U Minsku chutka zapracuje dadatak dla paraŭnańnia cen na pradukty ŭ kramach
Raspracoŭka biełaruskaj kamandy dazvolić sa smartfona adsočvać ceny na pradukty i vybirać kramy, u jakich jany tańniejšyja. Padobnyja servisy ŭ ZŠA, Kanadzie, Francyi i Ispanii dazvalajuć ekanomić na pakupkach minimum čverć biudžetu.
Biełaruski servis atrymaje nazvu InfoPrice i źbiare razam aktualnyja ceny na dziasiatki tysiač najmieńniaŭ tavaraŭ. Raspracoŭščyki nie abmiažujucca praduktami charčavańnia, a źbirajucca aličbavać uvieś asartymient rytejleraŭ. Tym samym možna budzie supastavić ceny na luby tavar, ale ŭ roznych sietkach. A kali z dapamohaj mieniu sabrać košyk praduktaŭ, to sistema paraŭnaje ahulnyja čeki i padkaža, jakija tavary i ŭ jakich miescach kaštujuć tańniej za ŭsio.
Karystacca servisam možna budzie biaspłatna. Pieršy čas jon budzie pakazvać ceny ŭ kramach Minska, ale paźniej zapracuje i ŭ rehijonach. Sistemu možna naładzić «pad siabie»: skažam, kali kala doma pracujuć tolki dźvie handlovyja sietki, to možna naładzić pošuk najlepšych cenaŭ tolki siarod ich. Pad kožnym tavaram buduć paznačany miescy i daty fiksacyi jaho cany.
Ceny na tavary budzie štodnia źbirać kamanda «tajemnych pakupnikoŭ». I tut asnoŭnaje nou-chau — u sposabie zboru infarmacyi: dla prajekta stvorana pryłada i napisana prahrama, jakija dazvolać aŭtamatyčna sčytvać štrychkody i zahružać źviestki ŭ bazu dadzienych. Uručnuju zastaniecca tolki ŭvieści biahučuju canu. Pieršymi płanujuć admanitoryć bujnyja abjekty — supiermarkiety i hipiermarkiety, — tamu što ceny ŭ ich, jak praviła, nižejšyja.
Servis płanujuć zapuścić užo ŭ lutym. Pieršy čas paraŭnoŭvać ceny na tavary možna budzie tolki na partale. A ŭžo praź miesiac źjavicca i mabilny dadatak.
Raspracoŭščyki zapeŭnivajuć, što z samaha pačatku zojmuć niezaležnuju pazicyju i buduć vyvučać asartymient kožnaj sietki adnolkava skrupulozna. Ale rytejlery zmohuć svabodna dzialicca dadzienymi, kab nie čakać, pakul aktualnyja źviestki źjaviacca ŭ sistemie.
«Biełaruski servis budzie šmat u čym unikalnym, choć padobnyja dadatki pracujuć u ZŠA, Kanadzie i niekatorych krainach Jeŭropy. U SND taksama byli sproby zapuścić takija prajekty, ale ich aŭtary raźličvali na atrymańnie infarmacyi ad pakupnikoŭ, što i akazałasia achilesavaj piatoj. My ž vałodajem ułasnym štatam, jaki budzie pastajanna adsočvać ceny na ŭsie tavary ŭ roznych rytejleraŭ», — tłumačyć inicyjatar prajekta InfoPrice Raman Andruchoŭ.
Pavodle jaho słoŭ, tolki nad raspracoŭkaj pryłady kamanda pracavała bolš za try miesiacy. Jana dazvolić źbirać infarmacyju ŭ kramach u razy chutčej, čym heta robiać hłabalnyja kampanii-vymiaralniki.
Servis dapamoža jak pakupnikam, tak i rytejleram. Jany, u pryvatnaści, zmohuć apieratyŭna atrymlivać infarmacyju pa inšych sietkach, kab svoječasova reahavać i ŭstaloŭvać kankurentnyja ceny. Toje ž samaje tyčycca vytvorcaŭ i pastaŭščykoŭ tavaraŭ.
Siarod opcyj «na budučyniu» — mahčymaść skanavać štrychkody, pierš čym kupić. Płanujecca, što dadatak mamientalna pakaža ŭsie ceny na abrany tavar u roznych sietkach. A heta ŭ svaju čarhu dapamoža vyznačycca: kuplać pradukt na miescy abo iści ŭ kramu praz darohu.
Ciapier čytajuć
«Jany čamuści dumajuć, što ich zaraz zhvałciać». Prapahanda kinułasia tušyć abureńnie biełarusaŭ 150 tysiačami pakistancaŭ19
Kamientary