Andrej Žuk. Fota Ministerstva abarony Francyi.
2 śniežnia ŭ Paryžy prajšła nacyjanalnaja cyrymonija raźvitańnia ŭ trynaccaćciu vajskoŭcami, jakija zahinuli tydzień tamu ŭ Mali. Apošnija ŭšanavańni zahinułym u časie bajavoj apieracyi addali ŭ Pałacy invalidaŭ, piša Rfi.
U svajoj pramovie prezident Emaniuel Makron padrabiazna raskazaŭ pra kožnaha z zahinuŭšych. Siarod trynaccaci hierojaŭ Francyi — vychadziec ź Biełarusi, staršy siaržant Andrej Žuk, jaki prasłužyŭ 11 hadoŭ u francuzskim Zamiežnym lehijonie.
Zahinułyja — aficery, kaprały i siaržanty, jakija słužyli ŭ 5-m bajavym viertalotnym pałku, 4-m vyviedvalnym motapiachotnym pałku, 93-m horna-artyleryjskim pałku, a taksama ŭ Zamiežnym lehijonie.
«Staršy siaržant Andrej Žuk … Jamu było 43 hady. Biełarus, adzinaccać hadoŭ tamu pastupiŭ na słužbu ŭ Zamiežny lehijon sapioram desantu, jon prajšoŭ uzorny voinski šlach da hornastrałkovaha śpiecnaza. Jon niekalki razoŭ udzielničaŭ u apieracyjach u rehijonie Sachiela. 2-i inžynierny połk Zamiežnaha lehijonu zachavaje pamiać pra hetaha sałdata vyklučnaj advahi. Pamiać pra francuza — nie pa kryvi, uspadkavanaj ad prodkaŭ, a pa pralitaj im kryvi. Jon byŭ baćkam čaćviarych dziaciej. Jon zrabiŭ svoj vybar — baranić našu krainu i našy kaštoŭnaści», — skazaŭ Makron.
U hetyja dni ŭsio francuzskija ŚMI apublikavali aficyjnyja bijahrafii vajskoŭcaŭ, jakija zahinuli ŭ Mali. Pra Andreja Žuka ŭ paviedamleńni Ministerstva abarony Francyi było skazana, što svoj pieršy kantrakt na słužbu ŭ francuzskim Zamiežnym lehijonie jon padpisaŭ 30 studzienia 2008 hoda. Navučańnie na bazie lehijonu ŭ Kastelnadary jon zaviaršyŭ u liku vydatnikaŭ bajavoj padrychtoŭki. U červieni 2008 hoda pastupiŭ na słužbu ŭ 2-i inžynierny połk, raskvataravany ŭ Sen-Krystale.
Žuk nieŭzabavie staŭ instruktaram, a ŭ lutym 2010 hoda atrymaŭ zvańnie kaprała. Da unter-aficerskaha statusu dasłužyŭsia ŭžo ŭ 2011 hodzie, a apošniaje zvańnie staršaha siaržanta (sergent-chef) jamu było prysvojena 1 studzienia 2018 hoda.
U 2016 hodzie prajšoŭ žorstki adbor dla słužby ŭ hornastrałkovych śpiecyjalnych padraździaleńniach. Paśla hoda śpiecpadrychtoŭki, Andrej Žuk pastupiŭ na słužbu ŭ elitnaje padraździaleńnie 27-j hornastrałkovaj bryhady.
Jak paviedamiła Minabarony Francyi, Andrej Žuk ŭdzielničaŭ u troch francuzskich vajskovych apieracyjach za miažoj. Sa śniežnia 2010 hoda pa krasavik 2011 hoda nios słužbu ŭ Afhanistanie (apieracyja «Pamir»). Dvojčy u 2018 hodzie byŭ u šmatmiesiačnych kamandziroŭkach u Mali (apieracyja «Barchany»). Za hady słužby byvaŭ u karotkich kamandziroŭkach u Francuzskaj Hvijanie i na francuzskaj vajskovaj bazie ŭ Džybuci.
Andrej Žuk — kavaler bronzavaha kryža «Za vajskovuju dobleść» (Croix de la Valeur militaire) i niekalkich miedaloŭ.
Tydzień tamu prezident Francyi paviedamiŭ, što 25 listapada ŭ Mali sutyknulisia dva vajskovyja viertaloty. U vyniku katastrofy zahinuli 13 francuzskich vajskoŭcaŭ.
