Ani Polšča, ani Jeŭropa nie mohuć sabie dazvolić «vyklučyć» haspadarku i hramadstva. Nichto nie vytrymaje takich abmiežavańniaŭ doŭhi čas. Šmat kim kiruje isteryčnaja panika, — piša Hžehaž Chajdarovič u vydańni Rzeczpospolita.
Uradami bolšaści krain kiruje papulizm, miarkuje aŭtar, i jany kinulisia zakryvać i abmiažoŭvać usio, što možna. Biez sumnievu, heta vyklikana svojeasablivym začaravańniem Kitajem, ale na fonie pośpiechaŭ baraćby z epidemijaj usie zabylisia, što sučasnaja Padniabiesnaja — heta kamunistyčnaja, tatalitarnaja kraina, u jakoj niama miesca dla hramadzianskich svabod. Nie ad siońnia viadoma, što pry kamunistyčnych režymach infarmacyja słužyć nie praŭdzie, a prapahandzie.
Ad palitykaŭ my čakajem (prynamsi, ja) realizacyi adekvatnych situacyi hramadskich i ekanamičnych zachadaŭ. Na žal, siońnia da taho daloka.
Epidemija, abo pandemija pavodle SAAZ, jakaja, biezumoŭna, źjaŭlajecca katastrofaj, zamiest taho, kab vyklikać adekvatnyja dziejańni ŭradaŭ, pryviała da niedastatkova praanalizavanych i papulisckich dziejańniaŭ, što da taho ž chutčej nie pryniasuć čakanych vynikaŭ.
Urady vyrašyli abviaścić amal poŭny «łokdaŭn», bo zrabić tak było praściej za ŭsio i, što važna, vidoviščna.
Ale što budzie dalej? Hetaha nichto z palitykaŭ nie kaža. Kali krainu začyniajuć pry 300-400 chvorych i 5-10 śmiarotnych vypadkach, jak z hetaha vyjści, kali chvorych stanie značna bolš: 3-4 tysiačy abo navat 30-40 tysiač, a śmiarotnyja vypadki taksama buduć ličycca na sotni abo tysiačy?
Jakaja tady budzie arhumientacyja palitykaŭ, što zamiest taho, kab supakojvać svaimi rašeńniami, jany padsiłkoŭvajuć paniku? Praciahvać «łokdaŭn» na niavyznačany termin? Jak doŭha? Paŭhoda ci hod? A moža, 2-3 hady? Jakaja haspadarka takoje vytrymaje? Nivodnaja.
Ci chtości vieryć, što hety čas ludzi, pierš za ŭsio maładyja, nie buduć vychodzić z domu? Chutčej za ŭsio, nie. Moža, potym treba vyvieści vojski na vulicy? Heta padziejničaje na karotki čas, ale my nie chočam chaosu i anarchii. Moža, jość lepšyja rašeńni? Jašče nie pozna, kab zrabić reviziju pryniatych zachadaŭ i pryznać pamyłki. Usio ž situacyja była niečakanaj dla ŭsich, biez pamyłak nie mahło abyścisia. Ale što varta zrabić u doŭhaj pierśpiektyvie?
Treba skazać ludziam praŭdu: prablema nie źniknie praź miesiac abo praz dva. Stvareńnie jakasnaj vakcyny zojmie minimum hod, a značyć, nas čakaje čas farmakałahičnaj biezdapamožnaści minimum da sakavika 2021.
Padychodziačy da čałaviečaha žyćcia jak da najvyšejšaj kaštoŭnaści, varta pakłapacicca pra hrupu ryzyki — asob, starejšych za 70 hod, ludziej z chraničnymi chvarobami. Im sapraŭdy rekamiendavany poŭny karancin.
Padstavaj žyćcia pavinna stać hihijena, moža, ludzi navučacca ŭrešcie myć ruki. Akramia taho, prafiłaktyka štodzionnych chvarobaŭ, — usio heta dapamoža minimalizavać raspaŭsiud karanavirusa.
Rešta nasielnictva pavinnaja jak maha chutčej viarnucca na pracu i ŭ škoły. Moža, na «nizkich abarotach» — 4 dni na tydzień, moža, na źmieny, kab abmiežavać kamunikacyju, pierapoŭnienaść kłasaŭ i h. d.
Heta davoli ciažka, ale mahčyma. Pry źmienach — paniadziełak/sierada, aŭtorak/čaćvier piaty dzień pracy možna ŭ niekatorych vypadkach pravieści z domu. Moža, firmy nie zarobiać miljonaŭ pry takoj arhanizacyi pracy, ale, prynamsi, zmohuć pakryć vydatki pry źnižanym popycie.
Psichałahična my taksama ad takoha rašeńnia vyjhrajem, čałaviek — statkavaja istota, jon patrabuje kamunikacyi ź inšymi ludźmi.
Uradu varta na hod admovicca ad padachodnych padatkaŭ, unioskaŭ na sacyjalnaje strachavańnie i ŭvieści šmat pasłableńniaŭ dla pryvatnych pradprymalnikaŭ. Banki musili b abmiežavać na hod spahnańnie pracentnaj častki kredytaŭ.
Na žal, na hod treba zabycca pra masavyja mierapryjemstvy, imprezy, kancerty, kanhresy. Naležała b abmiežavać i kolkaść klijentaŭ u kramach, restaranach, praparcyjna zajmanaj prastory.
Paloty, aŭtamabilny i čyhunačny transpart, adnak, treba viarnuć, ale kab kožny, chto pierasiakaje miažu, byŭ prateściravany na karanavirus za svoj košt, nie za dziaržaŭny. My pavinny pravodzić stolki testaŭ, kolki mahčyma. Biaspłatna dla asob ź nievialikim dachodam, a dla tych, chto moža sabie dazvolić, — za ich ułasny košt, prapanuje aŭtar.
Hetyja i inšyja rašeńni dazvolać ludziam žyć dalej, moža, nie napoŭnicu, ale choć jak, miarkuje jon.
