Treci vypadak karanavirusa padazrajuć u viciebskaj dyzajnierki
Treci vypadak karanavirusa ŭ Biełarusi byŭ znojdzieny ŭ Viciebsku ŭ dyzajnierki Taćciany Jafremavaj, jakaja ŭ kancy lutaha pa pracy była na vystavie ŭ Miłanie. Nijakich skarhaŭ na zdaroŭje ŭ pacyjentki nie było, ale jaje pravieryli, jak ciapier praviarajuć usich turystaŭ, što prybyli ź Italii, i zapadozryli karanavirus. Taćciana paviedamiła Tut.by, što ŭ jaje stan lohkaj prastudy. Jana lažyć u boksie infiekcyjnaj balnicy, muž i čaćviora dziaciej — u susiedstvie.
Taćciana Jafremava raspaviała, što ŭ jaje nie było vysokaj tempieratury ci inšych prykmiet virusnaha zachvorvańnia. 20 lutaha jana vylecieła ź Minska ŭ Miłan razam ź jašče dvuma dyzajnierami, taksama supracoŭnikami Viciebskaha futrovaha kambinata, kab trapić na vystavu. Viarnułasia 23 lutaha praz Varšavu.
Taćcianie patelefanavali z sanepidsłužby, paprasili prajści test u infiekcyjnaj balnicy. 29 lutaha jana prajšła abśledavańnie, i jaje špitalizavali jašče da vynikaŭ testu: lekar, jaki ahladaŭ pacyjentku, źviarnuŭ uvahu na chvoraje horła. 1 sakavika Ministerstva achovy zdaroŭja paviedamiła, što vyjaŭleny treci vypadak u Biełarusi karanavirusa, havorka išła pra Taćcianu.
— U mianie pakul što stan lohkaj prastudy, — kaža surazmoŭca. — Lačeńnie zvyčajnaje ŭ takich vypadkach: pałašču horła i nos, rablu ŭsio, jak pry virusnaj infiekcyi. U maich dvuch kalehaŭ vynik testu admoŭny, ale zaraz usich źmiaščajuć na dvuchtydniovy karancin.
Taćciana znachodzicca ŭ asobnym boksie Viciebskaj infiekcyjnaj balnicy. A ŭ susiedstvie ź joj — jaje siamja: čaćviora dziaciej i muž. U ich, pa słovach Taćciany, vynik admoŭny.
— Bačycca my nie možam, havorym pa videasuviazi, — raspaviała surazmoŭca. — Siudy možna adpraŭlać pieradačy, ale ničoha nazad pieradavać nielha. Za dva tydni da pajezdki ja lažała ŭ infiekcyjnaj balnicy z małodšym dziciom — i voś my znoŭ tut. Starejšyja dzieci ŭsio razumiejuć, dvoje małodšych pakul što ŭsprymajuć toje, što adbyłosia, jak pryhodu. Ujavicie, jany ž jak u źniavoleńni: muž i čaćviora dziaciej u adnym pamiaškańni. Pakul što nie viedajem, kolki tut prabudziem, ale spadziajomsia, što ŭsio budzie dobra.
Pa słovach Taćciany, kali jana prylacieła ŭ Miłan, nijakaj tryvohi nie adčuvałasia, usio było ŭ pracoŭnym režymie.
— Heta ŭžo paźniej źjaviłasia infarmacyja, što admianiajucca pakazy mod abo što jany prachodziać biez hledačoŭ. Kali my byli ŭ Miłanie, ničoha niezvyčajnaha nie zaŭvažyli.
Ciapier apytvajuć akružeńnie Taćciany, vyśviatlajuć, z kim jana kantaktavała i prosiać usich prajści test. Viadoma, što ŭ Viciebsku špitalizavali 26 čałaviek, jakija kantaktavali ź joj.
— Žančyna, u jakoj padazreńnie na karanavirus, znachodzicca ŭ asobnym boksie. Jana nie kantaktuje ni z kim. U hety boks asobny ŭjezd, — paviedamiŭ načalnik Viciebskaha abłzdaroŭja Juryj Dziarkač. — Vychad z hetaha boksa niemahčymy: tam jość adpaviednyja šluzy i zamkniony abmien pavietram. To-bok, hetaja žančyna niekantaktnaja. Usie astatnija špitalizavanyja kantaktnyja. Ale raźmiaščajucca taksama ŭ boksach z asobnym vychadam. Tych, u kaho admoŭnyja vyniki, budziem vyvodzić ź izalacyi ŭ infiekcyjnaj balnicy. Ale jany buduć znachodzicca ŭ miedustanovie 14 dzion. U pryncypie, hetych ludziej, jakija kantaktavali z pracaŭnicaj futravaha kambinata, možna było nazirać i doma, ale pajšli na varyjant poŭnaj izalacyi, kab vyklučyć usie mahčymyja prablemy.
Na pradpryjemstvie, dzie pracavała Taćciana, padkreślivajuć: u jaje kalehaŭ karanavirus nie paćvierdziŭsia, jany pracujuć u štatnym režymie.
Kamientary