianis Daškievič, jaki navat uvajšoŭ u inicyjatyŭnuju hrupu kandydata.
Śvietłahorskaja akruha №46
Časam składvajecca ŭražańnie, što nižniaja pałata biełaruskaha parłamienta prosta stvoranaja dla premiravańnia načalstva ź sistemy achovy zdaroŭja i adukacyi. Ad ułady pa Śvietłahorsku idzie hałoŭny doktar rajonnaj balnicy Ihar Taŭtyn. Sioleta jon źviartaŭsia da žycharoŭ horada z prośbaj dapamahčy z ramontam ustanovy, bo hrošaj u balnicy paprostu nie było. Ciapier ža Taŭtyn, najchutčej, źjedzie ŭ stalicu.
Chojnickaja akruha №47
Pazicyi Kampartyi pa Homielskaj vobłaści va ŭładnych kołach dastatkova mocnyja. U Chojnikach ad KPB na vybarach idzie namieśnica staršyni rajvykankama Žanna Čarniaŭskaja. U rajvykankamie jana adkazvała za ideałohiju, adukacyju, kulturu, sport.
Vaŭkavyskaja akruha №48
Pierachodzim u Hrodzienskuju vobłaści. Pa Vaŭkavysku ad uładaŭ idzie 48-hadovy hałoŭny pažarny rajona Pavieł Pakaniečny.
Hrodzienskaja-Zaniomanskaja akruha №49
Ličym, što deputatam pa akruzie stanie hałoŭnaja doktarka dziciačaj palikliniki №1 Hrodna Iryna Łukanskaja. Jana aktyŭničaje ŭ Sajuzie žančyn, a taksama atrymlivała ŭznaharodu za svaju dziejnaść ad kolišniaha premjer-ministra Andreja Kabiakova.
Hrodzienskaja-Kastryčnickaja akruha №50
Deputatkaj pa joj maje stać 41-hadovaja Alena Patapava. Na dadzieny momant jana pracuje namieśnicaj hienieralnaha dyrektara Budaŭniča-meblevaha abjadnańnia «ZOV». Patapava — adna z samych aktyŭnych deputatak miascovaha haradskoha savieta.
Patapava naradziłasia ŭ Skidzieli. Pa adukacyi — nastaŭnica ruskaj movy i litaratury.
Hrodzienskaja-Centralnaja akruha №51
52-hadovaja deputatka Pałaty pradstaŭnikoŭ Lilija Kirjak znoŭ pasprabuje pieraabracca ŭ parłamient. Kirjak rodam sa Ščučyna, pa adukacyi — nastaŭnica ruskaj movy i litaratury (papularnaja ŭ Hrodnie praca, kab stać deputatkaj). Była dyrektarkaj škoły №13 u Hrodnie. U parłamiencie adkazvaje za adukacyju.
Hrodzienskaja-Leninskaja akruha №52
Pa hetaj akruzie ŭ parłamient znoŭ sprabuje trapić dziejnaja deputatka — heta Tamara Daŭhašej. Joj 59 hadoŭ, naradziłasia ŭ vioscy Savičy Brahinskaha rajona. Pa adukacyi — doktarka-kardyjołah. Uznačalvała Hrodzienski abłasny kliničny kardyjałahičny centr. Cikava, što ŭ Pałacie ŭvachodzić u kamisiju pa mižnarodnych spravach.
Hrodzienskaja sielskaja akruha №53
Deputatam pa hetaj akruzie maje stać pieršy namieśnik hienieralnaha dyrektara ahrakambinata «Skidzielski» Alaksandr Autko. Jamu 47 hadoŭ, i jon biespartyjny.
Iŭjeŭskaja akruha №54
Jašče adzin dziejny deputat Pałaty pradstaŭnikoŭ — heta Alaksandr Markievič. Jamu 51 hod, a rodam jon sa Ščučyna. Papracavaŭ u strukturach Ministerstva abarony i Pamiežnaha kamiteta. Jak deputat ničym asablivym nie adznačyŭsia.
Lidskaja akruha №55
Niečakana na vybary pajšoŭ namieśnik kiraŭnika Administracyi prezidenta Valeryj Mickievič. Admietna, što bolšaść praŭładnych vyłučencaŭ źbirali podpisy, a Mickievič prosta vyłučany ad pracoŭnaha kalektyvu, što pakazvaje na toje, što svajo rašeńnie jon pryniaŭ u apošni momant.
Mickievič doŭhi čas pracavaŭ sudździoj, a taksama ŭ Ministerstvie justycyi. U Administracyi prezidenta jon prabyŭ rekordnyja 10 hadoŭ, adkazvaŭ za jurydyčnuju śfieru.
Hladzi taksama: Piać faktaŭ pra Valeryja Mickieviča
Niomanskaja akruha №56
Chutčej za ŭsio, mandat deputata dastaniecca namieśniku hiendyrektara «Hrodnaabłhaz» Uładzimiru Siniaku. Ad apazicyi tut krytyk Ministerstva adukacyi Siarhiej Alšeŭski.
Zamkavaja akruha №57
A voś u Navahrudku-Kareličach asablivaj intryhi nie namiačajecca. Vidavočny kandydat ad uładaŭ pa hetaj akruzie — načalnik upraŭleńnia adukacyi Hrodzienskaha abłvykankama Alaksandr Sanhin. Jamu 50 hadoŭ, rodam ź Lidskaha rajona, pa adukacyi — «historyk». Byŭ dyrektaram u viaskovych škołach, potym pracavaŭ u adździele adukacyi Lidskaha rajvykankama, trochu pabyŭ ideołaham na zavodzie «Nioman».
Słonimskaja akruha №58
Až vosiem čałaviek zachacieła stać deputatam u Słonimskaj akruzie. Źviartaje ŭvahu, što tut podpisy sabrali siabar BNF Viktar Marčyk i historyk Vasil Hierasimčyk. Ale deputatam, prahnazujem, stanie staršynia Zelvienskaha savieta deputataŭ Valancin Siemianiaka.
Naradziŭsia jon u Pružanskim rajonie, ale hadavaŭsia ŭžo ŭ Zelvienskim. Pracavaŭ nastaŭnikam fiziki ŭ viaskovych škołach. Piša vieršy na biełaruskaj i ruskaj movach. Vydaŭ zbornik paezii «Na skryžavańni». Žyvie ŭ ahraharadku Kniazieva pad Zelvaj.
Smarhonskaja akruha №59
Tut u deputaty miecić namieśnik staršyni Astravieckaha rajvykankama Viktar Śviła. Cikava, što padčas vybarčaj kampanii Śviła pačaŭ drukavać u miascovaj rajoncy svoj ruskamoŭny pierakład knihi «Vilija i jaje bierahi» Kanstancina Tyškieviča.
Sam Śviła kazaŭ, što jašče hadoŭ dziesiać tamu identyfikavaŭ siabie jak palaka, ale ciapier usprymańnie źmianiłasia. Jon havoryć, što na jahonaj tumbačcy la łožka lažać try Biblii: na polskaj, biełaruskaj i ruskaj movach. U volny čas lubić palavańnie. Žanaty ŭ druhi raz. Na pracu ŭ Astraviec jeździć z Ašmianaŭ.
Ščučynskaja akruha №60
Jašče adzin pradstaŭnik BRSM maje stać deputatam u Ščučynie. Heta pieršy sakratar Hrodzienskaha abłasnoha BRSM Pavieł Michaluk.
Biarezinskaja akruha №61
Siarod čatyroch partyjcaŭ tut jość tolki adzin biespartyjny. I, zdajecca, mienavita jon maje stać deputatam Pałaty. Heta 58-hadovy namieśnik načalnika kansultacyjnaha adździeła Minabarony Ihar Łaŭrynienka.
Doŭhi čas jon zajmaŭ dalikatnuju pasadu ataše pa pytańniach abarony pry pasolstvie Biełarusi ŭ Rasii. Da hetaha byŭ pieršym namieśnikam načalnika Hienštaba. Hienierał-major.
Barysaŭskaja haradskaja akruha №62
Pa akruzie vyłučajecca hałoŭny doktar miascovaha radzilnaha doma Alaksandr Šypuła. Heta adna z najlepšych padobnych ustanovaŭ pa-za stalicaj. Šypuła karystajecca aŭtarytetam siarod barysaŭskaha čynavienstva.
Barysaŭskaja sielskaja akruha №63
Jak by dziŭna ni było, ale vybar deputata ŭ hetaj akruzie nie zusim vidavočny. Tak, tut vyłučajecca byłaja ministarka infarmacyi Lilija Ananič (uradženka barysaŭskaj vioski Leanova), ale taksama idzie i hałoŭny pažarny rajona Uładzimir Pikuza. Usio ž ryzykniom vykazać mierkavańnie, što deputatkaj stanie mienavita Ananič. Zanadta aktyŭnuju dziejnaść jana razharnuła pa rajonie, a taksama vielmi šmat zhadak pra jaje ŭ miascovaj rajoncy «Adzinstva».
Hladzi taksama: Historyja žyćcia Lilii Ananič
Žodzinskaja akruha №64
U Žodzinie ŭ deputaty vyłučajecca načalnik termahalvaničnaha cechu «BiełAZa» Maksim Kuryłovič. Ale chutčej za ŭsio staŭka budzie zroblenaja na namieśnika dyrektara Žodzinskaha politechničnaha kaledža Valeryja Stralčonka, siabra Kampartyi. Jon vykładaje va ŭstanovie pradmiety elektratechničnaha cykła.
Puchavickaja akruha №65
Tut kandydat vidavočny — heta načalnik Hienštaba, hienierał-major Aleh Biełakonieŭ. Jamu 54 hady, a rodam z Prymorskaha kraja Rasii. U Biełaruś trapiŭ pa doŭhu słužby. Ad 2014 hoda Biełakonieŭ byŭ pieršym namieśnikam ministra abarony. Ciapier u siłavym viedamstvie buduć čakacca istotnyja kadravyja pierastanoŭki.
Hladzi taksama: Chto moža ŭznačalić Hienštab paśla Biełakonieva?
Kapylskaja akruha №66
Budzie pradstaŭlenaja ŭ parłamiencie Biełaruskaja ahrarnaja partyja, u asobie ciapierašniaj deputatki Ludmiły Niževič. Joj 55 hadoŭ. Pačynała z pracy buchhałtarki ŭ Kapylskim rajonie, papracavała ŭ Ministerstvie finansaŭ, Minskim abłvykankamie, apošniaj jaje pasadaj było — namieśnica ministra sielskaj haspadarki.
Słuckaja akruha №67
I tut deputatka idzie na pieravybary — heta Ludmiła Ražaniec. Pa adukacyi jana žurnalistka. Pracavała ŭ lubanskaj i słuckaj rajonkach. Była hałoŭnym redaktaram haziety «Słucki kraj». U parłamiencie była ŭ kamisii pa pravach čałavieka i ŚMI.
Salihorskaja haradskaja akruha №68
Da deputackaha partfiela prymiarajecca staršynia piarvičnaj prafsajuznaj arhanizacyi «Biełaruśkalija» Andrej Strunieŭski. Mienavita namahańniami Strunieŭskaha pierad aktyvistami niezaležnaha prafsajuza harniakoŭ byŭ pastaŭleny vybar: albo vy ŭ aficyjnym prafsajuzie, albo ŭ niezaležnym. I paśla hetaha mnohija syšli tolki pad kryło FPB.
Salihorskaja sielskaja akruha №69
Tut iznoŭ pieraabirajecca 40-hadovaja deputatka Julija Muryna. Pa adukacyi jana — vykładčyca psichałohii. Pryčym vučyłasia ŭ Sankt-Pieciarburhu. Pracavała ŭ salihorskim BRSM, a taksama była deputatkaj miascovaha savieta.
Staŭbcoŭskaja akruha №70
Abnoŭlena: deputatku Pałaty pradstaŭnikoŭ Alenu Anisim pa hetaj akruzie prosta nie zarehistravali, zabrakavaŭšy podpisy. Tym samym, šlach u parłamient rasčyścili dla načalnika miascovaj milicyi Ivana Mamajki.
Dziaržynskaja akruha №71
Tut jość i biełaruskamoŭny pradstaŭnik BRSM Kirył Šyk i kiraŭnik kampanii «Havary praŭdu» Andrej Dźmitryjeŭ. Tym nie mienš, deputatam, vyhladaje, budzie kiraŭnik rajonnaha savieta deputataŭ Alaksandr Sarakač. U svoj čas jon uznačalvaŭ Fanipalski harvykankam.
Maładziečanskaja haradskaja akruha №72
Pieraabracca spadziajecca 53-hadovaja deputatka Pałaty pradstaŭnikoŭ Ludmiła Kananovič. Pa adukacyi — nastaŭnica matematyki. Była dyrektarkaj himnazii №3. U parłamiencie pracavała ŭ kamisii pa pracy i sacyjalnaj abaronie.
Maładziečanskaja sielskaja akruha №73
Pa hetaj akruzie, vyhladaje, dalej pracaŭładkujecca staršynia kamiteta pa pracy, zaniataści i sacyjalnaj abaronie Minskaha abłvykankama Aleh Siemiančuk.
Vilejskaja akruha №74
Cikavaja akruha, tut na mandat pretendujuć adrazu dvoje pradstaŭnikoŭ KPB. Adzin ź ich — historyk Alaksandr Płavinski, toj samy, jaki admaŭlaje toje, što ŭ savieckija časy ŭłady rasstrelvali ludziej u Kurapatach. Jon nie vyłučany ad partyi, a praz zbor podpisaŭ. Druhaja kamunistka — staršynia Kryvasielskaha sielskaha vykankama Iryna Supranovič. Chutčej za ŭsio, što apošniaja i maje stać deputatkaj ad hetaj akruhi. Pa adukacyi jana pravaznaŭca.
Łahojskaja akruha №75
I tut my majem adrazu dvuch pradstaŭnikoŭ KPB (tut uvohule niama biespartyjnych kandydataŭ). Niečakana pa akruzie vyłučyłasia kamunistka Natalla Hudkova, jakaja ŭznačalvaje miascovy kambinat bytavoha absłuhoŭvańnia. Jaje kandydaturu partyja nie padtrymała. Inšy kamunist — heta dziejny deputat parłamienta Piatro Vabiščevič. Jon rodam sa Stolinskaha rajona, nastaŭnik fiziki i matematyki. Byŭ dyrektaram viaskovych škoł, uznačalvaŭ adździeł kultury rajvykankama.
Sienickaja akruha №76
Zusim niaprostaja dla prahnazavańnia akruha. Pa-pieršaje, tut bałatujecca adrazu vosiem kandydataŭ. Pa-druhoje, na pieravybary idzie deputat Pałaty pradstaŭnikoŭ, «kazacki» ataman, kiraŭnik Patryjatyčnaj partyi Mikałaj Ułachovič, ale supiernik u jaho budzie zusim niaprosty — dyrektar Minskaha abłasnoha kaledža Vadzim Dordal. Cikava, što Ułachovič navat nie źbiraŭ podpisy, a vyrašyŭ prosta vyłučycca ad partyi. Usio ž vykažam mierkavańnie, što deputatam tut hetym razam stanie mienavita Dordal, a nie kazacki ataman.
Zasłaŭskaja akruha №77
Kandydataŭ tut ažno dziesiać, ale favaryt usiaho adzin — heta adnaviaskoŭka Zianona Paźniaka, dziejnaja deputatka parłamienta Valancina Kursievič. Joj 54 hady, miedyk. Pracavała doktaram na chutkaj dapamozie, doktaram-kardyjołaham, uznačalvała kardyjałahičnaje adździaleńnie ŭ 2-j minskaj balnicy.
Babrujskaja-Leninskaja akruha №78
Kandydataŭ tut na luby husty: i kamunisty, i nacyjanalisty, i libierały, i pradstaŭnica jaŭrejskaj arhanizacyi «Rachamim». Deputatam paŭtorna choča stać Iryna Ryniejskaja, jakaja na dadzieny momant znachodzicca ŭ parłamiencie ŭ pastajannaj kamisii pa adukacyi i kultury.
Ryniejskaj 47 hadoŭ, jana nastaŭnica chimii i bijałohii. Uznačalvała ŭpraŭleńnie adukacyi Babrujskaha harvykankama.
Babrujskaja-Pieršamajskaja akruha №79
U deputaty idzie dyrektarka Babrujskaha dziaržaŭnaha kaledža Viera Šyrokaja, joj usiaho 34 hady. Jana skončyła hety samy kaledž pa śpiecyjalnaści «Nastaŭnik malavańnia i čarčeńnia».
Skončyła zavočna BDPU pa śpiecyjalnaści «Nastaŭnica biełaruskaj movy i litaratury». Aktyŭničała ŭ babrujskim BRSM. Zamužam, muž pracuje ŭ śfiery ŽKH.
Babrujskaja sielskaja akruha №80
Adna z tych akruhaŭ, dzie vyznačyć «kandydata ad ułady» niaprosta. Tut bałatujucca hałoŭny doktar Babrujskaj centralnaj balnicy Uładzimir Hacko i kiraŭnik miascovaha lashasa Andrej Ćvirko. Pasprabujem pahadać, što ŭ parłamient usio ž trapić Hacko. Tym bolš, što jon maje dośvied abłasnoha savieta deputataŭ.
Bychaŭskaja akruha №81
Vielmi niemałoje pradstaŭnictva KPB čakajecca ŭ parłamiencie. Amal peŭna, što mandat pa hetaj akruzie atrymaje kamunist Siarhiej Syrankoŭ, jon pracuje pieršym namieśnikam načalnika ŭpraŭleńnia pa adukacyi Mahiloŭskaha abłvykankama. Da hetaha jon pracavaŭ u adździele adukacyi Krasnapolskaha rajona. Miescam žycharstva i ciapier paznačana mienavita Krasnapolle.
Horackaja akruha №82
Alena Kalaśniova sprabuje znoŭ trapić u parłamient. Na dadzieny momant jana ŭvachodzić u pastajannuju kamisiju pa adukacyi i kultury. Jana sama rodam z Horak, inžynier-ekanamist. Była prarektarkaj u miascovaj sielskahaspadarčaj akademii.
Kryčaŭskaja akruha №83
I tut niapeŭnaja situacyja. Majucca dva raŭnaznačnyja pretendenty: dyrektar Klimavickaha lashasa Uładzimir Azaranka i načalnik łakamatyŭnaha depo «Kryčaŭ» Alaksandr Siviankoŭ. Usio ž pryjarytetniej vyhladajuć pazicyi Azaranki. Darečy, jon ziamlak vice-premjera Uładzimira Kucharava. Plus da ŭsiaho maje dośvied u miascovych savietach. U takich akruhach «bieśpierśpiektyŭny» kandydat niaredka zdymajecca z honki bližej da vybaraŭ.
Mahiloŭskaja-Leninskaja akruha №84
«Chto taki Marzaluk? Ja adkažu na hetaje pytańnie pad bita hruk», — taki viasioły rep byŭ zapisany da minułaj vybarčaj kampanii historyka i archieołaha Ihara Marzaluka. Cikava, čym ciapier ździvić deputat? Marzaluk — adzin z najbolš jarkich deputataŭ parłamienta siońniašniaha sklikańnia, jaho šmat u ŚMI, jon vykazvaje sprečnyja tezy, plaskaje prezidentu. Kali b Marzaluka nie było ŭ parłamiencie, to jaho varta było b prydumać.
Hladzi taksama: Marzaluk: Vilnia — horad našych maraŭ
Mahiloŭskaja-Centralnaja akruha №85
Jašče adna cikavaja akruha, dzie vyłučanyja adrazu dźvie pradstaŭnicy KPB. Abiedźviuch kamunistak zavuć Ludmiła, i abiedźvie jany pracujuć u śfiery adukacyi. I adna ź ich, jak vyhladaje, atrymaje mandat. Ludmiła Zdorykava ŭznačalvaje SŠ №27 Mahilova, a Ludmiła Iljinskaja — Mahiloŭski handlovy kaledž. Pastavim na apošniuju tolki praz toje, što jaje vyłučeńnie padtrymała partyja.
Mahiloŭskaja-Kastryčnickaja akruha №86
Abnoŭlena: u novaje sklikańnie parłamienta tut sprabuje pieraabracca Volha Pietrašova. Joj 51 hod. Jana rodam ź Piermskaj vobłaści Rasii. Ale vyhladaje na ŭsie, što deputatam jana nie stanie. My stavim na dyrektara Vahonabudaŭničaha zavoda Vitala Martynava, jon akazaŭsia samym bahatym kandydatam pa Mahiloŭskaj vobłaści.
Mahiloŭskaja-Pramysłovaja akruha №87
Abnoŭlena: deputatam ad sportu budzie kanaist, alimpijski čempijon 1992 hoda Alaksandr Masiejkaŭ.
Mahiloŭskaja sielskaja akruha №88
Vielmi cikavaja situacyja ŭ hetaj akruzie. Tut bałatujecca načalnik adździeła adukacyi Mahiloŭskaha abłvykankama (voś sapraŭdnaja kuźnia kadraŭ i ŭ staršyni vybarčych kamisij, i ŭ deputaty) Natalla Tarasienka. Niezvyčajnaść u tym, što Tarasienka ŭžo vyłučałasia na vybarach 2016 hoda, ale ŭ apošni momant źniała z vybaraŭ svaju kandydaturu. Mahčyma, ciapier situacyja źmianiłasia, i spadarynia Natalla narešcie dasiahnie zapavietnaj mary.
Asipovickaja akruha №89
Na akruzie jość dyrektarka kličaŭskaj siaredniaj škoły. Tym nie mienš robim staŭku, što deputatkaj stanie hałoŭnaja redaktarka «Mahiloŭskich viedamaściaŭ» Śviatłana Šutava.
Škłoŭskaja akruha №90
Na radzimie prezidenta situacyja zusim niezrazumiełaja. Dumajem, što na miesca ŭ parłamiencie z adnolkavym pośpiecham mohuć pretendavać dyrektar škłoŭskaj škoły dla dziaciej z parušeńniami zroku Inha Alaksandrava i staršynia Białynickaha savieta deputataŭ Andrej Hančuk. Usio ž miarkujem, što ŭ parłamient trapić apošni. Hančuk pa adukacyi — nastaŭnik historyi. Byŭ namieśnikam staršyni Białynickaha rajvykankama.
Šabanoŭskaja akruha №91
Pierachodzim da Minska. I choć u stalicy tradycyjna kandydataŭ bolš, čym u rehijonaŭ, znajści siarod ich vyłučencaŭ ad ułady časam nie vielmi składana. Naprykład, pa hetaj akruzie favarytka vidavočnaja — dyrektarka minskaha filijała Biełaruskaha handlova-ekanamičnaha ŭniviersiteta spažyvieckaj kaapieracyi Halina Łahunova.
Aŭtazavodskaja akruha №92
U hetaj akruzie podpisy sabraŭ supracoŭniki Kiraŭnictva spraŭ prezidenta Viktar Alšeŭski, adnak deputatam, kali nie zdarycca ničoha niečakanaha, usio ž stanie namieśnik hiendyrektara MAZ Alaksandr Hrankoŭski.
Vaśniacoŭskaja akruha №93
I tut staŭka ŭładaŭ vidavočnaja — namieśnica hałoŭnaha doktara pa akušerska-hiniekałahičnaj dapamozie 5-j haradskoj balnicy Minska Maryna Škrob.
Śvisłackaja akruha №94
Pieraabirajecca ŭ joj deputat Valeryj Varaniecki. Jon prafiesijny dypłamat. Byŭ pasłom našaj krainy ŭ Aŭstryi. Varaniecki — adzin z najbolš publičnych deputataŭ hetaha sklikańnia, jon daje šmat intervju, u tym liku i niedziaržaŭnaj presie, havoryć pra kansalidacyju hramadstva. Jaho možna ŭbačyć na mnohich imprezach i mierapryjemstvach. A jašče Varaniecki viadzie papularny akaŭnt u fejsbuku.
Hladzi taksama: Čynoŭniki ŭ bolšaści stajać na patryjatyčnych pazicyjach. Rasija nam čyrvonych linij nie akreślivała — Valeryj Varaniecki, intervju
Kupałaŭskaja akruha №95
Taja akruha, u jakoj hałasujuć biełarusy, što žyvuć za miažoj. Na novy termin vyłučajecca pa joj pradstaŭnica Patryjatyčnaj partyi hienierała Ułachoviča Taćciana Sajhanava. Jana rodam z Vałožynskaha rajona, pa adukacyi — vykładčyca chimii. Pracavała namieśnikam hiendyrektara «Kamunarki». Zrešty, nie ździvimsia, kali ŭrešcie mandat tut atrymaje staršynia Partyi BNF Ryhor Kastusioŭ albo vazočnik Jaŭhien Šaŭko.
Čkałaŭskaja akruha №96
Jašče adzin dypłamat idzie ŭ parłamient — heta były pres-sakratar MZS i pasoł Biełarusi ŭ Turcyi Andrej Savinych. Dabro na jahonaje abrańnie ŭžo navat daŭ Alaksandr Łukašenka ŭ čas razmovy z Uładzimiram Makiejem. Pra Savinych šmat pisać nie budzie, lepš pačytajcie hutarku ź im.
Kastryčnickaja akruha №97
Abnoŭlena: i tut z vybarami prakacili apazicyjnuju deputatku Hannu Kanapackuju, a deputatam stanie kamunist ad BRSM Siarhiej Kliševič, jaki niekali napadaŭ na maładafrontaŭca Źmitra Daškieviča.
Hrušaŭskaja akruha №98
Zdajecca, vybar uładaŭ tut vidavočny — heta staršynia pastajannaj kamisii parłamienta pa achovie zdaroŭja Ludmiła Makaryna-Kibak. Jana rodam z Chojnikaŭ, joj 52 hady. Pa adukacyi — doktarka-otałarynhołah. Taksama tut bałatujecca adzin z pradstaŭnikoŭ «ruskaha śvietu» ŭ Biełarusi Siarhiej Łušč.
Paŭdniova-Zachodniaja akruha №99
Jašče adzin dziejny deputat parłamienta idzie na vybary. Havorka pra pradstaŭnika Partyi pracy i spraviadlivaści Ihara Kamaroŭskaha. Jamu 48 hadoŭ, minčuk, inžynier-miechanik. Pracavaŭ dyrektaram Minskaha vahonaramontnaha zavoda.
Jasieninskaja akruha №100
I tut dziejnaja deputatka. I tut pradstaŭnica Partyi pracy i spraviadlivaści. Vyłučenku zavuć Aksana Hajduk, joj 45 hadoŭ, a rodam jana z Baranavickaha rajona. Skončyła BNTU pa śpiecyjalnaści «Budaŭnictva aŭtamabilnych daroh». Pracavała namieśnikam hiendyrektara ŭ «Harramaŭtadar Minharvykankama».
Kamiennahorskaja akruha №101
Pa hetaj akruzie dziejnaja deputatka taksama vyrašyła nie raźvitvacca ź miescam u parłamiencie. My havorym pra 53-hadovuju Hannu Staravojtavu. Jana rodam z Salihorska, pa adukacyi — nastaŭnica matematyki i infarmatyki. Pracavała dyrektarkaj u minskich škole i himnazii. Nie vyklučym, što deputatam ad hetaj akruhi stanie 22-hadovy BRSMaviec-kamunist z Akademii mastactvaŭ Raman Rol. Ale heta ŭsio ž małaimavierna. Małady jašče. Naša staŭka — usio ž na Staravojtavu.
Zachodniaja akruha №102
Usio ž favarytam ad uładaŭ tut idzie načalnik sakrataryjatu staršyni praŭleńnia «Biełarusbank» Maryna Lančeŭskaja. «Stalicy žanočy tvar», — nazvali jaje ŭ «Minsk-naviny». Vialiki repartaž Lančeŭskaj pryśviaciŭ telekanał STB. Lančeŭskaja — dačka byłoha čynoŭnika Alaksandra Papkova. A supracoŭnik Ministerstva adukacyi, kamunist Kruhlik, padobna, znoŭ zastaniecca druhim, jak i na vybarach 2016 hoda.
Puškinskaja akruha №103
Tut bałatujecca staršynia Minharsavieta Vasil Panasiuk. Jon rodam z Muchaŭca, Brescki rajon. Skončyŭ BNTU pa śpiecyjalnaści «Elektrasietki». Pracavaŭ na CEC-4 u Minsku. Ad 2003 hoda — dyrektar CEC-4.
Kalvaryjskaja akruha №104
«Mis Biełaruś», pastajannaja spadarožnica kiraŭnika krainy Maryja Vasilevič, choča stać deputatam pa hetaj akruzie. Maryi — usiaho 22 hady. Jana moža stać najmaładziejšaj deputatkaj parłamienta. Da jaje pryciahnutyja ŭvahi mnohich ŚMI. U kankurentach u Vasilevič — błohier Mikałaj Masłoŭski.
Hladzi taksama: Maryja Vasilevič: U internecie pieravažna niehatyŭ, a ŭžyvuju ludzi mianie padtrymlivajuć
Staravilenskaja akruha №105
Sudździ Viarchoŭnaha suda Śviatłanie Lubieckaj 48 hadoŭ. U sudovaj sistemie jana ad 2000 hoda. Try hady ŭznačalvała Maskoŭski sud Minska (2010—2013), jakraz u hety čas prachodzili sudovyja pracesy ŭdzielnikaŭ Płoščy.
Kołasaŭskaja akruha №106
U akruzie vyłučyŭsia pieršy prarektar Biełaruskaha dziaržaŭnaha ŭniviersiteta infarmatyki i radyjoelektroniki Siarhiej Dzik. Jamu 63 hady. Jon i vučyŭsia i pracavaŭ usio žyćcio tolki ŭ BDUIR. Sam Dzik zajaŭlaje, što ŭ jaho padtrymku podpisy pastavili 4 tysiačy vybarcaŭ.
Dyrektarcy kaledža Hańnie Bojka, dumajem, treba pačakać.
Uschodniaja akruha №107
Jašče adnoj kałarytnaj asobaj u biełaruskim parłamiencie dadasca — heta kiraŭnik «Biełaj Rusi», były načalnik Biełteleradyjokampanii Hienadź Davydźka. Za słovam u kišeniu Davydźka nie lezie, budzie radavać samymi roznymi cytatami i pierłami.
Hladzi taksama: Žorstki «Tok» z Hienadziem Davydźkam
Kalinoŭskaja akruha №108
Nie skazać, kab tut usio dakładna. Pa akruzie vyłučajecca dyrektar Ramaŭtadara Pieršamajskaha rajona Minska Vital Hiermančuk. Ale, zdajecca, na deputata ŭsio nahavaryŭsia kiraŭnik ŁDPB Aleh Hajdukievič. I try hady tamu Hajdukievič moh trapić u parłamient, ale ŭ apošni momant źjaviŭsia Valeryj Varaniecki, jakoha patrebna było ŭładkavać. Zdajecca, na hety raz Aleh Siarhiejevič usio ž akažacca zapatrabavany.
Hladzi taksama: «Tok» z Aleham Hajdukievičam
Uručanskaja akruha №109
Tut isnuje intryha, na deputactva pretendujuć zahadčyca sadka №522 Ludmiła Jankoŭskaja, a taksama staršynia Biełaruskaha abjadnańnia vieteranaŭ Ivan Hardziejčyk. Stavim na apošniaha, jon hienierał u adstaŭcy, prajšoŭ praz vajnu ŭ Afhanistanie.
Partyzanskaja akruha №110
Deputatam zachacieŭ stać viadučy ANT Tenhiz Dumbadze. Jon uradženiec Dziaržynskaha rajona Biełarusi, ale paśla pažyŭ u Hruzii. Ad 2004 hoda viarnuŭsia ŭ našu krainu. U svaich vystupach pastajanna dziakuje Alaksandru Łukašenku za ščaślivaje žyćcio žycharoŭ Biełarusi.
***
Pry hetym my nie vyklučajem, što ŭ parłamiencie mohuć akazacca niechta z pradstaŭnikoŭ apazicyi. Naprykład, Ryhor Kastusioŭ ci Valeryj Uchnaloŭ (ad «Spraviadlivaha śvietu»), ale pradkazać ich prachod u hetym hodzie praktyčna niemahčyma.
Vielmi intryhoŭnaj bačycca akruha Mikałaja Ułachoviča, ci praciahnuć jamu mandat.
Budziem sačyć i za mahiloŭskaj akruhaj, dzie suprać dziejnaj deputatki vyłučyŭsia dyrektar vahonabudaŭničaha zavoda Vital Martynaŭ.
Bondarava zachacieła dvuchmoŭja, jak u Finlandyi. My taksama za6
Kamientary