Piśmieńnik Słavamir Antanovič chacieŭ spahnać z «NN» 10 tysiač, a ŭ vyniku zapłacić Redakcyi 800 rubloŭ
Minski haradski sud skončyŭ šmatmiesiačnuju sudovuju epapieju — piśmieńnik Słavamir Antanovič chacieŭ spahnać z kiraŭnika Sajuza piśmieńnikaŭ Biełarusi Mikałaja Čarhinca 20 tysiač rubloŭ, a z «Našaj Nivy» — 10 tysiač rubloŭ.
Zaduma była pravalnaj. U vyniku Antanovič sam zapłacić «NN» 800 rubloŭ. Rašeńnie suda ŭstupiła ŭ zakonnuju siłu.
U lipieni 2019 hoda na sajcie «Našaj Nivy» źjaviŭsia artykuł «Z aficyjnaha Sajuza piśmieńnikaŭ sa skandałam vyklučyli Słavamira Antanoviča. Čarhiniec: Jon elemientarnaje trapło».
U im Čarhiniec raskazvaŭ, čamu Antanoviča vyklučyli z arhanizacyi. A Antanovič u kamientary karespandentu źviartaŭ uvahu na jurydyčnyja momanty hetaj pracedury.
Urešcie Antanovič pakryŭdziŭsia i pajšoŭ u sud. Jon paličyŭ abraźlivymi nazvu artykuła i jašče piać fraz u tekście, patrabavaŭ ich abviaržeńnia i spłaty hihanckaj kampiensacyi.
Sud Leninskaha rajona častkova zadavoliŭ jaho pretenzii, Čarhiniec padaŭ apielacyju ŭ Minski haradski sud, jaki ŭ vyniku viarnuŭ spravu na rajonny ŭzrovień. Paŭtorny razhlad pazova adchiliŭ usie patrabavańni Antanoviča. Čarhovaja apielacyja ŭ Minski haradski sud, ciapier užo ad Antanoviča, nie źmianiła situacyju.
Jakija vyrazy Słavamir Antanovič paličyŭ abrazaj?
1. «Z aficyjnaha Sajuza piśmieńnikaŭ sa skandałam vyklučyli Słavamira Antanoviča. Čarhiniec: Jon elemientarnaje trapło»
Adkaz suda: Antanoviča vyklučyli z Sajuza na padstavie rašeńnia suda Smalavickaha rajona za raspaŭsiud źviestak, jakija hańbiać honar Čarhinca. Značycca, kazać «sa skandałam» — karektna. «Trapło» — čałaviek, jaki kaža niapraŭdu. Antanovič kazaŭ niapraŭdu, značycca, Čarhiniec maje prava na subjektyŭnuju acenku jaho jak «trapła».
2. «Za paklop … było vyrašana prybrać jaho ź liku siabroŭ SPB»
Sud: Antanovič nasamreč uzvodziŭ paklop na Čarhinca, što paćviardžajecca rašeńniem suda Smalavickaha rajona.
3. «Jon zaŭsiody chodzić pjany, to pradstaŭlaŭsia, što jon byŭ pamočnikam Mašerava, to kazaŭ, što rasśledavaŭ śmierć Mašerava… Jon elemientarnaje trapło!»
Sud: Śviedki paćvierdzili, što Antanovič pastajanna prychodziŭ u Sajuz pjanym. A pratakoły, jak patłumačyŭ Čarhiniec, na jaho nie składali, bo nie mieli na heta paŭnamoctvaŭ.
4. «Jon chvaliŭsia, što pracavaŭ pamočnikam premjer-ministra Hienadzia Navickaha. Sapraŭdy, adpracavaŭ paru miesiacaŭ, ale potym jaho vypierli adtul»
Sud: Havorka viadziecca pra infarmacyju, atrymanuju Čarhincom ad Antanoviča, tamu jana nie patrabuje abviaržeńnia.
5. «…chvaliŭsia, što byŭ pałkoŭnikam justycyi ŭ prakuratury … ale jon i blizka nie maje hetaha zvańnia»
Sud: U adnoj z knih Antanoviča źmieščany zdymak u formie supracoŭnika mytnaj słužby, padpisanaja «staršy savietnik justycyi». Ale staršy savietnik justycyi adpaviadaje vajskovamu zvańniu pałkoŭnik. Antanovič tłumačyŭ, što ŭ knizie apiska, ale sud jamu nie pavieryŭ.
6. «Trapło i chvalko»
Sud: Subjektyŭnaja acenka Čarhinca.
Ciapier čytajuć
Žonka Arcioma, jaki emihravaŭ u Ispaniju ź siamjoj i zastaŭsia tam adzin, adkazała, čamu ŭ Baranavičach lepš, čym u Barsiełonie6
Kamientary