Były pavierany ŭ polskaj ambasadzie ŭ Minsku Vitald Juraš apublikavaŭ artykuł, u jakim u čarhovy raz raskrytykavaŭ ciapierašniuju źniešniuju palityku Polščy ŭ adnosinach da Biełarusi. Hałoŭnymi vinoŭnikami adsutnaści narmalnaha dyjałohu z aficyjnym Minskam Juraš nazvaŭ polskuju raźviedku, kiraŭnicu telekanała Biełsat, a taksama niekatorych supracoŭnikaŭ polskaha Instytuta nacyjanalnaj pamiaci.
Artykuł Vitalda Juraša apublikavaŭ papularny polski partał Onet.pl.
Były dypłamat nazvaŭ marš «vyklatych žaŭnieraŭ», jaki adbyŭsia ŭ Hajnaŭcy, centry biełaruskaj mienšaści ŭ Polščy, vidavočnaj pravakacyjaj. I biez taho drennyja polska-biełaruskija adnosiny atrymali novaje prablemnaje pytańnie.
Vitald Juraš adznačaje, što apałahiety Ramualda Rajsa «Buraha», adnaho z «vyklatych žaŭnieraŭ», adkaznaha za zabojstva biełaruskaha nasielnictva na Padlaššy, znajšli svaich chaŭruśnikaŭ u polskim Instytucie nacyjanalnaj pamiaci — dziaržaŭnaj arhanizacyi, jakaja ciapier znachodzicca pad kantrolem kirujučaj partyi «Prava i spraviadlivaść». Juraš u svaim artykule krytykuje dziejnaść Instytuta, u jakim niekatoryja supracoŭniki sprabujuć abialić «Buraha». Na jaho dumku, padobnyja dziejańni psujuć biełaruska-polskija stasunki, pryčym sproby reabilitacyi «Buraha» razdražniajuć nie tolki aficyjny Minsk, ale i biełaruskuju demakratyčnuju apazicyju.
Na pačatku praŭleńnia prava-kansiervatyŭnaj partyi «Prava i spraviadlivaść» pasprabavaŭ vieści dyjałoh ź Biełaruśsiu tahačasny kiraŭnik polskaj dypłamatyi Vitald Vaščykoŭski. Juraš sa spasyłkaj na ananimnyja krynicy piša, što asoby, jakija ŭpłyvali na pryniaćcie źniešniepalityčnych rašeńniaŭ Polščy, byli suprać sprob dyjałohu ź Minskam, i palityku Vaščykoŭskaha prosta sabatavali. U strukturach, adkaznych za ŭschodniuju palityku Polščy, pracavali tyja ž samyja ludzi, što farmiravali źniešniuju palityku Polščy i pry minułych uradach, tamu jany byli suprać dyjałohu.
Taksama suprać sprob dyjałohu ź Minskam vystupali i polskija śpiecsłužby, piša były polski dypłamat. Juraš adznačaje, što śpiecsłužby tut šmat na siabie ŭziali, bo raźviedka i kontrraźviedka pavinny zajmacca zboram infarmacyi, jaje analizam i baraćboj z zamiežnymi ahientami, a nie farmiravać źniešniuju palityku dziaržavy.
Śpiecsłužby, jakija zachacieli dziejničać u nieŭłaścivaj dla ich roli, mieli ambicyi hienieravać źniešniuju palityku Polščy i ŭpłyvać na kadravyja pytańni. Jany nie bačyli pierśpiektyŭ u dyjałohu z aficyjnym Minskam, a tolki adčuvali pahrozu ad novaha kursu, miarkuje Juraš.
Značnuju rolu ŭ farmiravańni polskaj palityki adnosna Biełarusi taksama adyhrała kiraŭnik telekanała «Biełsat» Ahnieška Ramašeŭskaja, miarkuje Vitald Juraš. Jana, piša jon u artykule, nibyta taksama tarpieduje dyjałoh Minska i Varšavy.
«Jak i ŭ vypadku z raźviedkaj i kontrraźviedkaj, jakija zajmajucca tym, čym nie pavinny zajmacca, Ahnieška Ramašeŭskaja nie abmiažoŭvałasia kiravańniem daručanaha joj telekanała i aktyŭna ŭdzielničała ŭ tvareńni źniešniaj palityki na biełaruskim kirunku» — piša były polski dypłamat.
Niadaŭna eks-kiraŭnik polskaha MZS Vitald Vaščykoŭski napisaŭ u tvitary, što Ramašeŭskaja «zaŭziaty apanient usich kantaktaŭ» ź Minskam.
Były pavierany ŭ polskaj ambasadzie ŭ Minsku piša, što ŭ ekanomicy situacyja jašče horšaja, čym u palitycy: Polšča ničoha nie mahła i nie moža prapanavać Biełarusi. Polskija firmy nie vielmi aktyŭnyja ŭ Biełarusi, tamu aficyjny Minsk nikoli nie vieryŭ, što Varšava hatovaja da realnaha dyjałohu.
Jašče adna prablema, ź jakoj sutyknuŭsia eks-kiraŭnik polskaj dypłamatyi Vaščykoŭski, kali chacieŭ naładzić dyjałoh ź Minskam, była pazicyja Jarasłava Kačyńskaha. Kiraŭnik kirujučaj partyi «Prava i spraviadlivaść» byŭ bolš sfakusavany na ŭnutranaj palitycy — źniešniaja palityka Kačyńskaha (u tym liku na biełaruskim kirunku) nie cikaviła.
Były polski dypłamat piša, što jość 2 varyjanty adnosin ź Biełaruśsiu. Pieršy — dyjałoh i pašyreńnie pola dla manieŭru dla Biełarusi va ŭmovach rasijskaha cisku, druhi — pryznańnie Biełarusi de-fakta satelitam Rasii i «baraćba za demakratyju».
Juraš piša, što mienavita za druhi varyjant vystupiŭ u svaim artykule były pasoł Polščy ŭ Biełarusi Lešak Šarepka.
Čytajcie taksama: «Jaki harant, takaja i dziaržaŭnaść». Były pasoł Polščy ŭ Biełarusi ličyć, što naftavy kanflikt zakončycca jak i ŭ 2010-m
Juraš raskrytykavaŭ taki padychod, bo, jak jon piša, demakratyja ŭ Biełarusi ŭ najbližejšaj pierśpiektyvie małavierahodnaja na dumku samich ža demakrataŭ, a na miesca Łukašenki moža pryjści jašče bolš prarasijski kiraŭnik Biełarusi.
«ZŠA, Jeŭrasajuz, Hiermanija i navat Kitaj na biełaruskuju rečaisnaść hladziać zusim pa-inšamu. Bolšaść zachodnich krain, jakija bačać pahrozu z boku Rasii dla niezaležnaści Biełarusi, imknucca da dyjałohu z režymam Alaksandra Łukašenki», — piša były polski dypłamat.
Juraš piša, što ciapierašniaja niezaležnaść Biełarusi, chaj navat i abmiežavanaja, maje vyrašalnaje značeńnie dla biaśpieki Polščy.
Były pavierany miarkuje, što biełaruskaje vojska, navat kali jano intehravanaje z rasijskaj armijaj, našmat lepšaje dla Polščy, čym sama rasijskaja armija na terytoryi Biełarusi. Mahčymaje źjaŭleńnie rasijskaha vojska na terytoryi Biełarusi ŭskładniła b pazicyi Ukrainy, piša Juraš.
Były polski dypłamat padsumoŭvaje, što kiepskija polska-biełaruskija adnosiny tolki na ruku Maskvie, a sabataž dyjałohu ź Minskam treba razhladać jak hłupstva albo akt zdrady.
Vitald Juraš miarkuje, što polskaja palityka ŭ adnosinach da Biełarusi moža źmianicca, kali źmienicca padychod ZŠA.
«Kali b ZŠA źmianili padychod da Biełarusi, nichto ŭ Varšavie nie advažyŭsia b vieści inšuju palityku», — piša były dypłamat.
Kamientary