Brytancy, jakija siońnia zapłaciać za pakupku 20-funtavaj kupiuraj, mohuć raźličvać, što nieŭzabavie jana pieratvorycca ŭ kampost. Bank Anhlii prystupiŭ da ŭtylizacyi starych banknot naminałam u 20 funtaŭ, jakija nieŭzabavie buduć zamienienyja kupiurami novaha ŭzoru, vyrablenymi z palimiernych materyjałaŭ. Starych dvaccatak u abaračeńni ŭ Brytanii zastavałasia na 40 młrd funtaŭ, piša BBC.
Miarkujecca, što 2 młrd banknotaŭ buduć utylizavanyja i pieratvoranyja ŭ kampost, jaki dapamoža ŭhnojvać sielskahaspadarčyja ŭhodździ.
Zamiena dvuch miljardaŭ 20-funtavych kupiur stanie najbujniejšaj padobnaj praceduraj u brytanskaj historyi.
Staryja banknoty naminałam u 20 funtaŭ z partretam ekanamista Adama Śmita vyvodziacca z abaračeńnia. Heta aznačaje, što kupiury, jakija adpraŭlajuć u banki roznyja kramy, nie buduć vykarystoŭvacca znoŭ.
Praces zamieny banknot raściahniecca na niekalki miesiacaŭ, i, kali dastatkovaja ich kolkaść budzie ŭtylizavana, Bank Anhlii za paŭhoda apaviaścić publiku, što treba zdać dvaccatki, jakija zastalisia na rukach.
Da 1990 hoda Bank Anhlii adbiraŭ svaje staryja banknoty i spalvaŭ ich u piečy, takim čynam apalvajučy svoj budynak u samym centry łondanskaha Sici.
Ciapier, prymajučy sastarełyja hrošy ŭ pačkach pa 50 tysiač, Bank Anhlii pieratvaraje ich va ŭhnajeńni.
