Biełaruskija kataliki na Vialikdzień addali pieravahu videatranślacyjam z kaściołaŭ
Pradstaŭnik Katalickaj carkvy ŭ Biełarusi Jury Sańko paviedamiŭ «Radyjo Svaboda», što z pryčyny pandemii karanavirusa kolkaść viernikaŭ padčas słužbaŭ u chramach skaraciłasia ŭ razy. Heta śviedčyć i pra dyscyplinavanaść i hramadskuju adkaznaść ludziej adno pierad adnym.
Sam ajciec Jury — probašč minskaha kaścioła Śviatoha Rocha. Pavodle jaho, kali ŭ papiarednija hady na Vielikodnuju imšu tut źbiralisia 300 i bolš čałaviek, to hetym razam śviatočnuju słužbu naviedali 60 parafijan. Anałahičnaja karcina i ŭ inšych chramach: u lepšym vypadku pałova ad raniejšaj kolkaści, a zvyčajna jašče mieniej.
Tak, u minskim katedralnym sabory na imšy, jakuju ŭznačaliŭ mitrapalit Tadevuš Kandrusievič, razam ź im malilisia ŭsiaho niekalki dziasiatkaŭ viernikaŭ, jakija vyrašyli asabista ŭdzielničać u hałoŭnaj liturhii hoda.
Balšynia skarystałasia dadzienaj biskupam paradaj i zastałasia doma, dałučyŭšysia da imšy praz teletranślacyi na kanale «Biełaruś 1», spadarožnikavym kanale «Biełaruś 24», na kanale miždziaržaŭnaj teleradyjokampanii «Mir» i internet-kanałach u sacyjalnych sietkach.
Pavodle Juryja Sańko, na fonie epidemii karanavirusa abačlivaść viernikaŭ całkam uchvalnaja, bo śviedčyć pra razumieńnie surjoznaści situacyi. Hałoŭnaje, što ŭ dumkach i sercach hetyja ludzi zastajucca z Boham — tolki ŭ «Instahramie» słužba z kaścioła Śviatoha Rocha nabrała amal paŭtysiačy prahladaŭ.
Pakolki niama peŭnaści, kali buduć adazvanyja rasparadžeńni kaściolnaha kiraŭnictva nakont zachadaŭ zaściarohi, virtualnyja kanały suviazi buduć pašyracca.
Ciapier čytajuć
U Varšavu pryjechała sotnia biełaruskich palitviaźniaŭ10
Kamientary