Urad pracuje nad čarhovymi pakietami padtrymki ekanomiki i sacśfiery. Pra heta paviedamiŭ namieśnik premjer-ministra Biełarusi Dźmitryj Kruty ŭ efiry kanała ANT. Siarod mier padtrymki, jakija tyčacca sacśfiery, — pavieličeńnie pamieru dapamohi pa biespracoŭi tym, chto stracić pracu ŭ druhim kvartale hetaha hoda, a taksama dadatkovaja dapamoha siemjam ź dziećmi, paviedamlaje Tut.by.
Dźmitryj Kruty adznačyŭ, što rynak pracy čakajuć niaprostyja časy. U hetaj situacyi ŭrad maje namier padtrymać tych, chto stracić pracu.
Dla tych, chto apyniecca biespracoŭnym u druhim kvartale hetaha hoda, płanujuć pavialičyć pamier dapamohi pa biespracoŭi — da biudžetu pražytkovaha minimumu (z 1 maja hety pakazčyk vyraście amal da 247 rubloŭ). Ciapier maksimalny pamier dapamohi pa biespracoŭi składaje 54 rubla, a siaredni — mienš za 30 rubloŭ.
Prapanova pa pavyšeńni dapamohi pa biespracoŭi, pa słovach Dźmitryja Krutoha, užo nakiravali na razhlad prezidenta. Pieršy namieśnik premjer-ministra Biełarusi adznačyŭ, što padniać pamier hetych vypłat vyrašyli, kab stymulavać biespracoŭnych rehistravacca ŭ słužbie zaniataści.
Nahadajem, pry admovie ad dźviuch prapanoŭ ad pasujučaj pracy zdymajuć z uliku pa biespracoŭi i pierastajuć, adpaviedna, vypłačvać dapamohu. Heta ž praviła budzie tyčycca i pavyšanaj dapamohi.
Siarod inšych mier pa sacyjalnaj padtrymcy — materyjalnaja dapamoha ludziam, u jakich nizkija dachody i jakija atrymlivajuć dziaržaŭnuju adrasnuju sacyjalnuju dapamohu. U pieršuju čarhu — siemjam ź dziećmi.
«Dapłata na kožnaha člena siamji budzie pavialičana da biudžetu pražytačnaha minimumu», — paviedamiŭ Kruty. Pavodle jaho słoŭ, vypłaty pavialičacca prykładna na 50-55 rubloŭ na adnaho čałavieka. Sumarna na hety sacyjalny błok majuć namier nakiravać kala 300 miljonaŭ rubloŭ.
Urad taksama prapanuje padtrymać rabotnikaŭ tych pradpryjemstvaŭ, jakija vymušana znachodziacca ŭ prastoi, a taksama tych, kaho najmalniki pieraviali na niapoŭnuju zaniataść. Hetym rabotnikam dapłaciać da minimalnaj zarpłaty, jakaja zaraz składaje 375 rubloŭ.
Kamientary