Kałaŭr pra adzinuju valutu z Rasijaj i Kazachstanam: Havorki pra heta nie idzie

Staršynia Nacbanka Pavieł Kałaŭr adkazaŭ na pytańni žurnalistaŭ na kanfierencyi ŭ honar 25-hodździa biełaruskaha rubla.

Pavialičyć

— Raskažycie, jak udałosia zachavać i ŭtrymać rubiel.

— Sumiesnaja z uradam adkaznaja palityka zahadzia praduhledžanaja ŭ piacihadovym płanie. 

— Moža, byli kułuarnyja historyi taho, jak vam udałosia abmiežavać emisiju?

— Ničoha takoha nie było. Usio, što my chacieli rabić, my zahadzia abviaščali. Kali nie atrymlivałsia — tłumačyli. Adkrytaja adkaznaja palityka, pravilna vybudavanyja kamunikacyi.

— U čym sens «darožnych kart», jakija vy padpisali z Rasijaj? Aproč tych ahulnych słovaŭ, što byli ŭ pres-relizie? 

— My pryncypova damovilisia ab harmanizacyi hrašova-kredytnych palityk pa asobnych pytańniach. Što majecca na ŭvazie — i ŭ Biełarusi i ŭ Rasii musić być adzin režym manietarnaj palityki — heta tarhietavańnie inflacyi. U Rasii hety režym pracuje, u Biełarusi naležyć realizavać. Kali zakanadaŭstva budzie pryviedziena ŭ adpaviednaść z hetym režymam, to jon budzie funkcyjanavać z 1 studzienia 2020 hoda.

Druhoje, abmiennyja kursy nacyjanalnych valut musiać być płavajučyja. Mety pa inflacyi: mienavita cenavaja stabilnaść budzie dla nas i dla Centrabanka Rasii klučavym pytańniem, mety pa inflacyi pavinny być blizkimi. 

— Nacyjanalny bank vystupiŭ ź iniciatyvaj raspracavać stratehiju pavyšeńnia daviera da nacyjanalnaj valuty — jaki los hetaha dakumienta? 

— My papiarednie abmierkavali hety dakumient z uradam, jašče raniej na kansultatyŭnaj radzie Nacbanka. Siońnia praviadziem kansultacyi z ekśpiertami i budziem prapanoŭvać Uradu pryniać. 

— Na nastupny hod zakładzieny siaredni kurs dalara na 10% vyšej, čym u hetym. Čaho ahułam čakać? 

— Nacbank trymajecca płavajučaha kursa i prahnozy pa kursie nie vyznačaje! Što datyčyć faktyčnaj dziejnaści, to my čakajem cenavaj i finansavaj stabilnaści. U ramkach hetaha, naturalna, buduć vahańni ŭ dačynieńni inšych valut, ale ŭ miežach adchileńniaŭ, jakija nie mohuć vyšej za ŭzrovień inflacyi. Biezumoŭna, kali nie budzie niejkich šokaŭ.

Kursavaja palityka praduhledžvaje adpaviednuju adaptacyju da vonkavych šokaŭ, kali takija buduć. Va ŭsialakim razie pakul suśvietnaja supolnaść siurpryzaŭ nie čakaje, aproč źnižeńnia VUP.

— Jak na los našaha rubla ŭpłyvajuć pieryjadyčnyja śpiekulacyi ab niejkim jeŭrazijskim rubli, ałtynie? 

— Razmovy, jakija ni na čym nie zasnavanyja. Jany chvalujuć hramadskaść, farmirujuć pavyšanyja inflacyjnyja i devalvacyjnyja čakańni. Ale takoha kštałtu vykazvańni nijakich padstavaŭ nie majuć! U ramkach JEAES my razhladali pytańnie ab farmiravańni adzinaha rynka — havorki ab niejkich nadnacyjanalnych valutach nie idzie.

• 0
• 0
• 0
• 0
• 0
• 0