Film – idealnaje dziavočaje «myła». Jaho krytyka – niebiaśpiečnaja dla zdaroŭja.
Picier FM (Pitier FM)
Rasieja, 2005, kalarovy, 95 chv.
Žanr: meladrama.
Adznaka: 3,5 (z 10).
Papularnaja dy-džejka Maša hublaje mabilnik. Jaho znachodzić talenavity architektar Maksim (pa sumiaščalnictvie padmiatajła). Dva sercy, pryznačanyja adno adnamu, anijak nia mohuć sustrecca…
Kaliści amerykanskaje radyjo reklamavała myła na tle ślozavyciskalnych dramaŭ. Dušaraździralnickija pakuty «pad myła» i atrymali nazvu «mylnych operaŭ».
Vytoki papularnaha žanru byli zabytyja, ale režyserka Aksana Byčkova ich uzhadała.
Niasucca nad horadam radyjnyja j luboŭnyja dyjalohi (saładžavaja banalnaść jakich jość admietnaściu «myła»). U jakaści ž reklamavanaha tavaru vystupaje rodny horad Pucina i rasiejski patryjatyzm.
U ščaślivym horadzie navat bamžy miłyja, rok-muzyka stanovicca lohkim ščabiatańniem, a samy «dastajeŭski» persanaž – Uładzimier Maškoŭ u trenikach, jaki prapanuje «seks ź nieznajomym mužčynam».
Hieroi radyjnaha Picieru – rodnyja svajaki biełaruskaj «Duniečki». Jany takija ž cukiernyja j falšyvyja. Maša (Kaciaryna Fiadułava) – sympatyčnaja durnička, jakaja doŭha vyrašaje, ad čaho joj rydać. Maksim (Jaŭhien Cyhanoŭ) – dvornik-patryjot, jaki nie pramianiaje svajoj radzimy na kantrakt u Niamieččynie. (Adnolkavy vyraz tvaru na praciahu ŭsiaje karciny – paznaki admysłovaje ŭpartaści j ramantyčnaści.)
Ale, nia ŭ prykład «Duniečcy», picierskaje radyjo ŭzbahačanaje pieśniami – ad «Aleniaŭ u tundry» da Hrabienščykova, a ŭ štampy ŭviedzienaja zamiłavalnaja dvaistaść.
Tak bomž nosić aplikacyju ź Miki Maŭsam, milicyjant chavaje «parnušku» ŭ spravie, a handlarka piražkami, jakoj hieroj padaravaŭ kvietki, mužykavataja.
Padobnaje ažyŭleńnie susalnaje kazki vyklikaje ŭdziačnaść aŭdytoryi. Zala całkam nabitaja ramantyčnymi paračkami, jakija ŭzdychajuć, śmiajucca j plaskajuć u ładki.
Film – idealnaje dziavočaje «myła». Jaho krytyka – niebiaśpiečnaja dla zdaroŭja.
Andrej Rasinski
Kamientary