Fota Belarus.by
Z pryhožaj inicyjatyvaj vystupiŭ centralny Mastacki muziej krainy.
Ustanova pačynaje videatranślacyi svaich tradycyjnych ekskursij. Jany adbyvajucca na vychadnych, viaduć ich najlepšyja mastactvaznaŭcy krainy.
«U luboj situacyi zaŭsiody možna znajści stanoŭčyja momanty…» — tak pačynajecca paviedamleńnie ŭ fejsbuku muzieja. Hetaja dziaržaŭnaja ŭstanova, adnak, ni słovam nie zhadvaje pra pandemiju, jakaja zmusiła miljony ludziej u śviecie abmiežavać svoj vychad u ludzi.
Heta moža aznačać, što ŭstanovam kultury krainy rekamiendavana ažyćciavić niekatoryja karancinnyja miery biez aficyjnaha abviaščeńnia pra toje, što heta źviazana z epidemijałahičnaj situacyjaj.
Učora Brescki dramatyčny teatr abviaściŭ pra admienu śpiektaklaŭ na vialikaj scenie da kanca sakavika. U toj ža čas śpiektakli na małoj scenie zastajucca. Pra heta paviedamlajecca na staroncy teatra ŭ fejsbuku.
Brescki teatr lalek pieranios usie raniej zajaŭlenyja śpiektakli «ŭ metach prafiłaktyki». Pra heta jon paviedamiŭ u svajoj hrupie ŭkantakcie.
Bresckaja fiłarmonija taksama pieranosić adzin vystup za druhim biez aficyjnaha abviaščeńnia pra spynieńnie siezona.
Raniej muziej nikoli nie vioŭ videatranślacyj svaich ekskursij. Hetyja pachody ŭ muziej płatnyja, zvyčajna ekskursija była dastupnaja ŭsim naviednikam muziej, uvachodny bilet u jaki kaštuje 8 rubloŭ.
Siońnia a 14-j hadzinie adbudziecca kuratorskaja ekskursija Kaciaryny Izafatavaj pa vystavie «Nas zrazumiejuć praz 100 hadoŭ. Łazar Chidekiel». A zaŭtra a 16-j adbudziecca lekcyja «Prastora ŭtopij» Hieorhija Zaborskaha ŭ ramkach toj ža vystavy.
U Biełarusi, u adroźnieńnie ad bolšaści jeŭrapiejskich krain, miery strohaha karancinu nie pryniatyja. U toj ža čas Alaksandr Łukašenka zaklikaŭ ludziej starejšaha ŭzrostu, pry mahčymaści, pabyć u samaizalacyi.
«Ludziam treba raić, kab jany zastavalisia doma, — skazaŭ jon 19 sakavika. — Treba mabilizavać našy sacyjalnyja słužby, kab dapamahali starym, u jakich dziaciej niama, jakim nichto dapamahčy nie moža. Treba ich zaraz apiekavać. My musim zrabić usio, kab jany zmahli vyjści z hetaj siezonnaj prablemy biez strat», — skazaŭ Łukašenka.
