Biełaruś nakryła novaja chvala finansavych afioraŭ. Jak nie trapić u pastku?

«Biaśpiečnyja» rachunki i fejkavyja techraboty

Časta ašukancy pradstaŭlajucca supracoŭnikami bankaŭ, u tym liku pradstaŭnikami słužby biaśpieki. Pry hetym na telefonie moža vyśviacicca nazva banka abo numar, padobny da aficyjnaha — praŭda, nie haradski, a mabilny (z kodami 25, 29, 33 abo 44).

Dla atrymańnia asabistych danych afierysty, naprykład, mohuć paviedamić pra padazronyja albo ašukanskija apieracyi pa karcie — ich nibyta treba terminova admianić, a reštu hrošaj pieravieści na «biaśpiečny rachunak». Taksama mohuć paprasić paćvierdzić zajaŭku na kredyt abo admianić jaje. Niaredka spasyłajucca na techničnyja pracy i testavańnie novaha abstalavańnia. Ci paviedamlajuć pra nieabchodnaść pieravypuścić kartu ŭ suviazi ź pierachodam na novuju sistemu. Kab «dapamahčy abaranić» rachunak klijenta, prosiać paviedamić nie tolki piersanalnyja danyja, ale i atrymany ad banka SMS-kod. Ź jaho dapamohaj ašukancy mohuć nie tolki pieravieści hrošy z rachunkaŭ klijenta, ale i aformić na jaho imia anłajn-kredyt.

U sumniŭnych situacyjach ekśpierty rajać pierapynić razmovu i pieratelefanavać u bank. I samaje hałoŭnaje — nikoli nie paviedamlać adnarazovy SMS-kod, łahin i parol ad mabilnaha abo internet-banka, a taksama poŭnyja rekvizity karty.

«Supracoŭniki banka nikoli nie zapytvajuć poŭny numar kartki, termin jaje dziejańnia, CVC/CVV kod, paroli ad internet-banka, adnarazovyja kody SMS dla paćvierdžańnia apieracyj abo źmieny sakretnych paramietraŭ dostupu. Pry nieabchodnaści — mohuć paprasić nazvać tolki 4 apošnija ličby kartki. Kali vam telefanujuć z prośbaj paviedamić kanfidencyjnuju infarmacyju i tym bolš sms-kody — heta dakładna ašukancy», — tłumačać u Pryjorbanku.

Prośby «svajakoŭ» i «čornyja» pakupniki

U apošni čas afierysty aktyŭna vykarystoŭvajuć sacyjalnyja sietki. Skažam, mohuć źviarnucca da patencyjnaj achviary z akaŭnta jaho svajaka abo znajomaha. Dla hetaha profil ŭzłomvajuć abo stvarajuć «dvajnika». Jak praviła, prośba hučyć biaskryŭdna: dapamahčy z atrymańniem hrošaj (maŭlaŭ, karta praterminavanaja), ale dla hetaha patrebnyja rekvizity. Albo, naadvarot, mohuć paprasić pazyčyć hrošaj i pieravieści ich na svoj rachunak.

«Pry pastupleńni takoj prośby nie varta śpiašacca jaje vykonvać. Nieabchodna źviazacca sa znajomym abo svajakom i asabista pierakanacca ŭ tym, što jon sapraŭdy prosić dapamahčy», — rajać u Pryjorbanku.

U zonie ryzyki znachodziacca aŭtary abjavaŭ na anłajn-placoŭkach pa prodažy rečaŭ. Ašukancy mohuć prapanoŭvać apłacić pakupku pa karcie, dla čaho zapytvajuć ŭsie danyja karty pradaŭca i SMS-kody. Albo ž prosiać paćvierdzić atrymańnie pieravodu na sumnieŭnaj staroncy.

«Treba pamiatać, što dla zaličeńnia pieravodu na kartku dastatkova tolki jaje poŭnaha numara. Inšyja rekvizity nia patrabujucca. I ŭžo dakładna atrymalnik pieravodu nie pavinien ničoha paćviardžać, apłačvać kamisiju za pieravod i, adpaviedna, ŭvodzić adnarazovy kod albo «uvachodzić u Internet-bank» pa atrymanaj spasyłcy. Kali takaja prośba pastupaje, vas chočuć abrabavać», — źviartajuć uvahu ekśpierty.

Nieviadomyja «pieravody» i niečakanyja «vyjhryšy»

Jašče adna pahroza — fišynhavyja sajty. Ich vykarystoŭvajuć dla atrymańnia łohina i parola ad asabistaha kabinieta, a taksama sakretnych paramietraŭ. Schiemy mohuć być roznymi: naprykład, pastupaje paviedamleńnie ab hrašovym pieravodzie, paćvierdzić jaki prapanujuć pa spasyłcy. Adkrytaja staronka budzie dakładnaj kopijaj ŭvachodu ŭ internet-bank, što moža źbić z pantałyku. Paśla ŭvodu łohina, parola i inšych sakretnych paramietraŭ na pabočnym sajcie jany stanoviacca dastupnymi złamyśniku. Strat u takim vypadku nie paźbiehnuć.

Naiŭnym, ale ŭsio jašče aktualnym pryjomam zastajucca «niečakanyja vyjhryšy». Čałavieka pierakonvajuć u niečuvanym šancavańni, ale dla atrymańnia pryza treba apłacić kamisiju. Sprava zakančvajecca kradziažom pieraviedzienych hrošaj.

Časam ašukancy prosiać aformić kredyt na svajo imia dla inšaha čałavieka. Za dapamohu abiacajuć uznaharodu i navat robiać pieršyja ŭnioski, ale na spravie pakidajuć čałavieka ź niavypłačanym abaviazkam.

«Kab nie stać achviaraj machlara, nie treba paviedamlać trecim asobam svaje piersanalnyja danyja, poŭnyja rekvizity karty, paroli abo SMS-kody ad banka. Kali heta ŭsio ž adbyłosia, nieabchodna nieadkładna źviazacca z bankam i zabłakavać kartku. Kali hrošy ŭžo vykradzienyja, to nie varta marudzić z zajavaj u pravaachoŭnyja orhany. Što tyčycca kredytaŭ, to ni ŭ jakim razie nie treba afarmlać ich dla trecich asob», — rajać u Pryjorbanku.

• 0
• 0
• 0
• 0
• 0
• 0
• 0
• 0