U Maładziečnie supracoŭniki DAI dapamahli ciažarnaj žančynie dabracca da radzilni. A potym jašče pryjechali na vypisku
U RAUS Maładziečna patelefanavaŭ mužčyna i paprasiŭ ab dapamozie. U aŭtamabili jon vioz u radzilniu ciažarnuju žonku z Radaškovičaŭ u Maładziečna. Kali žančyna zrazumieła, što ŭ jaje pačalisia rody, muž i žonka Hanna i Alaksiej Vyhoŭskija nie stali čakać pryjezdu chutkaj dapamohi, a pajechali ŭ radzilniu na asabistaj mašynie, paviedamlaje Rehijanalnaja hazieta sa spasyłkaj na UUS Minabłvykankama.
Kiroŭca źviarnuŭsia da dziažurnaha z prośbaj supravadzić aŭtamabil z paradzichaj u miežach horada. Heta paśla 18.00. U hadzinu pik na darohach vialikija zatory, na maršrucie da radzilni šmat skryžavańniaŭ i śviatłaforaŭ.
Staršy apieratyŭny dziažurny major milicyi Alaksandr Rynkievič nakiravaŭ narad DPS. Kapitany milicyi Jahor Hil i Dźmitry Adamovič sustreli aŭtamabil z paradzichaj na pieršym kole na ŭjeździe ŭ Maładziečna.
Praz uvieś horad ekipaž supravadziŭ mašynu z uklučanymi probliskavymi majačkami.
Žančynu svoječasova dastavili ŭ radzilniu, joj akazali nieabchodnuju dapamohu. Praź niekalki hadzin na liniju 102 pastupiŭ zvanok ad baćki. U siamji Vyhoŭskich naradziłasia dačka Lilija.
Jak pryznalisia inśpiektary DPS, taki vypadak za hady słužby ŭ ich upieršyniu. Pavinšavać baćkoŭ z naradžeńniem dački milicyjanty pryjechali prosta ŭ radzilniu u dzień vypiski žančyny.
Kamientary