Biełaruskaja siamja raskazała, jak pieraniesła karanavirus u Maskvie: 9 sutak z tempieraturaj 39°, miescy ŭ balnicach tolki dla tych, chto charkaje kryvioju
Volha i Siarhiej Čarciliny — biełarusy, jakija apošnija hady žyvuć i pracujuć u Maskvie. Siarhiej — žyvapisiec, jaho piersanalnyja vystavy prachodziać i ŭ Biełarusi, i za miažoj, siamja haduje dačku. Volzie 42, Siarhieju — 47.
Jak raskazała «Našaj Nivie» Volha Čarcilina, napiaredadni pravasłaŭnaha Vialikadnia muž zaniamoh i źloh z tempieraturaj, źjavilisia niejkija pakašlivańni, stała dzierci ŭ horle. Jana tym časam praciahvała rychtavacca da śviata.
«U mianie heta prajaviłasia na paŭtara dni paźniej. Siarhiej jašče źviarnuŭ uvahu: «Hladzi, ty ž taksama pačała tak niaśmieła pakašlivać», — a ja sama i nie zaŭvažała.
Potym litaralna za viečar tempieratura ŭ mianie skoknuła da 39 hradusaŭ. Na nastupny dzień źnikła adčuvańnie pachaŭ. Jano, darečy, nie viarnułasia dahetul.
Muž pieranosiŭ praściej — u jaho było maksimum 38,5 hradusa.
Karaciej, my pieračytali simptomy, paraŭnali, zapadozryli kavid, vyklikali chutkuju — jana nie pryjechała. Skazali, što balnicy pierapoŭnienyja. I kali my nie zadychajemsia, to treba ciarpieć i vyklikać u paniadziełak učastkovaha.
My ciarpieli z suboty da paniadziełka, potym pryjšoŭ doktar. Adrazu pryznačyli kampjutarnuju tamahrafiju i pastavili pnieŭmaniju pad pytańniem. Testy brać nie stali, bo my, maŭlaŭ, nie kantakty pieršaj hrupy.
Na nastupny dzień Siarhieju stała horš, ale z sercam, jon navat straciŭ prytomnaść. Vyklikali chutkuju, jamu znoŭ horš, vyklikali druhi raz — jany ŭžo zrabili ekspres-test, ale jon pakazaŭ admoŭny vynik. Darečy, daktary chutkaj byli navat bieź pialčatak, abaronienyja aby-jak.
Na nastupny dzień mužu trochi palahčeła, a mianie tempieratura nie adpuskała. Dzieviać sutak trymałasia 39 hradusaŭ, ja źjeła horku paracetamołu. Doktar raiŭ sabrać siły i schadzić na KT. Darečy, doktar tak za nas pieražyvaŭ, što zachodziŭ dadatkovy raz, kali byŭ u hetym rajonie, staviŭ ukoły ad tempieratury.
Siarhiej schadziŭ na KT, u jaho vyjaviłasia pnieŭmanija. Mnie adrazu dali nakiravańnie — taksama pnieŭmanija, vypisali adrazu dva antybijotyki.
Paražeńnie lohkich pakazała 25%. Patłumačyli, što ŭ balnicu zabirajuć, kali bolš za 50% i ludzi plujucca kryvioju.
Zrabili mazki — jany stanoŭčyja.
Tempieratura spała na dziasiatyja sutki. Palahčeła, ale kašal zastajecca. Na nastupnym tydni znoŭ treba budzie zdavać mazki i KT. Darečy, nam zvanili niejkija kantralujučyja orhany, pytalisia, jak praciakaje zachvorvańnie i jak nam absłuhoŭvańnie.
Admietna, što razam z nami žyvie dačka, joj 9 hadoŭ. Jaje hladzieŭ piedyjatr i ničoha nie vyjaviŭ. Jana absalutna narmalna siabie adčuvaje».
Kamientary