Pajści i viarnucca. Kalinoŭski jak naš Hieroj z tysiačaj tvaraŭ
Piša Vasil Hierasimčyk.
Toje, što 155 hadoŭ zdaryłasia z Kalinoŭskim, ciapier pahražaje tamu narodu, dziela dabra i ščaścia jakoha jon uzyšoŭ na šybienicu.
Roźnica tolki ŭ tym, što Kastuś śviadoma achviaravaŭ u imia Praŭdy, hatovy rušyć na dapamohu Bratam navat z taho śvietu. I nie spynić, nie strymać jaho ni zdradaju, ni šalmavańniem, ni zabyćciom. Bo heta nie prosta «naš čałaviek». Heta naš Hieroj z tysiačaj tvaraŭ, ci jak najmieńš z 20-ciu, jaki, pačuŭšy pakuty naščadkaŭ, zvaruchnuŭ Haru ŭ miescy na miažy śviatła i ciemry.
Džozef Kempbeł u znakamitym tvory The Hero with a Thousand Faces pisaŭ: «Niaźviedanaje, jakoje dzieści čakaje nas, našmat bolšaje, čym kali-niebudź možna budzie paznać i raspavieści». Pierakanacca ŭ tym dadziena kožnamu. Viadomyja data i miesca: 22.11 u horadzie našaj mary, praz Vostruju bramu jakoha, jak nidzie ŭ inšym miescy, prahladajucca abrysy novaj Biełarusi.
My ŭ pierałomnym momancie historyi, dzie śmierć i žyćcio, naradžeńnie i skon pieraplalisia vuzielčykam pamieram kropki na karcie ŭ dakładna vyznačany pramiežak času: 22.11. Słynnyja papiaredniki, jakija, hadujučy Biełaruś, natchnialisia imiem Hieroja, mahli ab tym tolki maryć. Ale jany pradbačyli, što na kinuty imi zapyt — «Dzie ty, Jaśka, z promniami ŭ vačoch?» — narešcie, budzie dadzieny stanoŭčy adkaz. I što znoŭ, jak toje było nie raz, usie darohi paviaduć u Vilniu, u «naš zrabavany śviet».
Narodny paet Biełarusi Maksim Tank jašče 55 hadoŭ tamu spadziavaŭsia pabačyć na ŭłasnyja vočy choć adnu pylinku prachu Hieroja, kab svajoju kryvioju napaić i ažyvić jaho.
Ale Maksim Tank syšoŭ razam ź Biełaruśsiu, pierapynienaj na razdarožžy historyi ŭ 1995 hodzie. Jon nie zmoža 22.11 być u horadzie našaj mary.
Nie zmoža tam być i Hienadź Kisialoŭ, Uładzimir Karatkievič i inšyja tvorcy, chto prykłaŭsia da paŭstavańnia vobraza našaha Hieroja z tysiačaj tvaraŭ. Nie zmoža być u Vilni i Viktar Syryca, i tysiačy inšych rupliŭcaŭ na nivie biełaruščyny.
Jany adyšli ŭ lepšy śviet zaŭčasna. «I choć adtul nie viartajucca», 22.11 u Vilni my, trymajučy ich imiony u sercy, staniem hanarovaj vartaj dla tych, chto viarnuŭsia i kaho namahalisia pazbavić Biełarusi. Jak prykład dla tych, chto tolki paŭstaje na šlach da Biełarusi i chto jašče tolki nievymoŭna pradčuvaje adkaz na pytańnie: «Kaho lubiš?»
Kamientary