Rar: Heta pačatak pryznańnia Biełaruśsiu Abchazii

Padčas vizytu ŭ Sočy kiraŭnik Biełarusi Alaksandar Łukašenka 23 sakavika ŭviečary pravioŭ sustreču z prezydentam niepryznanaj respubliki Abchazija Siarhiejem Bahapšam. Sapraŭdy, ciažka ŭsiedzieć na dvuch kresłach, havoryć blizki da rasiejskaha kiraŭnictva niamiecki palitołah.

Na pytańnie, ci abmiarkoŭvałasia tam sytuacyja z pryznańniem samaabvieščanych Paŭdniovaj Asetyi i Abchazii, kiraŭnik prezydenckaj pres‑słužby Pavał Lohki zajaviŭ karespandentu Svabody, maŭlaŭ, apošnim časam «źjaviłasia šmat spekulacyj i biazhłuździcy vakoł hetaha pytańnia».. Čamu mienavita ciapier A.Łukašenka advažyŭsia na hetuju sustreču? I jak pastaviacca eŭrapiejcy da aktyvizacyi aficyjnaha Miesnku ŭ hetym kirunku? Pra heta Aleś Daščynski hutaryć z dyrektaram prahramaŭ «Rasieja — Eŭrazija» niamieckaha tavarystva źniešniaj palityki Alaksandram Raram.

Daščynski: «Pieramovy z kiraŭnikom niepryznanaj respubliki adbylisia padčas rabočaha vizytu ŭ Rasieju, paśla sustrečaŭ z Dz.Miadźviedzievym i U.Pucinym. Čamu A.Łukašenka pajšoŭ na hetuju sustreču?»

Rar: «Ja dumaju, heta pačatak aściarožnaha i pavolnaha pryznańnia z boku Biełarusi niezaležnaści Abchazii. Biełaruś pavinna ŭ niejkaj stupieni, mahyčma, taksama ŭ intaresach Rasiei, pryciahnuć inšyja krainy SND da hetaha pracesu. Rasieja patrebna, nie terminova, ale ciaham nastupnych paru hadoŭ, pryznańnie Paŭdniovaj Asetyi i Abchazii chacia b z boku krainaŭ SND. Potym u planach Rasiei padklučeńnie Paŭdniovaj Asetyi i Abchazii da ADKB, da ekanamičnaha sajuza Biełarusi i Rasiei. Ja dumaju, z A.Łukašenkam Dz.Miadźviedzieŭ davoli žorstka pahutaryŭ u Sočy i paprasiŭ užo ruchacca ŭ hetym nakirunku. Tamu ŭ Łukašenki ciapier i ŭźnikajuć surjoznyja prablemy z Eŭraźviazam, bo EZ pačynaje jaho taksama pryciskać da ściany. I kali heta pryznańnie adbudziecca, to Biełaruś moža zabycca pra luby praces źbližeńnia z EZ».

Daščynski: «Adnak Rada Eŭraźviazu ŭžo pryniała rašeńnie ab dałučeńni Biełarusi da prahramy «Uschodniaha partnerstva». I jak mohuć raźvivacca padziei, kali A.Łukašenka pryznaje niezaležnaść hruzinskich terytoryj?»

Rar: «U Eŭraźviazie niedzie adčuli, što Biełaruś idzie na heta pryznańnie. Nie ciapier, dyk ŭ niedalokaj budučyni. Tamu ciapier na adras Biełarusi hučać pramyja pahrozy. Navat da taho, što Biełaruś vyklučać z susiedzkaj prahramy Eŭraźviazu. Sapraŭdy, ciažka ŭsiedzieć na dvuch kresłach. Łukašenka sprabuje i nabližacca da EZ, i nie svarycca z Rasiejaj. Ale abstaviny mohuć skłaścisia tak, što jamu daviadziecca ŭsio ž pieramiaščacca ŭ bok adnaho kresła. I chacia b na try čverci zajmać adno kresła i vyzvalać miesca na druhim. Vyjścia amal što ŭžo niama. Bo aproč intaresaŭ Biełarusi, jość intaresy Rasiei i EZ, jakija chočuć, kab Biełaruś ich realizavała».

Daščynski: «Mahčyma, A.Łukašenka pačynaje šantažavać Eŭropu, kab jaho zaprasili na samit u Prahu?»

Rar: «Heta było b zanadta prosta. Jaho i tak zaprosiać. Kali b jon ciapier zajaviŭ, što Biełaruś ni ŭ jakim razie nie pryznaje Paŭdniovuju Asetyju i Abchaziju, ci jon nie zacikaŭleny ŭ pryznańni, to jaho dakładna zaprasili b. A svajoj sustrečaj z Bahapšam i svaimi apošnimi vykazvańniami, jon pakazvaje Rasiei, što idzie ŭ bok pryznańnia i ryzykuje sapsavać znoŭ stasunki z EZ. Z druhoha boku, EZ vyhladaje taksama śmiešna. Niahledziačy na sytuacyju ŭ samoj krainie, EZ patrabuje ad Biełarusi tolki adnaho: nie iści ŭ bok rasiejskaj palityki i nie pryznać Paŭdniovuju Asetyju i Abchaziju. Heta nasamreč davoli dziŭny šantaž. I heta pakazvaje, što Biełaruś jak i raniej zastajecca ŭ vačach eŭrapiejcaŭ niejkim abjektam hieapalityčnaj hulni adnosna Rasiei».

• 0
• 0
• 0
• 0
• 0
• 0
• 0
• 0