kremlin.ru
Prezidenty Rasii i Biełarusi abmiarkoŭvali ŭ chodzie telefonnaj razmovy pytańni pastaŭki nafty, adnak dyjałoh praciahvajecca, zajaviŭ aficyjny pradstaŭnik Kramla Dźmitryj Piaskoŭ, kamientujučy słovy Alaksandra Łukašenki ab «niečakanaj prapanovie» Uładzimira Pucina kampiensavać Minsku 300 miljonaŭ dalaraŭ. Pra heta paviedamlaje TASS.
Rasija i Biełaruś praciahnuć pracu pa rašeńni pytańniaŭ z pastaŭkami nafty, paviedamiŭ žurnalistam u piatnicu pres-sakratar prezidenta RF Dźmitryj Piaskoŭ. Jon admoviŭsia kazać pra detali, ale padkreśliŭ, što «kožny bok robić svaju ŭłasnuju kalkulacyju».
Pradstaŭnik Kramla paćvierdziŭ, što padčas siońniašniaj telefonnaj razmovy prezidentaŭ RF i Biełarusi — Uładzimira Pucina i Alaksandra Łukašenki — «abmiarkoŭvalisia roznyja pytańni, źviazanyja z pastaŭkami rasijskaj nafty, z canoj».
«Pastaŭki ažyćciaŭlaje nie rasijskaja dziaržava, a ažyćciaŭlajuć rasijskija naftavyja kampanii», — padkreśliŭ Piaskoŭ. Pavodle jaho słoŭ, u čaćvier namieśnik kiraŭnika administracyi prezidenta Dźmitryj Kozak pravioŭ naradu, kab «zrazumieć pazicyju naftavych kampanij adnosna cenaŭ, pa jakich jany chočuć pradavać svaju naftu biełaruskim tavaryšam».
«Roznyja naftavyja kampanii vykazvali svaje pazicyi adnosna mahčymych cen, źnižak. Naturalna, nie moža iści i havorki pra toje, kab niechta hetym kampanijam naviazvaŭ niejkija niavyhadnyja ŭmovy, jakija nie adpaviadali b i rasijskaj, i mižnarodnaj cenavaj kanjunktury», — zajaviŭ pres-sakratar rasijskaha lidara.
Jon pryznaŭsia, što nie moža «pieradać niuansy» abmierkavańnia Pucinym i Łukašenkam naftavaj temy. «Hruntujučysia na abmierkavańni, kožny bok robić svaje ŭłasnyja kalkulacyi», — adznačyŭ Piaskoŭ. «Praca budzie praciahnutaja, sapraŭdy dadziena daručeńnie ŭradu Biełarusi praciahnuć kantakty z našymi i kampanijami, i z pradstaŭnikami rasijskaha boku», — skazaŭ pradstaŭnik Kramla.
Havorka pra kampiensacyju ź biudžetu naftavym kampanijam RF u vypadku pastavak nafty ŭ Biełaruś pa źnižanaj canie pakul nie idzie. «Isnujuć roznyja pazicyi bakoŭ, jany abmiarkoŭvajucca», — zajaviŭ Piaskoŭ.
Łukašenka: Pucin prapanavaŭ pa nafcie zachavać finansavy ŭzrovień minułaha hoda
