Hałoŭnym śledčym upraŭleńniem SK zavieršana rasśledavańnie kryminalnaj spravy ab vybuchach salutnych ustanovak 3 lipienia 2019 hoda ŭ Minsku, paviedamlaje pres-słužba viedamstva.
Ustanoŭlena, što napiaredadni praviadzieńnia salutu supracoŭniki Minskaj vajennaj kamiendatury vyjavili nieadpaviednaść bolšaj častki piratechničnych vyrabaŭ kalibra 195 mm, što pryznačalisia dla śviatočnaha salutu, narmatyŭna-techničnaj dakumientacyi.
Zakuplenaja ŭ rasijskaj kampanii piratechnika mieła brak, dapuščany na pradpryjemstvie-vytvorcy. Tak, dyjamietr (kalibr) vyrabaŭ pieravyšaŭ normu, što nie dazvalała zaradzić ich u stvały salutnych ustanovak u štatnym paradku. Jany padlahali biezumoŭnaj adbrakoŭcy i nie mahli biaśpiečna vykarystoŭvacca pry praviadzieńni salutu. Pa ŭzhadnieńni z kamiendaturaj dla vypraŭleńnia na miescy vyjaŭlenych defiektaŭ i zamieny brakavanych vyrabaŭ u Minsk prybyli dva inžyniery pradpryjemstva-vytvorcy.
Jak zaznačaje SK, u pracesie zaradžańnia salutnych ustanovak fiejervieračnymi vyrabami hetyja ludzi razam z kamandziram roty Minskaj vajennaj kamiendatury dapracoŭvali ich šlacham uniasieńnia źmienaŭ (pamianšeńnie dyjamietra šlacham miechaničnaha ŭździejańnia), što nie praduhledžana instrukcyjaj pa ekspłuatacyi, narmatyŭnaj i techničnaj dakumientacyjaj. Takija źmieny pryvodzili vyraby ŭ niebiaśpiečny dla vykarystańnia stan, što paćviardžajecca vynikami ekśpiertnych daśledavańniaŭ i śledčaha ekśpierymientu.
U vosiem salutnych ustanovak zaradžana 480 fiejervieračnych vyrabaŭ kalibra 195 mm, bolš za 190 ź jakich pa vyšejapisanych pryčynach nie mahli być vykarystany dla biaśpiečnaha praviadzieńnia salutu.
Z pryčyny dapuščanych parušeńniaŭ pry praviadzieńni salutu adbylisia niaštatnyja situacyi: vybuchi vyrabaŭ na nizkaj vyšyni i ŭ stvałach marcir, u vyniku jakich adzin čałaviek zahinuŭ, jašče adzinaccać paciarpieli. Škoda majomaści fizičnych i jurydyčnych asob aceniena ŭ 740 tysiač biełaruskich rubloŭ.
Pa vynikach rasśledavańnia dvum supracoŭnikam pradpryjemstva-vytvorcy fiejervieračnych vyrabaŭ pradjaŭlenaje abvinavačvańnie pa č. 2 art. 299 (parušeńnie praviłaŭ abychodžańnia ź piratechničnymi vyrabami, što paciahnuła pa nieaściarožnaści śmierć čałavieka i pryčynieńnie škody ŭ bujnym pamiery) Kryminalnaha kodeksa.
Dziejańni kamandzira roty Minskaj vajennaj kamiendatury kvalifikavanyja śledstvam pa č. 2 art. 463 (parušeńnie praviłaŭ abychodžańnia z pradmietami, jakija ŭjaŭlajuć pavyšanuju niebiaśpieku dla navakolnych, što paciahnuła pa nieaściarožnaści śmierć čałavieka i pryčynieńnie škody ŭ asabliva bujnym pamiery) Kryminalnaha kodeksa.
Rasśledavańnie spravy zavieršanaje, materyjały pieradadzienyja prakuroru dla nakiravańnia ŭ sud.
Ciapier čytajuć
«Jany čamuści dumajuć, što ich zaraz zhvałciać». Prapahanda kinułasia tušyć abureńnie biełarusaŭ 150 tysiačami pakistancaŭ23
Kamientary