Zajava Rady HA «BAŽ» z nahody vykarystańnia zakona «Ab supraćdziejańni ekstremizmu»
dziela abmiežavańnia svabody vykazvańnia
Hramadskaje abjadnańnie «Biełaruskaja asacyjacyja žurnalistaŭ» vykazvaje pratest z nahody praciahu vykarystańnia zakona «Ab supraćdziejańni ekstremizmu» dla abmiežavańnia svabody słova.
25 lutaha sud Maskoŭskaha rajona h. Bresta pryznaŭ № 7–8 časopisa «ARCHE-Pačatak» ekstremisckimi materyjałami, jakija padlahajuć źniščeńniu, tym samym zadavoliŭšy zajavu Upraŭleńnia KDB pa Bresckaj vobłaści. Z bolš čym 1000 staronak časopisa ekstremisckimi UKDB paličyła 4 frazy. Ekśpiertyza nie pravodziłasia, sudovaje rašeńnie było vyniesiena na padstavie zaklučeńnia UKDB. Słuchańni prachodzili ŭ zakrytym režymie i doŭžylisia ŭsiaho hadzinu. U zału suda nie dapuścili navat zasnavalnika «ARCHE-Pačatak» Andreja Dyńko. U zakonnuju siłu rašeńnie pakul nie ŭstupiła.
Praces pryznańnia dvuch numaroŭ časopisa ekstremisckimi materyjałami raspačała bresckaja mytnia, jakaja i pieradała časopisy va UKDB. Pa hetkaj ža schiemie raniej raspačynalisia spravy ab pryznańni ekstremisckimi materyjałami infarmacyjnaj pradukcyi ŭ Hrodzienskaj vobłaści. Paśla prypynieńnia sudami tych spraŭ naprykancy minułaha hoda ŭźnikła nadzieja, što zakony ab supraćdziejańni ekstremizmu i teraryzmu pierastanuć vykarystoŭvacca dla abmiežavańnia raspaŭsiudu infarmacyi ŭ krainie. Adnak pakul hetyja čakańni nie spraŭdzilisia.
Ličym praktyku prymianieńnia zakonaŭ ab ekstremiźmie i teraryźmie niedazvalalnym i biespadstaŭnym umiašańniem dziaržaŭnych orhanaŭ u svabodu vykazvańnia, jakaja harantujecca Kanstytucyjaj Respubliki Biełaruś i mižnarodna-pravavymi abaviazkami našaj dziaržavy. Vykazvajem zaniepakojenaść samoj najaŭnaściu sudovych pracesaŭ pa takich faktach - tym bolš va ŭmovach raspačataha dyjałohu pamiž Biełaruśsiu i Jeŭropaj.
Źviartajem ŭvahu na jaŭna pašyralnaje tłumačeńnie Upraŭleńniami KDB zakona «Ab supraćdziejańni ekstremizmu» i vykarystańnie jaho suprać krytyčnych zaŭvah i analityčnaj dumki ŭ krainie. Nahadvajem, što časopis «ARCHE-Pačatak» - adziny biełaruski časopis, zaprošany ŭ jeŭrapiejskuju sietku intelektualnych časopisaŭ «Eurozine».
Zaklikajem kampietentnyja dziaržaŭnyja orhany Respubliki Biełaruś zabiaśpiečyć zachavańnie zakonnaści i vykanańnie mižnarodna-pravavych abaviazkaŭ Respubliki Biełaruś u halinie svabody słova.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym3
Kamientary