U tak zvany «Dzień jadnańnia narodaŭ Biełarusi i Rasii» 2 krasavika ŭ skviery la kinateatra «Kijeŭ» zusim niezaŭvažna prajšoŭ pikiet prychilnikaŭ intehracyi. Na jaho sabraŭsia dziasiatak čałaviek.
Pikiet u Kijeŭskim skviery. Fota Rehnum.
U rukach pikietoŭcy trymali nastupnyja płakaty «Sajuz Rasii i Biełarusii viečny i niesakrušalny», «Braterskija narody! Dałučajciesia da sajuznaj dziaržavy», «My suprać zaciahvańnia abjadnańnia valut Biełarusii i Rasii», «Abjadnajcie ŭzbrojenyja siły Biełarusii i Rasii ŭ adnu vajskovuju arhanizacyju», «My za adzinuju sajuznuju dziaržavu z adzinym kiraŭnictvam».
Arhanizatarami vystupili ludzi z kaardynacyjnaj rady «Ajčyna», a mienavita Valeryj Drako i Vasil Zielikaŭ. Hetyja ludzi prytrymlivajucca kamunistyčnych pohladaŭ, pryčym u stalinskaj interpretacyi kamunizmu. Tamu ich nie padtrymlivajuć ni praŭładnaja KPB, ni kalakinski «Spraviadlivy śviet».
Absalutnaja bolšaść udzielnikaŭ pikieta byli piensijaniery. Valeryj Drako, jaki niekali byŭ deputatam Pałaty pradstaŭnikoŭ, raskazaŭ «NN», što kolkaść udzielnikaŭ abumoŭlenaja hrašyma, jakija treba było zapłacić za arhanizacyju masavaj akcyi.
«Za ŭdzieł dziesiaci čałaviek my zapłacili 81 rubiel, a kab nas było ŭžo 11, to zapłacili b užo 700. Adkul takija rascenki! —
aburajecca Drako. — Tym bolš śviata dziaržaŭnaje, tamu my prasili ŭ haradskich uładaŭ, kab nam skasavali apłatu, ale nam nie pajšli nasustrač. Heta pieršaja naša akcyi, dzie my byli vymušanyja zapłacić hrošy. Tak, milicyja sapraŭdy była, jana nas «achoŭvała», ale voś ni miedykaŭ, ni kamunalnikaŭ pobač nie było».
Valeryj Drako raskazvaje, što haradskija ŭłady vyznačyli adnoj z umovaŭ praviadzieńnia, kab udzielniki byli ŭ maskach, i heta było vykanana.
Na pikiecie byli pryniatyja dva zvaroty da ŭłady. U pieršym Drako, Zielikaŭ i kampanija patrabavali chutčejšaha budaŭnictva sajuznaj dziaržavy Biełarusi i Rasii, a druhi nazyvajecca «Nie — buržuaznaj demakratyi ŭ intaresach bahatych». U druhim jakraz i zaklikajuć admianić hrašovyja pabory dla arhanizataraŭ masavych akcyj.
Zajaŭniki adrazu prasili dla praviadzieńnia hetuju placoŭku. «Kijeŭski skvier z usich mahčymych varyjantaŭ — heta najbližejšy da centru, ale placoŭka absalutna biestałkovaja. Navat tyja redkija ludzi, što prachodzili mima, nie razumieli, što my tam rabili», — pryznaje Valeryj Drako. Kamunisty źviarnulisia da ŭładaŭ, kab dla pikietaŭ davali i placoŭki ŭ centry horada.
Valeryj Drako adznačaje, što ŭłada padšturchoŭvaje ich da taho, kab jany stanavilisia apazicyjaj. «Apazicyja ŭžo pierajšła na bok prezidenta. Pomnicie, Paźniak kazaŭ pra Bałta-Čarnamorski sajuz, a ciapier prezident jaho ŭžo maluje. Možna vinšavać BNF i inšyja arhanizacyi, ciapier heta vaš prezident, jaki vykonvaje vašu prahramu. A nas z kanstruktyŭnaj apazicyi vyšturchoŭvajuć u samuju sapraŭdnuju apazicyju».
Taksama Valeryj Drako paviedamiŭ, što za pikietam pilna sačyŭ supracoŭniki KDB, jaki ŭsio zdymaŭ na kamieru. «Ź milicyjaj my choć znajomyja, padpisvali dakumienty, a chto hety čałaviek — nie ŭjaŭlajem».
U cełym ža arhanizatar aburany tym, što ŭłady nijakim čynam nie adznačali 2 krasavika. «Raniej niejkija kancerty byli ŭ fiłarmonii, a ciapier niama ničoha, my adzinyja, chto adznačyŭ hetuju datu ŭ Minsku».
