Abvinavačany ŭ zabojstvie doktara Fryca fon Vajczekiera ździejśniŭ złačynstva z-za «niepryjaznaści da siamji zabitaha, chutčej za ŭsio, vyklikanaj psichičnaj chvarobaj», piša dw.com.
Pra heta ŭ sieradu, 20 listapada, paviedamiła pres-słužba bierlinskaj prakuratury. Jana taksama ahučyła padrabiaznaści asoby padazravanaha — heta 57-hadovy raniej nie sudzimy hramadzianin Hiermanii, jaki žyvie ŭ ziamli Rejnłand-Pfalc na zachadzie krainy.
Abvinavačany prybyŭ u Bierlin, pakolki daviedaŭsia, što Fryc fon Vajczekier čytaje publičny dakład, padčas jakoha i było ździejśniena zabojstva. U sieradu abvinavačvany prajšoŭ abśledavańnie ŭ psichijatryčnaj klinicy, dzie i budzie ŭtrymlivacca, pa mienšaj miery, da abviaščeńnia vynikaŭ.
Pavodle vydańnia Der Tagesspiegel, abvinavačany abhruntavaŭ svaju «niepryjaznaść» suviaziami baćki zabitaha lekara, byłoha mera Zachodniaha Bierlina (1981—1984) i prezidenta Hiermanii (1984—1991) Rycharda fon Vajczekkiera z chimičnym kancernam Boehringer Ingelheim, jaki toj uznačalvaŭ u 1960-ja. Ličycca, što vyrablenyja kancernam chimikaty vykarystoŭvalisia amierykanskaj armijaj padčas vajny ŭ Vjetnamie.
Lekar Fryc fon Vajczekier, kiraŭnik adździaleńnia ŭnutranaj miedycyny pryvatnaj bierlinskaj kliniki, byŭ zabity ŭ aŭtorak, 19 listapada, padčas svajho vystupu, pryśviečanaha zachvorvańniam piečani. Jon čytaŭ dakład u svajoj klinicy pierad 20 słuchačami, kali na jaho napaŭ z nažom čałaviek, jaki znachodziŭsia ŭ zale, i śmiarotna paraniŭ. Palicejski ŭ cyvilnym, što byŭ siarod hledačoŭ, sprabavaŭ pieraškodzić napadniku, ale sam atrymaŭ ciažkaje ranieńnie. Zahinułamu było 59 hadoŭ.
Kamientary