Sakratarka vybarčaj kamisii padała ŭ sud na niedziaržaŭnaje vydańnie i patrabuje 5000 rubloŭ

U Babrujsku 27 śniežnia prajšoŭ papiaredni razhlad isku suprać internet-vydańnia «Bobrujskij kuŕjer» za nibyta chłuślivy materyjał pra chod daterminovaha hałasavańnia padčas vybaraŭ deputataŭ u Pałatu pradstaŭnikoŭ na adnym z vybarčych učastkaŭ.

Pavialičyć

«Mianie pačali pałaskać u internecie»

Pazoŭ padała byłaja sakratarka Babrujskaj učastkovaj vybarčaj kamisii № 22 Babrujska-Leninskaj vybarčaj akruhi № 78 Julija Furman. Padčas sudovaha pasiadžeńnia jana zajaviła, što materyjał, jaki byŭ raźmieščany na sajcie «Bobrujskij kuŕjer» 15 listapada pad zahałoŭkam «Sakratar učastkovaj kamisii začyniłasia ad naziralnikaŭ sa skryniaj dla hałasavańnia ŭ svaim kabiniecie» nie adpaviadaje rečaisnaści.

U publikacyi adznačałasia, što ŭ adzin ź dzion papiaredniaha hałasavańnia na 22-m učastku ŭ Babrujsku padčas pierapynku z 14.00 da 16.00 sakratarka zastałasia sa skryniaj dla hałasavańnia ŭ kabiniecie, u jaki ŭrešcie začyniła dźviery. U vyniku naziralniki nie mahli bačyć, što adbyvałasia ŭ kabiniecie, a heta, śćviardžajuć jany, možna było vykarystać dla falsifikacyi. 

Pazoŭnica nie asprečvaje, što jana začyniałasia ŭ kabiniecie. Niezadavalnieńnie ŭ jaje vyklikali słovy ŭ materyjale pra toje, što nibyta była vyklikanaja milicyja, jakaja zafiksavała jaje, sakratarki, pravaparušeńnie.

«Heta chłuśnia. Na mianie nie składali nijakich pratakołaŭ, ničoha nie fiksavali, — kazała Furman u sudzie. — Ale z tekstu «Bobrujskoho kuŕjera» vynikaje, što ja parušalnica. Hety materyjał pieradrukavali inšyja resursy, mianie pačali abmiarkoŭvać. U mianie dzicia vučycca ŭ škole, heta i na joj moža skazacca. Mianie pačali pałaskać paŭsiul u internecie. Heta pryniesła mnie maralnyja pakuty».

Admietna, što ŭ tekście «Bobrujskoho kuŕjera» nie było skazana, što na Furman składzieny pratakoł — u tym miescy publikacyi jana naohuł nie zhadvałasia.

Julija Furman śćviardžaje, što vybarčaje zakanadaŭstva jana nie parušała i mieła prava padčas pierapynku zastacca ŭ kabiniecie. 

Što datyčyć vykliku milicyi, Halina Śmirnova, davieranaja asoba kandydata Alaksandra Komara, jaki bałatavaŭsia pa hetaj akruzie, raspaviadaje, što jana nastojvała na tym, kab milicyju paklikali, i što heta jość na aŭdyjozapisie. Śmirnova budzie vystupać jak śviedka na nastupnym pasiadžeńni.  

Julija Furman patrabuje publikacyi aficyjnaha abviaržeńnia, a taksama BYN 5000 — jak kampiensacyju maralnaj škody.

Try z pałovaj hadziny sud razhladaŭ pazoŭ da haziety, jakoj nie isnuje

Julija Furman padała pazoŭ da redakcyi haziety «Bobrujskij kuŕjer», z razhladu jakoha i pačałosia papiaredniaje słuchańnie spravy. Pradstaŭnik sajta «Bobrujskoho kuŕjera», indyvidualny pradprymalnik i ŭłaśnik damiena babruysk.by Vital Sanacienka, zajaviŭ, što pazoŭ padadzieny da jurydyčnaj asoby, jakaja ŭžo nie isnuje.

Hazieta «Bobrujskij kuŕjer» nie vychodzić užo dzieviać hadoŭ, firma, jakaja była jaje zasnavalnicaj, była likvidavanaja ŭ 2018 hodzie. Pierastaŭ isnavać i jurydyčny adras, na jaki Julija Furman nakiravała zvarot. Ciapier pracuje tolki internet-vydańnie «Bobrujskij kuŕjer» na damienie babruysk.by.

Tolki praz try z pałovaj hadziny razhladu spravy sudździa pastanaviła źmianić adkazčyka z redakcyi haziety «Bobrujskij kuŕjer» na IP Sanacienka V. A.

Ułaśnik sajta babruysk.by śćviardžaŭ u sudzie, što nie moža vykanać patrabavańnie pazoŭnicy i apublikavać abviaržeńnie, bo ŭsio, što napisana, adpaviadaje rečaisnaści, i heta mohuć paćvierdzić śviedki.

Nastupnaje pasiadžeńnie adbudziecca ŭ sudzie Babrujskaha rajona i Babrujska 16 studzienia.

• 0
• 0
• 0
• 0
• 0
• 0