Dziaržaŭny kamitet pa majomaści miesiac tamu paviedamlaŭ, što 99,83% akcyj dziaržaŭnaha «Parytetbanka» pradadzienyja kampanii Beristore Holdings Limited, dzie asnoŭny bienieficyjar — heta syn Michaiła Huceryjeva, Said.
Stała viadoma, za jakuju sumu pradali bank — heta $50 miljonaŭ.
Pra heta paviedamlaje telehram-kanał HARBACEVIČ.
«Našaj Nivie» hetuju infarmacyju paćvierdzili biźnies-partniory Saida Huceryjeva.
Ale $50 miljonaŭ — heta mała ci zašmat?
Na hetaje pytańnie adkazvaje finansavy analityk kamanii Duff & Phelps Maksim Adaskievič.
«Suma ŭhody $50 miljonaŭ aznačaje, što Huceryjeŭ kupiŭ bank za sumu, blizkuju da pamieru 100% jaho kapitału — $53 miljony.
Kab acanić, nakolki heta rynkavaja acenka, pahladzim na kiejs «Bielinviestbanka»: dziaržava prosić u JEBRR za «Bielinviestbank» tyja ž 100% kapitału (heta $260 miljonaŭ), pry hetym JEBRR prapanoŭvaŭ tolki pałovu ad hetaj sumy.
A «Bielinviestbank» našmat bolš prybytkovy za «Parytetbank» (rentabielnaść kapitału 7,3% suprać 0,5% ).
Kali hladzieć na toje, za kolki kuplajucca banki Uschodniaj Jeŭropy, to kala 80% kapitału — heta stol. I toje, stolki płaciać tolki za značna bolš prybytkovyja banki, čym biełaruskija dziaržbanki.
U minułym hodzie toj ža JEBRR zapłaciŭ 80% kapitału za adzin ź sierbskich bankaŭ z rentabielnaściu kapitału ŭ 12%, i za tyja ž 80% kapitału adzin z makiedonskich bankaŭ z rentabielnaściu kapitału ŭ 14% byŭ nabyty francuzskim Societe Generale. I heta da kryzicy.
Takim čynam, acenka «Parytetbanka» vyhladaje zavyšanaj z punktu hledžańnia rynkavaha koštu, jaki, na maju dumku, składaje nie bolš za pałovu kapitału (heta značyć $20 — $25 miljonaŭ), kali aryjentavacca na pakazčyki banka i paraŭnalnyja ŭhody pa kupli inšych bankaŭ», — ličyć Adaskievič.
