«Biełarus pa naradžeńni, katałoniec pa pierakanańniach». Biełarus z Barsiełony biare ŭdzieł u ruchu za niezaležnaść Katałonii
Katałoncy praciahvajuć uparta dabivacca niezaležnaści. Pratesty achapili ŭsiu hetuju krainu. Voś što pra heta piša biełarus Pavieł Kirylonak, jaki žyvie ŭ Barsiełonie i padtrymlivaje katałonski niezaležnicki ruch. «Biełarus pa naradžeńni, čech pa pašparcie, katałoniec pa pierakanańniach», — tak jon prezientuje siabie ŭ fejsbuku.
Pavieł Kirylonak zadajecca pytańniem, kolki času spatrebicca Madrydu, kab zrazumieć, što pratesty na hety raz surjoznyja, što pratestnaja chvala nie sydzie tak chutka i tak prosta.
Jašče Paŭłu kinułasia ŭ vočy, što na pratestach nadzvyčaj šmat maładych dziaŭčat: «Naohuł, učora byŭ prosta ździŭleny kolkaściu dalikatnych junych pannaŭ va ŭzroście 16—20 hadoŭ, jakija ŭ maskach i bałakłavach budavali barykady i biehali ad palicyi. Ledź nie hałoŭnaja ruchajučaja siła pratestaŭ!»
Čytajcie inšaje mierkavańnie: «Palać mašyny i škodziać Barsiełonie» — biełaruska, jakaja žyvie ŭ Katałonii, raspaviała pra pratesty
Spadar Kirylonak navat paraŭnoŭvaje maršy ludziej na aŭtastradach ź viadomym pachodam jakuckaha šamana ŭ Maskvu. Paraŭnajcie i vy:
«Katałonski radykalny pratest prosta ciapier.
Moładź, kali nie skazać — dzietki (šmat kamu pa 16—17 hadoŭ na vyhlad), u kolkaści pary dziasiatkaŭ tysiač čałaviek hulajuć u miačyki i śpiavajuć piesieńki.
Pa pierymietry jany akružany sotniaj furhonaŭ z palicyjaj, źvierchu visiać palicejskija viertaloty.
Poŭny siurrealizm», — tak apisaŭ Pavieł toje, što adbyvajecca na videa:
U sprobach patłumačyć pryčyny pratestu biełarus pryvodzić ličby hramadskaha apytańnia: pavodle ich, 80% katałoncaŭ ličać, što rehijon maje patrebu ŭ bolšaj stupieni samastojnaści, čym maje ciapier — niachaj heta budzie niezaležnaja dziaržava, subjekt fiederacyi abo prosta bolš šyrokaja stupień aŭtanomii ŭ składzie Ispanii, 79% katałoncaŭ padtrymlivajuć praviadzieńnie refierendumu ab niezaležnaści Katałonii, 15% — suprać refierendumu».
A jašče Pavieł Kirylonak pracuje ŭ śfiery turystyčnaha biznesu i sakavita apisvaje katałonskuju kulturu, pryrodu i kuchniu. U cichija dni.
Čamu kiraŭnikom svajoj Administracyi Łukašenka pastaviŭ Dźmitryja Krutoha? Jon moža stać pierajemnikam?7
Kamientary