Dva hady tamu asudžany za dziejańni seksualnaha charaktaru ź niepaŭnaletnimi Viačasłaŭ Davydovič vyjšaŭ na volu. A ŭ vieraśni 2019 hoda administracyja Centralnaha rajona Minska dała jamu dazvoł na «raźmiaščeńnie tancavalna-spartyŭnaj lihi», piša Tut.by.
Dzieci stali zajmacca tancami ŭ katedžy pa adrasie Mikałajeŭskaja, 9 u Zacani, kudy da Davydoviča kaliści pryjazdžali chłopčyki ź Jastrambielskaj škoły-internata.
Viačasłaŭ Davydovič vučyŭsia ŭ Akademii MUS, pracavaŭ milicyjantam, kadravym supracoŭnikam u Administracyi prezidenta. A potym zasnavaŭ mižnarodnuju dabračynnuju hramadskuju arhanizacyju «U dapamohu dzieciam-sirotam». Jakoj była heta «dapamoha», paśla raźbiraŭsia sud. Fota Siarhieja Hudzilina
Čytajcie. Navošta «surjoznyja dziadźki» zavablivali niepaŭnaletnich chłopčykaŭ u katedž u pasiołku Zacań?
«Viačasłava Davydoviča ŭ svoj čas viedali mnohija ludzi, była navat razmova, kab zrabić jaho staršynioj fiederacyi pa tancach. A pakolki ja čałaviek, jaki ŭsio žyćcio zajmajecca tancami, jaho asabistaje žyćcio nie cikaviła. Historyju, źviazanuju z sudom, viedała paviarchoŭna, i nie było času ŭ jaje ŭnikać. Tym bolš što Davydovič pierakonvaŭ usich, što nievinavaty, jon sam achviara, — raspaviadaje staršynia tancavalna-spartyŭnaj lihi Ludmiła.
Nahadajem, u 2014 hodzie sud Centralnaha rajona Minska pryznaŭ Viačasłava Davydoviča vinavatym pa č. 2 art. 233 Kryminalnaha kodeksa (pradprymalnickaja dziejnaść biez rehistracyi z atrymańniem dachodu ŭ asabliva bujnym pamiery) i pryhavaryŭ da čatyroch hadoŭ pazbaŭleńnia voli. Pakul jon adbyvaŭ pakarańnie, u dačynieńni da Davydaviča stali rasśledavać jašče adnu kryminalnaja sprava — «inšyja dziejańni seksualnaha charaktaru z asobaj, jakaja nie dasiahnuła šasnaccacihadovaha ŭzrostu». Hety praces prachodziŭ za zakrytymi dźviaryma. Jaho asudzili na piać hadoŭ pazbaŭleńnia voli, zaličyŭsia termin za papiaredniuju sudzimaść, i u 2018 hodzie Davydovič vyzvaliŭsia.
«Z Davydovičam damovilisia: my robim ramont na pieršym paviersie ŭ jahonym katedžy, a dalej vykarystoŭvajem heta pamiaškańnie pad tancavalna-spartyŭnuju lihu, — Ludmiła pakazvaje fota i videa taho, jak vyhladała pamiaškańnie da ramontu i ciapier. — U domie, jaki vyklikaje drennyja asacyjacyi, chacieli zrabić niešta dobraje. Dla mianie było važna, kab u dziaciej byli ŭsie ŭmovy dla zaniatkaŭ tancami. Ramont kaštavaŭ kala 40 tysiač rubloŭ, i ź Viačasłavam Ivanavičam zaklučali damovu ab biazvypłatnym karystańni žyłym pamiaškańniem. Heta značyć, nijakaj płaty za arendu.
U tancavalna-spartyŭnaj lizie zajmajucca dzieci ad 4 da 9 hadoŭ, zaniatki — dvojčy na tydzień.
Na praktycy heta vyhladała tak: pieršy pavierch vialikaha katedža byŭ addadzieny hramadskaj arhanizacyi, astatnija pavierchi zajmaje haspadar Viačasłaŭ Davydovič.
Toj samy katedž pa adrasie Mikałajeŭskaja, 9
Jak vynikaje z dakumientaŭ, 24 vieraśnia 2019 hoda administracyja Centralnaha rajona Minska ŭzhadniła «vykarystańnie nie pa pryznačeńni častki doma dla raźmiaščeńnia tancavalna-spartyŭnaj lihi».
«Škoła adkryłasia 1 kastryčnika, a praz 15 dzion adbyŭsia pieršy kanflikt. Davydovič staŭ adklučać śviatło na pieršym paviersie, patrabavać apłatu kamunalnych pasłuh. 4 lutaha pryjšłosia navat vyklikać milicyju: u našaj tancavalnaj zale byli staronnija ludzi, Viačasłaŭ Ivanavič pačaŭ vyhaniać dziaciej, mianie. I heta niahledziačy na najaŭnaść damovy, zaklučanaj na 5 hadoŭ! U instahramie idzie rekłama kłubnaha doma, što raźmiaščajecca pa adrasie katedža, tam paznačana, što ŭ kłubie jość sapraŭdny kamin i balnaja zała. Ale heta ž naša pamiaškańnie! Kamin raźmieščany tolki na pieršym paviersie», — adznačaje Ludmiła.
Zaduma «zrabić dobraje i karysnaje» skončyłasia tym, što staršynia rady lihi ŭžo schadziła na pryjom u administracyju rajona, ŽREA i rychtuje pazoŭ u sud. U čaćvier, 6 lutaha, zaniatkaŭ užo nie było.
«My jašče znachodzimsia ŭ razhublenaści. Zaniatki pravodzić niemahčyma, a ŭ damovie ŭkazany tolki adzin punkt, pa jakim jon moža być skasavany: kali dom budzie adčužany. Tady nas pavinny apaviaścić za miesiac. Budziem źviartacca ŭ sud», — zaklučaje Ludmiła.
Zaraz katedž u Zacani vystaŭleny na prodaž za 5 440 500 rubloŭ.
Vyjšaŭ z turmy i što dalej? Ci sočyć niechta za tymi, chto apynuŭsia na voli?
Va ŭsioj hetaj historyi ŭźnikaje pytańnie: ci moža ŭ domie čałavieka, jaki byŭ asudžany pa takim artykule (art. 168 KK Pałavyja znosiny i inšyja dziejańni seksualnaha charaktaru z asobaj, jakaja nie dasiahnuła šasnaccacihadovaha ŭzrostu), być adkryta škoła ci hurtok dla dziaciej?
U administracyi Centralnaha rajona Minska admovilisia ad kamientaroŭ. Jak daviedaŭsia TUT.BY, pry atrymańni takoha dazvołu minułaje čałavieka nie praviarajecca, hałoŭnaje, kab pakiet dakumientaŭ byŭ u paradku.
Naprykład, u ZŠA paśla vyzvaleńnia z turmy čałaviek, jaki ŭstupaŭ u intymnyja adnosiny ź niepaŭnaletnimi, nie maje prava žyć kala škoł, dziciačych sadoŭ, paliklinik. Taksama jon abaviazany nasić elektronny branzalet, jaki adsočvaje kožny krok, rehularna adznačacca ŭ palicyi, naviedvać psichołaha. U niekatorych krainach praduhledžanaja chimičnaja kastracyja, jość adkrytaja baza asudžanych za piedafiliju. Što tyčycca Biełarusi, to prymusić da čahości paśla turmy čałavieka niemahčyma, tolki kali jon sam nie źvierniecca da śpiecyjalistaŭ pa dapamohu. Tady jamu mohuć vypisać leki abo pryznačyć kurs psichaterapii.
Akramia taho, isnuje zabarona: tyja, chto byŭ asudžany za złačynstvy suprać pałavoj niedatykalnaści, nie mohuć być piedahohami, pracavać na miescach, jakija praduhledžvajuć pastajanny kantakt ź dziećmi (art. 27 zakona RB «Ab pravach dziciaci»). Pytańnie ŭ tym, chto heta praviaraje i kantraluje.
Taksama ŭ Kryminalnym kodeksie (art. 80) havorycca, što paśla vyzvaleńnia z kałonii za niekatorymi ustaloŭvajecca previentyŭny nahlad. Meta — nie dapuścić novych złačynstvaŭ. Na jaki termin za vyzvalenym budzie ŭstalavany taki nahlad, vyznačaje sud.
«U ciapierašni momant Davydovič na ŭliku nie staić», — prakamientavała aficyjny pradstaŭnik HUUS Minharvykankama Natalla Hanusievič.
Paciarpieły pa rezanansnaj «spravie piedafiłaŭ» adsudziŭ u Davydoviča 20 tysiač kampiensacyi
Sud patłumačyŭ, čamu pakarańnie Davydoviču takoje miakkaje
