Michaił Paškievič – novy kiraŭnik «Maładych demakrataŭ»
U Minsku na Siadzibie Partyi BNF prajšła II spravazdačna‑vybarčaja kanfierencyja moładzievaj arhanizacyi AHP «Maładyja demakraty».
Napiaredadni źjezdu ŭ livejournal‑ie była raspaŭsiudžanaja zajava ad imia lidera «Maładych demakrataŭ» Alaksandra Šumkieviča, što moładzievaja arhanizacyja AHP spyniaje supracoŭnictva z partyjaj i 22 lutaha «Moładzievy chryścijanska‑sacyjalny sajuz» pravodzić svoj alternatyŭny źjezd u adukacyjnym centry IBB.
Tym nie mienš na źjezd «MD» źjechałasia 44 delehaty amal z usich rehijonaŭ krainy. Nie byli pradstaŭlenyja tolki Viciebskaja i Mahiloŭskaja vobłaści.U adsutnaść užo vyjaznoha staršyni AHP Anatola Labiedźki, jaki hetymi dniami znachodzicca za miažoj, delehataŭ ad imia starejšych tavaryšaŭ pavitaŭ namieśnik kiraŭnika partyi Leŭ Marholin. «Partyja biez moładzi pieratvarajecca ŭ siektu. Mienavita moładź i pradprymalniki — našy hałoŭnyja resursy dla papaŭnieńnia składu siabroŭ arhanizacyi», — zaznačyŭ Ł.Marholin.
Byli pryvitalnyja słovy ad pradstaŭnika rasijskaj kaśjanaŭskaj moładzi, «Moładzi BNF», BCHD. Čamuści nie zaprasili pradstaŭnika «Maładoha frontu».
Kali pa rehłamiencie pryjšoŭ čas vystupu dziejsnaha staršyni, to vyśvietliłasia, što Šumkievič u zali nie prysutničaje.Spravazdaču daviałosia trymać jahonamu namieśniku Michaiłu Paškieviču. Jon akreśliŭ hałoŭnyja dasiahnieńni arhanizacyi ad momantu pieršaha źjezdu — paśpiachovuju rehijanalnuju dziejnaść, aktyŭny ŭdzieł u vuličnych akcyjach, mižnarodnaje supracoŭnictva z partniorami z Šviecyi, Ukrainy, Polščy, Litvy, Francyi, raspracoŭka alternatyŭnaha zakonaprajektu pa moładzievaj palitycy, udzieł u parłamienckich vybarach.
Prahučała prapanova abirać novaha staršyniu nie bolej čym na dva terminy pa dva hady. Delehaty pryniali kampramisnaje rašeńnie — nie bolej dvuch terminaŭ zapar.Taksama była pryniataja pastanova, što nie kožny siabar AHP da 35 hadoŭ u aŭtamatyčnych paradku stanovicca siabram «Maładych demakrataŭ», jak było raniej. Ciapier małady čałaviek sam moža prymać rašeńnie, ci zhodny jon uvachodzić u moładzievaje kryło partyi.
Na pasadu staršyni było prapanavana try kandydatury — Michaił Paškievič, Alaksandr Sierhijenka i Uładzimir Vujak. Dvoje apošnich samaadchililisia. Takim čynam, u vybarčyja biuleteni było zaniesienaje tolki adno proźvišča.
Za Michaiła Paškieviča prahałasavała 38 delehataŭ, suprać — 4, adzin biuleteń pryznany niesapraŭdnym.
Voś taki padarunak atrymaŭ Paškievič na 23-i dzień naradžeńnia, jaki śviatkavaŭ akurat u hety dzień.
Na pasadu namieśnika staršyni taksama na biezalternatyŭnaj asnovie byŭ prapanavany Alaksandr Sierhijenka, jakoha padtrymali i ŭdzielniki źjezdu.
***
Pa abrańni Michaił Paškievič adkazaŭ na niekalki pytańniaŭ «Našaj Nivy».
«Naša Niva»: Jak aceńvaješ pracu źjezdu?
Michaił Paškievič: Absalutna narmalny rabočy źjezd.
«NN»: Jak prakamientuješ siońniašnija namiery niekatorych udzielnikaŭ sarvać pracu źjezdu?
MP: U dadzienym vypadku ŭsie mierapryjemstvy pravodziłasia ŭ adpaviednaści z pastanovami partyi. Horšaje, što možna zrabić u hetaj situacyi — heta ŭchilacca ad spabornictvaŭ i prykryvacca niejkimi papierami.
«NN»: Jakija bližejšyja zadačy na pasadzie?
MP: Viartańnie da partyjnych pryjarytetaŭ. Papularyzacyja pradprymalnickaj inicyjatyvy i libieralnych pohladaŭ. Prasoŭvańnie idej svabodnaha rynku, pryvatnaj ułasnaści, abarona pravoŭ čałavieka.
«NN»: A što datyčyć miascovych vybaraŭ?
MP: Razam z partniorskimi moładzievymi arhanizacyjami budziem imknucca zakryć akruhi ŭ Minsku, abłasnych centrach, a taksama haradach stotysiačnikach. Adna sprava apiracca na kahości, a inšaja — na siabie, pravodzić svaju kampaniju. Mienavita taki łakalny ŭzrovień dazvalaje ludziam praviaracca jak palitykam.
«NN»: Chatniaja «chimija» nie budzie abmiažoŭvać ciabie ŭ dziejnaści?
MP: Heta zaležyć nie ad mianie, a ad našaj dziaržavy.
«NN»: Čamu na źjeździe nie było zakranutaje pytańnie chutkich prezidenckich vybaraŭ?
MP: Heta nie pytańnie dla moładzievaj arhanizacyi. Ja nie chaču stavić partyju ŭ niepryjemnaje stanovišča, bieručy na siabie nie svaje paŭnamoctvy.