Žurnalista rasijskaha «Pieršaha kanała» Alaksieja Kručynina vysłali ź Biełarusi paśla materyjału pra epidemiju karanavirusa ŭ našaj krainie. «Biełaruś-1» nazvała hety vypusk «dnom i prapahandaj».
Čytajcie. BT: Siem fejkaŭ pra Biełaruś — heta dno, tavaryšy prapahandysty z «Pieršaha kanała»
Alaksiej Kručynin uznačalvaje karespandencki punkt «Pieršaha kanała» ŭ Minsku z 2015 hoda. Što pra jaho viadoma?
Kručynin padčas pracy ŭ «ŁNR»
Alaksieju 35 hadoŭ, jon rodam z dalokaha Uładzivastoka. Skončyŭ žurnalistyku ŭ miascovym univiersitecie ŭ 2007-m. Pracavaŭ u rodnym horadzie na telebačańni i radyjo. U 2008-m staŭ karespandentam «Pieršaha kanała» na Dalokim Uschodzie. Rabiŭ materyjały pra amurskich tyhraŭ, a taksama kitajskich mihrantaŭ.
U 2014 hodzie žyćcio Alaksieja Kručynina kruta mianiajecca. Jaho adpraŭlajuć pracavać karespandentam u Łuhansk. Heta toj čas, kali prarasijskija bajeviki jašče navat nie zajavili ab stvareńni tak zvanaj «Łuhanskaj narodnaj respubliki».
«Ludzi chočuć nie tolki miru, ale i hodnych umoŭ žyćcia. Pra ich kazać usio ciažej. Ceny rastuć kožny dzień. Litr 95-ha bienzinu ŭ pieraliku na rasijskija hrošy kaštuje ŭžo amal 50 rubloŭ, pry hetym siarednija zarpłaty tut u niekalki razoŭ nižejšyja, čym u Rasii. Ludzi pakutujuć i ad niedachopu abjektyŭnaj infarmacyi. Na terytoryi Ukrainy zabaranili rasijskija kanały», — narakaŭ Kručynin u adnym sa svaich pieršych repartažaŭ.
Heta byŭ krasavik 2014, kali rasijskija telekanały jašče sprabavali pakazvać svaju nibyta niejtralnaść. Užo ŭ mai taho ž hoda situacyja kardynalnaja źmianiłasia. U dačynieńni da ŭkrainskich vajskoŭcaŭ Kručynin staŭ vykarystoŭvać užo zvykły štamp «karacieli».
«Viktar Ivanoŭ u krasaviku 44-ha vyzvalaŭ ad niamieckich zachopnikaŭ Adesu. I jamu ciapier udvaja baluča ad taho, što ŭ mirny čas tam zdaryłasia masavaja bojnia, a fašyzm, ź jakim jany tak doŭha zmahalisia, znoŭ padymaje hałavu na Ukrainie», — pieradavaŭ Kručynin 9 maja ŭ Krasnadonie. Adpracavaŭšy miesiac u «ŁNR», reparcior viartaŭsia va Uładzivastok.
Druhoje pryšeście Kručynina ŭ Łuhansk datujecca ŭžo kastryčnikam 2014-ha, kali častka bajavych dziejańniaŭ była skončanaja. I hałoŭnaja meta Kručynina — pakazać, što Łuhansk maksimalna chutka viartajecca da narmalnaha žyćcia.
«Humanitarnaja dapamoha z Rasii dapamahła žycharam Łuhanska pieražyć samy ciažki čas, kali ŭ horad naohuł pierastali dastaŭlać pradukty. Ciapier kiraŭnictva abvieščanaj respubliki ŭžo pačało supracoŭničać ź miascovymi pastaŭščykami. Mnohija ź ich hatovyja na pieršym časie pracavać ź minimalnym prybytkam, aby ludzi nie haładali», — pieradavaŭ žurnalist.
Adpracavaŭ Kručynin u «ŁNR» i miascovyja vybary. Pra ich praviadzieńnie raskazvaŭ ź vialikim zachapleńniem. «Pra toje, što jaŭka budzie vysokaj, u ŁNR zdahadvalisia — pra heta kazali danyja sacapytańniaŭ. Ale takoha ažyjatažu nie čakaŭ nichto. Vybarščyki vystrojvalisia la dźviarej svaich učastkaŭ z samaj ranicy, jašče da pačatku hałasavańnia. Ludzi zanadta doŭha čakali mahčymaści samastojna vybirać svaju ŭładu. I dla ich 2 listapada staŭ nie prosta znakavym — losavyznačalnym dniom», — pafasna adznačaŭ Kručynin.
Ad krasavika 2015 hoda Kručynin staŭ pracavać u Biełarusi. Dastatkova chutka jon staŭ «bambić» biełaruskich nacyjanalistaŭ, jakija padtrymali Ukrainu. «Pra toje, što biełaruskija nacyjanalisty vajujuć u šerahach «Pravaha siektara» i najomnickich bataljonaŭ, viadoma daŭno. Jašče minułym letam u internecie źjavilisia zvaroty ad bajevikoŭ tak zvanaha atrada «Pahonia», — adznačaŭ rasijski žurnalist.
Zaśviaciŭsia Kručynin pracaj i ŭ Polščy, i ŭ Małdovie, i ŭ Łatvii. «U Łatvii amal tracina etničnych ruskich. I vielmi chutka ruskamoŭnaja moładź moža pazbavicca prava vučycca na rodnaj movie. Pieršy krok užo zrobleny: z nastupnaha hoda ekzamieny možna zdavać tolki na łatyšskaj. U płanach užo praz dva hady poŭny pierakład navučańnia ŭ starejšych kłasach na dziaržaŭnuju movu», — pieradavaŭ jon z Ryhi.
Absłuhoŭvaŭ Alaksiej Kručynin rasijskuju prapahandu i padčas znachodžańnia vajskoŭcaŭ u Siryi. «Mirnyja žychary pravincyi Es-Suviejda sustrakajuć siryjskich sałdat. Darohu pasypajuć rysam — samy sardečny žest. Ščyraje zachapleńnie ŭ kožnym horadzie. Vajna skončyłasia, hetyja miescy znoŭ pad kantrolem zakonnaj ułady. Śledam idzie humanitarnaja kałona rasijskaha centra pa prymireńni bakoŭ. Rasijskamu trykałoru tut taksama vielmi rady», — ličyć karespandent.
Dzie b ni pracavaŭ Alaksiej Kručynin, chaj heta budzie Łuhansk, Minsk ci Damask, jon, jak dobrasumlenny pracaŭnik svajho telekanała, staranna adpracoŭvaŭ zadačy rasijskaj prapahandy.