U Minsku ŭ subotu znoŭ pratestavali suprać intehracyi z Rasijaj FOTA, VIDEA
U Minsku 21 śniežnia na Kastryčnickaj płoščy prajšła čarhovaja akcyja suprać intehracyi z Rasijaj. Jana była samaj małakolkasnaj u paraŭnańni z papiarednimi, sabraŭšy kala 250 čałaviek. Hetym razam jana prajšła ŭ inšym farmacie, čym papiarednija akcyi. Arhanizatary admovilisia ad šeścia, a zrabili farmat «volnaha mikrafona», kali kožny moh vystupić pierad prysutnymi.
15:50
Ludzi praśpiavali «Mahutny Boža», Pavieł Sieviaryniec iznoŭ źviartajecca da prysutnych. Akcyja zakančvajecca
15:31
Ludziej pamienieła, mitynh zakančvajecca. Šeścia, pa słovach Sieviarynca, siońnia nie płanujecca
15:20
Na płoščy asabliva ničoha nie adbyvajecca. Chto choča, toj padychodzić da mikrafona i vystupaje. Vystupaje brat lidara Dzianisa Urbanoviča (kiraŭnika «MF») Maksim.
Na płoščy kala 200 čałaviek.
15:05
«Niezaležnaść, niezaležnaść», — hukajuć ludzi.
15:02
Znoŭ vystupaje Pavieł Sieviaryniec, jon kaža, što 26 śniežnia na naradzie kiraŭnikoŭ apazicyi budzie vyrašacca, što rabić dalej z pratestami. Aleś Čacholski dadaje, što treba być hatovym u luby dzień vychodzić na abaronu radzimy.
14:52
Vystupaje adzin z kiraŭnikoŭ KCHP-BNF Aleś Čacholski. Taksama vielmi krytyčna vystupaje suprać intehracyi z Rasijaj.
Za im vystupaje Viačasłaŭ Siŭčyk. Jon kaža: «Ja vieru ŭ biełaruskuju moładź, za joj budučynia»
Siońnia narodu značna mieniej, čym učora i čym 7 śniežnia.
Źjaviŭsia, zdajecca, učorašni «Dzied Maroz». Ludzi kinulisia da jaho, jon adyšoŭ, raicca ź milicyjaj, što rabić.
14:45
Vystupaje hramadskaja aktyvistka Alena Tałstaja.
14:39
Kałonki kala jołki ŭžo rypiać, tak ich na maksimum uklučyli, kab nie było čuvać pramoŭcaŭ
14:36
«Šli b vy dadomu sa svajoj sajuznaj dziaržavaj», — kaža jamu niejki dziadźka. A jon adkazvaje, što Biełaruś pryraście novymi terytoryjami.
14:31
Vielmi šmat moładzi, pryčym ludziej uzrostu da 18 hadoŭ. Jany chavajuć tvary za šalikami, bo supracoŭniki ŭ cyvilnym nachabna ich fatahrafujuć prosta ŭ tvar.
14:27
Ludzi stajać na Kastryčnickaj z boku vulicy Enhielsa. Tam kala 250 čałaviek. Ekśpierty miarkujuć, što nievialikaja kolkaść tłumačycca tym, što ludzi reahujuć na źniešnija padziei. Pakolki ŭčora Łukašenka i Pucin nie damovilisia pa pryncypovych pytańniach, tamu i patreby vychodzić asablivaj niama.
14:20
Sieviaryniec začytaŭ niekalki parahrafaŭ Kanstytucyi, pieradaŭ słova namieśniku staršyni KCHP BNF Jurasiu Bieleńkamu. Jon vielmi pałymiana vystupaje: «Spyniciesia [rabić intehracyju]»
14:15
Ludzi rušyli da levaha boku prystupak Pałaca Respubliki, kab nie zaminać dzieciam z baćkami, što iduć u budynak na śviata. Na akcyi ŭžo kala 200 čałaviek.
Vystupaje Sieviaryniec: «Svabodu Viniarskamu, Afnahielu, palitviaźniam»
14:10
Ludzi śpiavajuć «Pahoniu»
14:10
Pryjšoŭ na płošču Uładzimir Niaklajeŭ. Ludzi pratestujuć suprać źniavahi, kaža jon. Jon dadaje, što jaho šakavali pryznańni Juryja Haraŭskaha, jaki pryznaŭsia ŭ saŭdziele da źniknieńniaŭ Hančara, Krasoŭskaha, Zacharanki.
Taksama dadaje, što pieramovy Łukašenki i Pucina padobnyja da vyprošvańnia padačak. «Nielha brać padački».
Niaklajeŭ u lohkaj kurtcy. «Vam nie chałodna?» — pytajucca žurnalisty. «Heta maja ščaślivaja kurtka», — adkazvaje jon.
14:07
Ludzi družna hukajuć: «Žyvie Biełaruś». Ale na płoščy vielmi hučna hraje dziciačaja muzyka.
14:05
Milicyjant padyšoŭ i kaža, što akcyja niesankcyjanavanaja i treba razyścisia. Jaho sustreli družnym śvistam.
Na płoščy niekalki dziasiatkaŭ čałaviek. Jany ŭ asnoŭnym hurtujucca kala praśpiekta. Niejki mužčyna zaznačaje, što strašna: «Ale što zrobiš, treba ž kamuści baranić niezaležnaść».
14:01
Pavieł Sieviaryniec kaža, što pra płan akcyi budzie skazana paźniej. «Akcyi buduć doŭžycca dalej», — kaža jon. Pavieł adznačaje, što ŭ čaćvier budzie narada kiraŭnikoŭ apazicyi, kab vyrašyć, što dalej rabić. «Budzie mazhavy šturm na niekalki hadzin». Jon vielmi niehatyŭna aceńvaje ŭčorašnija pieramovy Łukašenki i Pucina. «28 padpisanych darožnych kart — heta pahłynańnie Biełarusi», — kaža jon.
13:59
Ludzi pacichu padciahvajucca. Praŭda, niamała ludziej z navušnikami, u cyvilnym, a taksama žurnalistaŭ.
13:55
Na płoščy ŭžo niekalki dziasiatkaŭ čałaviek, niekalki ściahoŭ.
Pryjšli kiraŭniki KCHP BNF Juraś Bieleńki i Aleś Čacholski. Mastak Aleś Maračkin. Kaža, u milicyju nie pajšoŭ pryncypova.
13:50
Na Kastryčnickaj płoščy hraje muzyka, chodziać baćki ź dziećmi: u Pałacy Respubliki i Pałacy prafsajuzaŭ iduć śviatočnyja mierapryjemstvy. Adnak užo padciahvajucca ŭdzielniki pratestu. Pakul ich niekalki čałaviek.
13:45
Na Kastryčnickuju płošču ŭžo pryjšoŭ Pavieł Sieviaryniec. Jon kaža, što akcyju buduć ładzić Deputaty niezaležnaści, a taksama siabry KCHP — BNF.
«Łukašenka ŭ pastcy», — kamientuje Sieviaryniec učorašnija pieramovy Pucina i Łukašenki i zaklikaje rychtavacca da akcyj u śviatočnyja dni.
Papiarednija akcyi prajšli 7 i 8 śniežnia, tady, 7 śniežnia, Łukašenka sustrakaŭsia ŭ Sočy z Pucinym, kab abmierkavać darožnyja akcyi intehracyi. Učora, 20 śniežnia, kali Łukašenka sustrakaŭsia z Pucinym u Pieciarburhu, prajšła čarhovaja akcyja pratestu, pryčym jana była bolš masavaja. Jaje ŭdzielniki, sabrašyŭsia na Kastryčnickaj płoščy, prajšli šeściem da Płoščy Niezaležnaści, a zatym Niamihaj da Zybickaj.
Treba taksama ŭličyć, što napiaredadni akcyi milicyja papiaredziła dziasiatki patencyjnych udzielnikaŭ ab niedapuščalnaści ŭdziełu ŭ mierapryjemstvach, a dziaržSMI razharnuli kontrprapahandu dyskredytacyi.
Kamientary