Ciepłavizar, jaki dazvalaje na adlehłaści vyjaŭlać pasažyraŭ z pavyšanaj tempieraturaj, zapracavaŭ u testavym režymie na ŭvachodzie na stancyju mietro «Płošča Lenina» z boku vakzała, paviedamiŭ «Minsk-Navinam» namieśnik staršyni Minharvykankama Alaksandr Darachovič.
— Jak tolki ŭ pole zroku kamiery traplaje čałaviek z tempieraturaj, vyšejšaj za normu, na ekranie źjaŭlajecca čyrvonaje akienca. Zaraz sumiesna z sanitarna-epidemijałahičnaj słužbaj horada vypracoŭvajem ałharytm dziejańniaŭ: jakija miery pradprymać, vyjaviŭšy pasažyra z pavyšanaj tempieraturaj. Pra admovu ŭ pieravozcy havorki nie idzie, u prafiłaktyčnych metach razhladajem varyjanty papiaredžańnia čałavieka ab jaho stanie, mahčyma, kansultacyi abo akazańnia dapamohi, — udakładniŭ Darachovič.
Jon dadaŭ: prajekt raźličany na pierśpiektyvu i budzie karysny nie tolki pry ciapierašniaj epidsituacyi, ale i ŭ budučyni — u pieryjady ŭsplosku reśpiratornych infiekcyj. U jakaści testavaj placoŭki «Płošča Lenina» vybrali pa całkam zrazumiełych pryčynach: akramia minčan stancyjaj karystajucca mnohija inšaharodnija, jakija pryjazdžajuć u stalicu na aŭtobusach i ciahnikach. U dalejšym ciepłavizary mohuć źjavicca i na inšych stancyjach padziemki.
— Vialiki dziakuj haradžanam, jakija z razumieńniem staviacca da ciapierašniaj situacyi i imknucca mienš naviedvać hramadskija miescy. Na prykładzie transpartu my bačym, što žychary biez uviadzieńnia zabaronaŭ i abmiežavańniaŭ sami prajaŭlajuć śviadomaść. Sutačny pasažyrapatok u mietro ciapier składaje 400 tys. čałaviek, u toj čas jak zvyčajna jon varjiravaŭsia ŭ miežach 800 tys. — 1 młn, — skazaŭ Alaksandr Darachovič.
