COVID-19: pamierła 62-hadovaja žančyna ŭ Hrodnie, jakaja zaraziłasia ad syna, supracoŭnika «Azota»

Maryja Bakanaŭskas pamierła ŭ traŭni ŭ adnoj z balnic Hrodna. Joj było 62 hady i ŭ jaje byŭ COVID-19. Jaje syn Andrej upeŭnieny: mama zaraziłasia ad jaho. Mužčyna moh kantaktavać ź virusam na pracy: zaražanyja byli ŭ jaho źmienie. Hrodna.Life zapisaŭ historyju siamji, jakaja sutyknułasia z karanavirusam.

Andrej raspavioŭ Hrodna.life, što pieršyja simptomy, padobnyja da prajaŭ karanavirusa, źjavilisia ŭ jaho 24 krasavika. Jamu stała błaha, padniałasia tempieratura, ale jon pajšoŭ na pracu. A potym źviarnuŭsia da ŭrača.

«U paliklinicy ja raspavioŭ pra simptomy, — kaža Andrej. — Kazaŭ, što moža być karanavirus, bo na pracy ŭžo chvareli ludzi [jon pracuje ŭ adnym z cechaŭ «Hrodna Azot» — red.] i moža varta pakłaści mianie ŭ balnicu. Doma baćki, ja chvalavaŭsia za ich».

U paliklinicy Andreja supakoili, skazali - ničoha strašnaha. Adpravili na balničny, a ŭ daviedcy napisali - vostraje reśpiratornaje zachvorvańnie. Na balničnym jon byŭ doma, prymaŭ leki. Tempieratura to spadała, to padymałasia.

«Tak praciahvałasia niekalki dzion. Ja znoŭ pajšoŭ u palikliniku i tam daviedaŭsia, što ŭ nas u cechu niekalki čałaviek zachvareła, a adzin sa źmieny byŭ sa stanoŭčym testam na COVID-19. Ja prasiŭ, kab i mianie pravieryli, bo ja kantaktavaŭ z hetym čałaviekam. Ale mianie znoŭ supakojvali. Kazali, ničoha strašnaha».

Baćkoŭ zabrali ŭ balnicu

Pavialičyć

Praz šeść dzion paśla pieršych simptomaŭ Andreju stała lahčej, ale prablemy pačalisia ŭ jaho baćkoŭ. Spačatku stała drenna baćku — pačaŭsia kašal. Jamu vyklikali chutkuju, ale nie špitalizavali.

«Miedykam ja adrazu skazaŭ, što heta moža być karanavirus. Jany skazali, što testy nie robiać. U vyniku baćku vypisali leki. Praź niekalki dzion vyklikali lekara mamie. Pryjšła žančyna i navat nie prasłuchała jaje lohkija. Skazała, što ŭsio narmalna. Kali b mnie mama adrazu skazała, što ź joj tak abyšlisia, to ja b prosta nie vypuściŭ hetaha lekara z domu».

Mamie Andreja, jak i baćku, vypisali leki. Jany nie dapamahali. Stanaviłasia horš, ale chutkuju vyklikać dla siabie jana nie vyrašałasia, dumała ŭsio projdzie.

«3 maja my vyklikali chutkuju dla mamy, ja jaje ŭsio-tki ŭhavaryŭ. Skazaŭ, što treba jechać u balnicu. Jaje špitalizavali, a praz dva dni patelefanavali i skazali, što ŭ jaje stanoŭčy test na COVID-19.

Tolki tady da nas pryjechali dadomu i ŭziali testy ŭ mianie i ŭ baćki. Skazali być 14 dzion doma na karancinie».

Andrej pačaŭ telefanavać u chutkuju i nastojvać, kab baćku taksama špitalizavali.

«Baćku zabrali dziakujučy nakiravańniu ad lekara, jaki braŭ testy ŭ našaj siamji. Baćku pakłali ŭ inšuju balnicu. Pieršyja dni z mamaj usio było dobra. My ź siastroj telefanavali i cikavilisia, jak jana. Ale 7 traŭnia nam paviedamili, što mamie stała ciažka dychać i jaje pieraviali ŭ reanimacyju — padklučyli da ŠVŁ [aparata štučnaj vientylacyi lohkich]».

U balnicy addali nie ŭsie rečy

Ranicaj 14 traŭnia Andreju patelefanavali ź lakarni i skazali, što jaho mama pamierła. Na nastupny dzień pieradali cieła. Chavali žančynu ŭ zakrytaj trunie.

«Cieła pakłali ŭ pakiet i navat pahladzieć jaje było nielha. Dla našaj siamji ŭśviedamlać heta było vielmi ciažka, asabliva dla babuli i jaje siastry. Samaje niepryjemnaje, što ŭ paśviedčańni ab śmierci napisali «spynieńnie serca». Čamu tady ŭ zakrytaj trunie chavali? A voś u daviedcy z morha — lohačnaja niedastatkovaść — COVID-19».

Andrej kaža, što jaho mama praktyčna nie chvareła i da hetaha dobra siabie adčuvała.

«Kali my pryjechali ŭ balnicu, kab zabrać rečy, nam ničoha nie chacieli addavać. Vydali tolki kurtku i abutak — toje što było ŭ harderobie. A jana ž u balnicu z saboj brała cełuju sumku, telefon, pašpart i klučy ad doma. Malić davodziłasia lekaraŭ, kab pahladzieli, dzie mamčyny rečy. Sorak chvilin my čakali, a potym muž majoj siastry z-

za ŭsiaho hetaha biazładździa pajšoŭ da administracyi. Nam usio ž taki viarnuli pašpart i telefon, a dzie astatnija rečy nichto nie viedaje».

Baćka Andreja taksama trapiŭ u reanimacyju, ale zdoleŭ pieramahčy virus. Jon viarnuŭsia dadomu ŭ kancy traŭnia.

«Baćka ŭvieś čas sam dychaŭ, jamu pieryjadyčna kisłarodnuju masku adziavali. My jamu da apošniaha nie kazali, što mama pamierła. Tolki kali jaho vypisali, my skazali praŭdu. Praz dva tydni. Jon dahetul vielmi pieražyvaje».

«Nie varta dumać, što virus niedzie daloka»

Andrej uspaminaje, što kali ŭ Hrodnie tolki źjavilisia pieršyja ludzi z paćvierdžanym COVID-19, jon adrazu staŭ chvalavacca za baćkoŭ. Staraŭsia chadzić tolki na pracu i ŭ kramu, a hramadskim transpartam nie karystacca.

«Ja dumaju, na pradpryjemstvie mahli zrabić karancin. «Hrodna Azot» nie vyrablaje niešta takoje, biez čaho ludzi nie zmahli b žyć. Mahčyma, ja i padchapiŭ virus tam i pieradaŭ jaho baćkam. Ale stanoŭčy test byŭ tolki ŭ mamy. Navat ciapier ja liču, što ludziam treba mienš vychodzić na vulicu, a ŭ kramach i transparcie być u mascy i palčatkach. Nie varta dumać, što hety virus niedzie daloka, jon pobač. Jašče pika niama. I pakolki ŭ nas niama nijakich mier, nieviadoma kali ŭsio heta projdzie».

• 0
• 0
• 0
• 0
• 0
• 0
• 0
• 0