Biełaruś i Rasija znajšli časovy — na pieryjad viadzieńnia pieramovaŭ — varyjant adnaŭleńnia pastavak nafty na naftapierapracoŭčyja zavody Biełarusi za košt razavych partyj nafty z resursaŭ niezaležnych pastaŭščykoŭ. Rasija raźličvaje finalizavać adpaviednaje pahadnieńnie ŭžo ŭ bližejšy čas, paviedamiła tass.ru krynica va ŭradavych kołach Rasii.
«Biełaruskim bokam byŭ taksama prapanavany varyjant razavaj pastaŭki nafty z resursaŭ niezaležnych pastaŭščykoŭ z metaj pavieličeńnia zapasaŭ syraviny na NPZ na čas praviadzieńnia pieramoŭ. Hety varyjant apieratyŭna prapracoŭvajecca, raźličvajem na finalizacyju damoŭlenaściej pa im u bližejšy čas», - skazaŭ surazmoŭca ahienctva.
Siońnia stała viadoma, što ad 1 studzienia Rasija spyniła pastaŭku nafty dla biełaruskich naftapierapracoŭčych zavodaŭ.
NPZ pracujuć sa źnižanaj zahruzkaj na reštkach syraviny, što byli nazapašanyja ŭ śniežni. Novyja kantrakty na pastaŭku nafty pakul nie padpisanyja.
Nahadajem, što 31 śniežnia pres-sakratar prezidenta Rasii, adkazvajučy na pytańni žurnalistaŭ, prapanavaŭ u adnosinach ź Biełaruśsiu «apakaliptyčnyja scenary» nie abmiarkoŭvać — «pakul».
U svaju čarhu, Alaksandr Łukašenka 31 śniežnia daŭ zahad uradu zabiaśpiečyć ŭžo ŭ najbližejšyja dni pastaŭku nafty z alternatyŭnych krynic. Pierš za ŭsio razmova idzie ab pastaŭkach čyhunačnym transpartam z partoŭ na Bałtycy, a taksama ab zadziejničańni dla alternatyŭnych pastavak naftapravoda «Družba».
Pry hetym, jak stała viadoma, kiraŭnik «Hazproma» Alaksiej Miler i pasoł Biełarusi ŭ Rasii Uładzimir Siamaška padpisali pratokoł pra ceny na haz dla Biełarusi tolki na studzień i luty 2020 hoda. U hetyja dva miesiacy cana dla Biełarusi zastaniecca na raniejšym uzroŭni — $127 za tysiaču kubamietraŭ.
Rasija trymajecca raniejšaj taktyki: trymać krainy na maksimalna karotkich kantraktach na pastaŭki enierhanośbitaŭ. U vypadku krain-satelitaŭ, kantrakty abumoŭlivajucca taksama šeraham palityčnych umoŭ.