U sacyjalnych sietkach mnohich apazicyjnych palitykaŭ naprykancy minułaha tydnia možna było pabačyć zdymki z Hruzii.
To Anatol Labiedźka ź Vitalom Rymašeŭskim sfotkajucca ŭ džyhickim adzieńni, to Alena Anisim zapościć ramantyčnyja zdymki staroha Tbilisi. Što rabiła delehacyja apazicyi ŭ stalicy Hruzii?
8-10 śniežnia ŭ Tbilisi adbyvałasia pasiedžańnie parłamienckaj asamblei «Jeŭranesta». Heta takaja mižparłamienckaja arhanizacyja, jakaja stvoranaja dla zbližeńnia krain, što ŭdzielničajuć va «Uschodnim partniorstvie». Biełaruś nie maje pradstaŭnictva ŭ «Jeŭraneście» praz falsifikacyi vybaraŭ.
Haściami ad Biełarusi na hety raz byli zaprošanyja namieśnik staršyni Partyi BNF Alaksiej Janukievič, palityki Uładzimir Niaklajeŭ i Anatol Labiedźka, staršynia TBM Alena Anisim, pradstaŭnik Ruchu «Za Svabodu» Aleś Siłkoŭ, kiraŭnik «Havary praŭdu» Andrej Dźmitryjeŭ i sustaršynia BCHD Vital Rymašeŭski.
Alaksiej Janukievič raskazaŭ, što ŭ ramkach parłamienckaj asamblei było pasiedžańnie pracoŭnaj hrupy pa Biełarusi, dzie ŭ asnoŭnym abmiarkoŭvalisia niadaŭnija parłamienckija vybary ŭ našaj krainie. «Ja skazaŭ, što hetyja vybary nielha ličyć svabodnymi i demakratyčnymi. Z 250 pradstaŭnikoŭ Partyi BNF va ŭčastkovyja kamisii byli ŭklučanyja tolki piaciora. Naziralniki nie mahli sačyć za padlikam hałasoŭ. Kandydat ad BNF, doktar Vasil Ramanaŭ z Homiela praz svoj udzieł u vybarach byŭ zvolnieny z pracy», — kaža Janukievič.
Na dumku Janukieviča, pakul nierealna havaryć, što ŭ bližejšy čas biełaruski parłamient moža być pradstaŭleny jak raŭnapraŭnaja delehacyja «Jeŭranesta». Toje samaje paćviardžaje i Anatol Labiedźka. «Dziesiać kresłaŭ dla Biełarusi ŭ PA «Jeŭranesta» zastanucca pustymi», — adznačaje jon u fejsbuku.
Kamientary