Biełaruska va Uchani: Troje sutak nie vychodžu z doma
Ježu pryvoziać kurjery, usim rajać nie vychodzić u hramadskija miescy. My raspytali biełarusku ŭ zakrytym na karancin Uchani, jak tam zaścierahajucca ad karanavirusa, piša Radyjo Svaboda.
Biełaruska Kryścina žyvie ŭ 11-miljonnym kitajskim Uchani, jaki ciapier zakryli na karancin z pryčyny epidemii karanavirusa. Jana raskazvaje, što ŭžo troje sutak nie vychodzić z doma, kab nie zarazicca.
«Horad zakryli dla ŭjezdu i vyjezdu. Usie sposaby pierasoŭvańnia zabłakavanyja. Ja pazaŭčora vychodziła na vulicu, kab zabrać u kurjera zamoŭlenuju sadavinu, dyk nie sustreła nivodnaha čałavieka ŭ navakolli. A heta 7 hadzinaŭ viečara», — kaža Kryścina.
Dziaŭčyna kaža, što ŭłady nastojliva rekamiendujuć paźbiahać hramadskich miescaŭ.
«Ale ŭ Kitai luboje miesca hramadskaje, — kaža jana. Možna vyjści prosta pa vadu i sustreć u adnym miescy 30 čałaviek. Ciapier heta, biezumoŭna, niebiaśpiečna».
Kab zaścierahčysia ad virusa, ludzi nosiać maski. Kryścina kaža, što ich u aptekach chapaje, chacia ŭdakładniaje, što abyšła 5 aptek, kab nabyć patrebnuju.
«Zvyčajnyja maski nie dapamahajuć. Patrebny admysłovyja, sa ščylnaha vałakna № 95. Voś ich nierealna znajści. Ja zamaŭlała praź internet», — tłumačyć Kryścina.
«Nivodzin vid transpartu nie pracuje: ni mietro, ni aŭtobusy, ni taksi. Ničoha, — kaža biełaruska. — Škoły zakrytyja, pałova kramaŭ taksama nie pracuje. Dziaržaŭnyja ŭstanovy zakrytyja. Pracujuć tolki špitali i kliniki».
«Ciapier pa hučnaj suviazi abviaścili, što buduć ź viertalota raspylać chimikaty nad horadam ad virusa. I lepš nie źjaŭlacca na vulicy z troch da dzieviaci hadzin viečara», — apaviadaje Kryścina. Ale dadaje, što miarkuje, i paśla dzieviaci budzie niebiaśpiečna hetym dychać.
«Mahu skazać, što ludzi napałochanyja, panika jość navat siarod miascovych», — sama dziaŭčyna kaža, što da apošniaha starałasia nie paddavacca emocyjam i razvažliva hladzieć na abstaviny.
«Ale dzień tamu ŭ mianie była žudasnaja panika. Ad biezvychodnaści, — apisvaje dziaŭčyna toje, što adčuvaje. — Vyjechać niemahčyma. I vializnaja ryzyka zachvareć mienavita na vakzałach, u aeraportach»
Ciapier, kaža Kryścina, jana zrazumieła, što situacyju źmianić nie moža.
«Adzinaje, što ja mahu zrabić, — heta pakłapacicca pra siabie i zrabić usio mahčymaje, kab nie zachvareć, — kaža Kryścina. — Pakul vychadu ź situacyi niama. Zastajecca tolki čakać i vieryć u lepšaje».
Kamientary