Hierman Alaksandraŭ u maładości
«Sa słovaŭ lekara, kliničnaja karcina chvaroby čysta karanavirusnaja», — skazała karespandentu «Svabody» dačka pałkoŭnika zapasu Hiermana Alaksandrava Julija.
Čytajcie taksama: Ad «pnieŭmanii ź nieŭdakładnienym uzbudžalnikam» pamior 53-hadovy načalnik upraŭleńnia Uzbrojenych Sił
Jaje maci pracuje ŭ kapeli imia Šyrmy, dzie na karanavirus zachvareła pałova kalektyvu. U jaje pry temperatury 39 test na karanavirus daŭ admoŭny vynik. U baćki analiz na karanavirus taksama byŭ admoŭny. Jak takoje moža być? — ździŭlajecca dziaŭčyna.
52-hadovy Hierman Alaksandraŭ, jaki ŭznačalvaŭ upraŭleńnie Ŭzbrojenych Sił pa vykarystańni pavietranaj prastory, byŭ pałkoŭnikam zapasu, pamior ad pneŭmanii ŭ mienskim Vajskovym špitali.
Hierman Alaksandraŭ skončyŭ Čarnihaŭskaje vyšejšaje vajskovaje avijacyjnaje vučylišča lotčykaŭ, prachodziŭ słužbu na lotnych pasadach u 126-j źniščalnaj avijacyjnaj dyvizii 16-j pavietranaj armii. Za čas lotnaj pracy asvoiŭ samaloty Ł-39, MiH-23 i MiH-29 roznych madyfikacyj, mieŭ kvalifikacyju vajskovaha lotčyka pieršaj klasy. Hierman Alaksandraŭ skončyŭ Biełaruski kamercyjny ŭniversytet kiravańnia i Akademiju kiravańnia pry prezydencie.
«Jon zachvareŭ 21 krasavika. Na vychodnych u jaho padniałasia temperatura, u paniadziełak jon jašče znachodziŭsia z temperaturaj doma. A ŭ aŭtorak jaho pakłali ŭ vajskovy špital u infekcyjnaje adździaleńnie, tam uziali test na karanavirus. Test byŭ hatovy tolki tady, kali jon užo lažaŭ na ŠVŁ, praktyčna praz tydzień. Va ŭsiakim razie, vynik testu ja daviedałasia ad lekara reanimacyi, što jon admoŭny. Ale, sa słovaŭ doktara, kliničnaja karcina chvaroby čysta karanavirusnaja», — skazała karespandentu «Svabody» dačka Julija.
Hierman Alaksandraŭ
Hierman Alaksandraŭ trapiŭ spačatku ŭ pałatu intensiŭnaj terapii, dva dni lažaŭ tam pad kisłarodnaj maskaj. Tady jon jašče kantaktavaŭ sa svajakami. A potym jon byŭ 12 dzion na ŠVŁ u reanimacyi, dzie i pamior.
«Niahledziačy na taki vynik, my ŭdziačnyja lekaram. Ja ŭvieś čas razmaŭlała ź lekaram-reanimatolaham. Mnie zdajecca, što jany rabili ŭsio, što mahli, ale chvaroba akazałasia macniejšaj».
U paśviedčańni ab śmierci zapisana lohačna-sardečnaja niedastatkovaść i pneŭmanija. Cieła niabožčyka vydali ŭ pakiecie, u zakrytaj trunie.
«Kali ja ŭ lekara pytałasia, ci mahčymaje pieralivańnie plazmy, pra jakoje šmat pišuć u ŚMI, jon skazaŭ, što jość dźvie pryčyny, pa jakich heta niemahčyma. Pieršaja — heta admoŭny test. Lekary nia mohuć zamović plazmu, kali test na COVID-19 admoŭny. A pa-druhoje, u jaho byli asabistyja supraćpakazańni, jamu kałoli procitrombavy preparat, i ŭ jaho byŭ vysoki pakazčyk praduktaŭ raspadu», — kaža Julija.
Pryčyna ŭźniknieńnia pneŭmanii, pavodle lekaraŭ, niezrazumiełaja. Hiermanu Alaksandravu zrabili tolki renthien. Kali jon pastupiŭ u špital, to pneŭmanii jašče nie było.
«Praz tydzień, kali jaho ŭžo pieravodzili ŭ intensiŭnuju terapiju, pneŭmanija ŭžo była. Ale, nakolki ja razumieju, doktary bolš aryjentavalisia na pakazalnik kisłarodu ŭ kryvi. Kali jon pačaŭ źmianšacca, jaho pieraviali ŭ intensiŭnuju terapiju. Jakaja ŭ vyniku ŭ jaho była pneŭmanija, ja nia viedaju. Ale kali jaho pakłali na ŠVŁ, to, ja dumaju, karcina była drennaja».
Pavodle Julii, u baćki nie było chraničnych zachvorvańniaŭ. Adkul mahła ŭziacca pneŭmanija?
«My nia viedajem, adkul heta mahło ŭziacca. Baćka chadziŭ na słužbu, hetaha nichto nie admianiaŭ. Ale jon nia byŭ niejkim nihilistam, jakija admaŭlajuć isnavańnie virusu, chadziŭ usiudy ŭ mascy, jeździŭ na asabistym transparcie, dezynfikavaŭ ruki i ŭsio što mahčyma. Ale ja dumaju, što naŭrad ci jon moh zarazicca na pracy. U ich nasamreč nichto nie chvareje. I baćka, kali adčuŭ siabie drenna, zastaŭsia doma».
U pres-słužbie Ministerstva abarony karespandentu «Svabody» skazali, što ŭ kalehaŭ Hiermana Alaksandrava virus nia znojdzieny. Ale Julija sumniavajecca, što ŭ ich naohuł brali test.
«Maja maci pracuje ŭ charavoj kapeli imia Šyrmy Biełdziaržfilarmonii, dzie bolš za pałovu było zaražanych karanavirusam. U jaje brali test, i jon byŭ admoŭny. Ale jana lažała z temperaturaj 39 da jaho ciaham čatyroch dzion. Ale ŭ jaje na hetym usio i skončyłasia, temperatura prajšła. My, kaniečnie, byli aburanyja. Zrazumieła, što jość ekanomika i jeści niešta treba. Tamu heta naša versija, što heta mahło być i adtul. My pračytali ŭ internecie, što da testu treba rychtavacca, nielha pierad im vypałoskvać horła, nie rabić inhalacyju. Ale mama heta rabiła, bo jaje nie papiaredžvali», — kaža Julija.
Julija taksama zhadała pra vajskovy parad na 9 traŭnia.
«Mnie było ciažka hladzieć na hety biazhłuzdy parad, bo na toj momant moj tata lažaŭ na ŠVŁ. Maja babula była ŭdzielnicaj vajny, jana veteran. Jana i siabry jaje pakaleńnia canili žyćcio, kožnaje asobnaje žyćcio, bo viedali jaho canu. Dziadula byŭ hienerałam avijacyi, veteranam Uzbrojenych sił. Jany nikoli ŭ žyćci na parady nie chadzili, tym bolš u takoj abstanoŭcy. Atrymlivajecca, što z veteranaŭ robiać starych marazmatykaŭ, jakim padavaj parad. Ale heta nia tak. Ja dumaju, što nivodzin razumny čałaviek nia ładziŭ by padčas epidemii masavaje mierapryjemstva», — skazała Julija.
