U Minsku pastavili «jalinki žadańniaŭ» dziaciej, jakija apynulisia ŭ ciažkaj žyćciovaj situacyi. Jany prosiać pra ciopłyja čaraviki, novyja rukavicy i plušavych miadźviedziaŭ. Kožny achvotny moža vykanać maru dziciaci ŭ aŭtacentry Audi abo adnym ź siami handlovych centraŭ.
Dabračynnuju inicyjatyvu pravodzić Čyrvony Kryž. Sutnaść prostaja: u roznych miescach stalicy stajać navahodnija jalinki z cackami ci paštoŭkami ŭ formie aleniania. Na advarotnym baku kožnaj — žadańnie dziciaci, jakoje biez dapamohi nieabyjakavych ludziej naŭrad ci spoŭnicca ŭ Novy hod.
Vialikuju «jalinku žadańniaŭ» upryhožyli ŭ «Audi Centr Minsk». Vykonvać žadańni dziaciej taksama možna ŭ handlovych centrach Galleria Minsk, GreenCity, «Arena-Sici» i «Je-Sici». Padtrymali prajekt u hipiermarkiecie «Hipa», univiersamach «Jeŭraopt» i «Złatahorski». Akramia taho, dobruju spravu možna zrabić u luboj rajonnaj arhanizacyi Biełaruskaha tavarystva Čyrvonaha Kryža.
Maru dziciaci možna ažyćciavić dvuma sposabami: samy prosty — zrabić pieravod, bolš kreatyŭny — kupić padarunak i pakłaści pad jalinku. Čas na heta jość — pa 13 studzienia ŭklučna. Usie rečy i cacki pieradaduć Čyrvonamu Kryžu, a tyja, što pastupiać da 31 śniežnia, patrapiać u miech Dzieda Maroza. Usiaho na «jalinku žadańniaŭ» buduć raźličvać 10 tysiač dziaciej pa ŭsioj krainie.
Žadańni ŭ dziaciej vielmi pryziemlenyja. Adny prosiać ciopłuju adziežu (pažadańni nakštałt «budu rady ciopłym čaravikam» abo «chaču rukavicy, kab nie mierźli ruki»), druhija — lalki i cacki. A mnohim patrebien invientar, kab zajmacca sportam: naprykład, kańki, łyžy, rakietki, kiehli abo rovar. A adna dziaŭčynka paprasiła natatnik z klučom, kab «zapisvać u jaho svaje sakrety».
Ciapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ150
Kamientary