«Chvościki». Fienomien: u Polščy za frykavuju partyju masava hałasavała moładź
«Kanfiederacyja «Svaboda i niezaležnaść» maje hučnuju nazvu, ale ŭjaŭlaje saboj frykavuju kaalicyju, na čale jakoj staić daŭni marhinał, 77-hadovy Januš Korvin-Mikie. U kaalicyju ŭvajšli drobnyja ultranacyjanalistyčnyja, manarchičnyja, antyjeŭrapiejskija i ultrakatalickija asiarodki. Ź cikavaha — mienavita da hetaj partyi prajaŭlaje cikavaść Maskva, jak i da ŭsich jeŭrapiejskich krajnie pravych i krajnie levych siłaŭ.
«Kanfiederacyja» vystupaje za ŭsio dobraje suprać usiaho kiepskaha. Akramia taho, «Kanfiederacyja» vystupaje suprać «prapahandy homaseksualizmu» i za viartańnie śmiarotnaha pakarańnia. Ale samaje hałoŭnaje, jana vystupaje za vychad ź Jeŭrasajuza — i mienavita heta robić jaje takoj pryvabnaj dla Rasii.
Zdavałasia b, u kansiervatyŭnaj Polščy, u krainie, jakaja dziakujučy ŭstupleńniu ŭ Jeŭrasajuz pieražyvaje ekanamičny bum, takaja siła nie pavinna mieć pośpiechu.
Tym nie mienš, «Kanfiederacyja» prajšła ŭ Sojm, chaj sabie i ź minimalnym, kala 6,8 % vynikam.
Užo i raniej na polskaj scenie źjaŭlalisia anałahičnyja ruchi — «Samaabarona» Lepiera, «Liha polskich siemjaŭ» Hiertycha. Časam jany dasiahali dvuznačnaj padtrymki. Adzin tolki momant adroźnivaje ciapierašni pośpiech «Kanfiederacyi». Za jaje masava hałasavali nie pravincyjnyja piensijaniery. Za jaje prahałasavała moładź.
Jak vynikaje z ekzit-poła, praviedzienaha sacyjałahičnaj słužbaj Ipsos dla TVP, TVN i Polsat, «Kanfiederacyja» sabrała 20,2 % hałasoŭ siarod vybarcaŭ ad 18 da 29 hadoŭ. Dla paraŭnańnia, va ŭzrostavaj hrupie ad 60 hadoŭ za jaje hałasavali tolki 1,1 %. Za partyju masava hałasavali «kucyki», — «chvościki», tak u Polščy nazyvajuć pakaleńnie 20-hadovych, pa modnaj siarod ich pryčoscy z chvościkam na makaŭcy.
Hetaje hałasavańnie było pratestavym, suprać isteblišmentu ź jaho viečnaj vajnoj libierałaŭ z Płatformy i kansiervataraŭ ź PiSa.
Hoły mužčyna pierabieh z Polščy ŭ Biełaruś, ruch na miažy na paru hadzin pierakryvali9
Kamientary