Viciebsk razam ź Minskam pryniali na siabie pieršy ŭdar pandemii ŭ Biełarusi. Fota Siarhieja Sierabro.
Na pasiadžeńni Viciebskaha abłasnoha štaba pa supraćdziejańni raspaŭsiudžvańniu karanavirusnaj infiekcyi vystupiŭ načalnik Hałoŭnaha ŭpraŭleńnia pa achovie zdaroŭja Viciebskaha abłvykankama Michaił Višniaviecki.
«Epidemijałahičnaja situacyja na Viciebščynie pry ŭsioj stabilnaści zastajecca składanaj. Z 1 krasavika da 12 maja vypisana bolš za 5400 pacyjentaŭ, jakija vylečylisia ad pnieŭmanii. Pracu pačali 308 miedykaŭ, jakija pieranieśli karanavirusnuju infiekcyju», — skazaŭ Višniaviecki, jak pieradaje dziaržaŭnaje vydańnie «Vićbičy».
Pry hetym čynoŭnik nie nazvaŭ dla presy ahulnaj kolkaści zachvarełych miedykaŭ, jak i kolkaści pacyjentaŭ, jakija pakul nie vylečylisia. Nie nazvaŭ jon i pakazčykaŭ śmiarotnaści.
U zajavie čynoŭnika źviartajuć uvahu dźvie ličby: 5400 i 308.
Dva dni tamu Viciebski abłasny adździeł achovy zdaroŭja ŭ asobie taho samaha Višniavieckaha paviedamlaŭ, što pa stanie na 11 maja 20% miedrabotnikaŭ, inficyravanych karanavirusam, «vyzdaravieli, u tym liku i ad pnieŭmanii, i raspačali rabotu».
Z supastaŭleńnia ličbaŭ ad 11 maja i 13 maja vynikaje, što ŭsiaho za pieryjad raspaŭsiudžvańnia infiekcyi na Viciebščynie karanavirusam byli inficyravany bolš za paŭtary tysiačy miedykaŭ.
U toj ža čas, pavodle apošnich dastupnych nam źviestak Minzdaroŭja, usiaho ŭ Viciebskaj vobłaści vyjaŭlena trochi bolš za 4000 vypadkaŭ karanavirusa.
Ci moža być, što bolš za treciuju častku chvorych składajuć miedrabotniki? Heta niemahčyma. Ni ŭ adnoj krainie niama takoj doli infikavanych miedykaŭ.
U toj ža čas ličba 308 składaje prykładna taki pracent ad ličby 5400, jaki blizki da ličby infikavanych miedrabotnikaŭ u inšych jeŭrapiejskich krainach — kala 5,7%.
Kali z zachvarełych miedrabotnikaŭ vyzdaravieli 20%, to łahična mierkavać, što i ad ahulnaj kolkaści chvorych za hety ž čas vylekavałasia prykładna takaja ž dola ludziej. Statystyčna niemahčyma, kab jana značna adroźnivałasia.
I voś druhaja anamalija.
Dva dni tamu, 11 maja, viciebskija ŭłady paviedamili pra 5000 virusnych (nie bakteryjalnych, nie bakteryjalnych i virusnych razam, a mienavita virusnych) pnieŭmanij na Viciebščynie ŭ krasaviku. Heta biez uliku sakavika — a ŭspyška pnieŭmanij karanavirusnaha charaktaru pačałasia ŭ Viciebsku, a paśla i ŭ vobłaści, prykładna ŭ siaredzinie sakavika, a da kanca sakavika nabyła charaktar epidemii. Pa słovach pradstaŭnikoŭ miascovych uład, situacyja zastajecca napružanaj i ŭ mai, što pradkazalna i vytłumačalna va ŭmovach adsutnaści žorstkich karancinnych mier.
Paŭtorymsia, što tolki ŭ krasaviku aficyjna było zarehistravana kala 5000 pnieŭmanij. Miž tym paćvierdžanych vypadkaŭ karanavirusa na Viciebščynie ŭsiaho 4000 z kapiejkami za sakavik, krasavik i maj razam.
Siońnia zajaŭlena pra 5400 ludziej, jakija «vylečylisia ad pnieŭmanii» za 42 dni.
I taja, i druhaja ličba značna pieravyšajuć aficyjnuju kolkaść chvorych na karanavirus na Viciebščynie.
Pry hetym z daśledavańniaŭ navukoŭcaŭ viadoma, što mienš čym u 20% chvorych na karanavirus raźvivajecca pnieŭmanija.
Kali zrabić prajekcyi hetych ličbaŭ na kolkaść dyjahnastavanych 5000 krasavickich pnieŭmanij, to atrymlivajecca kala 25 tysiač tearetyčnych nośbitaŭ karanavirusa na Viciebščynie tolki ŭ krasaviku. Hetyja ličby ŭ razy adroźnivajucca ad aficyjna zarehistravanych.
U adroźnieńnie ad mnohich inšych krain, Biełaruś nie zaličvaje chvorych na virusnyja pnieŭmanii ŭ statystyku zaražanych karanavirusam aŭtamatyčna. Miž tym tak robić, naprykład, Kitaj, pačynajučy ad 12 lutaha. U Biełarusi i karanavirusnyja, i niekaranavirusnyja pnieŭmanii lečać razam — i heta łahična ŭ dadzienaj situacyi. Ale pry hetym pnieŭmanii nie zaličvajuć u statystyku karanavirusa i śmiarotnaści ad jaho.
U toj ža čas vyniki biełaruskich testaŭ na COVID-19 časta dajuć supiarečlivyja vyniki (heta tema dla asobnaha rasśledavańnia).
Vyhladaje, što mienavita hetyja dźvie pryčyny lažać u asnovie «biełaruskaj statystyčnaj anamalii».
Heta tłumačyć, čamu biełaruskija balnicy, pryznačanyja dla lekavańnia COVID-19, nabližajucca da miažy zapaŭnieńnia, a ŭ niekatorych rajonach całkam zapoŭnienyja, choć abvieščanaja kolkaść chvorych našmat mienšaja za kolkaść pryznačanych dla ich lačeńnia łožkaŭ.
Pa stanie na 13 maja, u Biełarusi Ministerstva achovy zdaroŭja zajaviła pra 25 825 vypadkaŭ karanavirusa. Vyzdaravieli, pa toj ža infarmacyi, 7711 pacyjentaŭ.
Heta značyć, što ŭ stanie aktyŭna chvorych u krainie, aficyjna, znachodziacca 18 114 čałaviek.
Raniej Minzdaroŭja paviedamlała, što prykładna pałova chvorych prachodziać lačeńnie doma. U toj ža čas pa stanie na 2 maja było zaniata kala 12 800 łožkaŭ z 18 600 zareziervavanych dla karanavirusa. Možna mierkavać, što na siońnia dola zaniatych łožkaŭ (hetuju statystyku ŭ Biełarusi, u adroźnieńnie ad inšych jeŭrapiejskich ci azijackich krain, taksama ahučvajuć nierehularna) vyrasła, bo ad 2 da 13 maja ŭsie dni kolkaść novavyjaŭlenych chvorych stabilna pieravyšała kolkaść vyzdaraviełych.
Kali b biełaruskaja statystyka pa COVID-19 farmiravałasia chacia b jak u Kitai, to i ličby vyjaŭlenych chvorych, i pamierłych byli b inšyja, bolš realistyčnyja.
Čytajcie taksama:
Paśla intervju Tut.by zvolnili hałoŭnaha doktara Viciebskaj balnicy chutkaj dapamohi
«Taki cyrk vyklikaje šalenstva». Miedykaŭ Viciebska i Minska prymušajuć udzielničać u subotniku
U jakich rajonach i haradach Biełarusi situacyja ź pnieŭmanijami i karanavirusam asabliva ciažkaja ŚPIS
Što adbyvajecca ŭ Viciebsku? Infarmacyja ad uładaŭ skupaja, ludziej tryvožać šmatlikija pnieŭmanii
Śmierć ad karanavirusa: zasłužany artyst Biełarusi Viktar Daškievič
Žonka viciebskaha artysta, jaki ŭ reanimacyi z karanavirusam: My byli ŭ troch balnicach, jany pierapoŭnienyja
Łukašenka pra pamierłaha artysta Daškieviča: Čaho ty chodziš pa hetaj vulicy i tym bolš pracuješ?
Šarśnioŭ na sustrečy z SAAZ: Pieršych chvorych na COVID-19 u Viciebsku vyjavili ŭ lutym
List ź Biešankovič pad Viciebskam: «U nas tut situacyja, jak u 1941-m. Miedyki, nizki Vam pakłon!»
Dva tydni ŭ Viciebsku budzie iści paetapnaja sanapracoŭka COVID-balnic
