Try hady tamu Dzianisa pryznali adnym z paciarpiełych pa hučnaj spravie pa artykule KK «Pałavyja znosiny i inšyja dziejańni seksualnaha charaktaru z asobaj, jakaja nie dasiahnuła šasnaccacihadovaha ŭzrostu». Tady sud nad eks-kiraŭnikom dabračynnaj arhanizacyi «U dapamohu dzieciam-sirotam» Viačasłavam Davydovičam prachodziŭ u zakrytym režymie. Daviedaŭšysia, što paśla vyzvaleńnia Davydovič padaŭ pazoŭ na žurnalistaŭ i Tut.by pra abaronu honaru i hodnaści, Dzianis vyrašyŭ: raz Davydovič praciahvaje asprečvać svaju vinavataść, jon paprosić spahnać maralnuju kampiensacyju. Sud staŭ na bok Dzianisa, paviedamlaje Tut.by.
Viačasłaŭ Davydovič.
Pra toje, što zdaryłasia, 24-hadovy Dzianis (imia źmieniena) praktyčna ničoha nie kaža.
Toje, što ź Dzianisam adbyłosia, kali jamu było 14, i što śledčyja kvalifikavali jak kryminalnuju spravu, jon nazyvaje «heta». Kaža, jamu było soramna i strašna, tamu maŭčaŭ niekalki hadoŭ.
Suprać Davydoviča stali rasśledavać kryminalnuju spravu — «pałavyja znosiny i inšyja dziejańni seksualnaha charaktaru z asobaj, jakaja nie dasiahnuła šasnaccacihadovaha ŭzrostu». Hety praces prachodziŭ za začynienymi dźviaryma. Jaho asudzili na piać hadoŭ pazbaŭleńnia voli, zaličyŭsia termin za papiaredniuju sudzimaść, i u 2018 hodzie jon vyzvaliŭsia.
Viasnoj 2019 hoda Viačasłaŭ Davydovič sam źviarnuŭsia ŭ sud, jon padaŭ pazoŭ pra abaronu honaru i hodnaści. Adkazčykami stali žurnalisty i Tut.by. U jakaści maralnaj kampiensacyi Davydovič prasiŭ spahnać na jaho karyść 50 tysiač rubloŭ i apłacić vydatki na advakata. Sud admoviŭ.
— Viačasłaŭ Ivanavič (Davydovič) sprabuje viarnuć sabie reputacyju, a ja stajać u baku nie mahu, — tłumačyć Dzianis, čamu vyrašyŭ spahnać maralnuju škodu ź Viačasłava Davydoviča. — Zabycca, što zdaryłasia, nikoli nie atrymajecca. Pra heta nielha maŭčać, treba kryčać. Jość šmat ludziej, jakija mohuć dapamahčy, padtrymać takich achviar, jak ja. Kali jašče byŭ u internacie, pačalisia niervovyja zryvy, dumaŭ pra samahubstva. Dapamoh psichołah, tady vielmi chaciełasia mieć znosiny, a kali pačalisia sudy, supakoju nie było. Šmat chto chacieŭ, kab ja pamianiaŭ pakazańni, stali pahražać, i tady mianie ŭziali ŭ prahramu abarony śviedak. Bolš za hod žyŭ pad achovaj, nichto nie viedaŭ moj adras.
Dzianis vyjhraŭ sud pieršaj instancyi, i sud pastanaviŭ spahnać z Davydoviča ŭ jakaści maralnaj kampiensacyi 20 tysiač rubloŭ. Rašeńnie nie ŭstupiła ŭ zakonnuju siłu i moža być abskardžana.
