Hałoŭny epidemijołah Šviecyi: Ja nie kazaŭ pra niapravilnaść «miakkaha karancinu» 

Hałoŭny epidemijołah Šviecyi Anders Tehnieł učora daŭ karotkaje intervju miascovaj radyjostancyi i pryciahnuŭ da siabie ŭvahu ŭsiaho śvietu: žurnalisty interpretavali jahonyja słovy jak pryznańnie pamyłak, učynienych uradam u baraćbie z karanavirusam, piša Bi-bi-si.

Apošnija niekalki dzion u Šviecyi śmiarotnaść ad Covid-19 była samaj vysokaj u śviecie ŭ pieraliku na dušu nasielnictva. Heta novaja nahoda dla krytyki ŭładaŭ krainy, jakija padtrymali pazicyju Tehnieła i nie stali ŭvodzić abmiežavalnych mier, dazvoliŭšy ludziam svabodna pierasoŭvacca pa krainie.

Tehnieł sapraŭdy raspavioŭ žurnalistam, što sioje-toje, vierahodna, možna było zrabić inakš, ale takuju ​​zajavu jon zrabiŭ daloka nie ŭpieršyniu i vybiraŭ vielmi akuratnyja farmuloŭki. Dyk čamu ŭvieś śviet vyrašyŭ, što praciŭnik łakdaŭnaŭ prosić prabačeńnia za pamyłki?

Anders Tehnieł niekalki miesiacaŭ tamu skazaŭ «nie» łakdaŭnu i samaizalacyi. Hetaj pazicyi jon prytrymlivajecca da hetaha času i za jaje nie prosić prabačeńnia.

U intervju «Radyjo Šviecyja» jon pryznaŭ, što ŭ baraćbie z karanavirusam kraina ŭžo straciła šmat ludziej. Jon navat pryznaŭ, što kali b pieršapačatkova ŭ palitykaŭ i navukoŭcaŭ było b takoje ž razumieńnie pryrody chvaroby, jak ciapier, vierahodna, kraina mahła b pajści inšym šlacham.

«Kali b my sutyknulisia z toj ža chvarobaj, majučy tyja ž viedy, jakija ŭ nas jość siońnia, ja miarkuju, my b vybrali niešta siaredniaje miž tym, što zrabiła Šviecyja, i tym, što abraŭ astatni śviet», — zajaviŭ jon.

U intervju Tehnieł vykarystaŭ akuratnyja farmuloŭki: naprykład, jon skazaŭ, što jość patencyjał palepšyć pryniatyja ŭ Šviecyi miery. Praŭda, jon nie ŭdakładniŭ, jak mienavita varta było b skarektavać stratehiju, a niekalkimi hadzinami paźniej na pres-kanfierencyi paćvierdziŭ, što ciapierašni padychod ličyć samym pravilnym dla krainy.

Jon paprasiŭ nie ŭsprymać jaho papiaredniuju zajavu jak admovu ad ciapierašniaj stratehii. Na dumku šviedskaha epidemijołaha, pakul jašče zanadta rana rabić vysnovy pra toje, ci mieli racyju krainy, jakija vystupili za žorstkija abmiežavańni: «Za apošnija try-čatyry miesiacy my zrazumieli, što hetaja chvaroba ź vialikaj vierahodnaściu moža pačać znoŭ raspaŭsiudžvacca».

Niahledziačy na ​​toje, što mnohija suśvietnyja ŚMI zaraz pišuć, što Tehnieł nie prosta pryznaŭ pamyłku, ale zrabiŭ heta ŭpieršyniu, hetyja śćviardžeńni nie adpaviadajuć rečaisnaści. Anałahičnyja zajavy epidemijołah rabiŭ i raniej, naprykład, kazaŭ, što zusim nie ŭpeŭnieny ŭ absalutnaj pravilnaści šviedskaj stratehii, padkreślivaje Bi-bi-si.

Poł Frens, epidemijołah u Łundskim univiersitecie Šviecyi, zhodny, što žurnalisty niapravilna zrazumieli zajavu Tehnieła: «Viadoma, kazać, što Tehnieł paprasiŭ prabačeńnia — heta niapravilna. Jon nie prasiŭ prabačeńnia za šviedskuju stratehiju i nie skazaŭ ničoha hrandyjoznaha. Pytańnie, jakoje treba zadać, hučyć tak: čamu ludzi tak začapilisia za hetyja słovy i adreahavali na ich?

U Šviecyi, dzie žyvie krychu bolš za 10 młn čałaviek, karanavirus paćvierdžany ŭ 40 tys. Pamierli ad chvaroby 4,5 tys. čałaviek.

Dla paraŭnańnia: u susiednich Danii, Narviehii i Finlandyi, dzie byŭ abvieščany łakdaŭn, na dadzieny momant našmat mienš śmierciaŭ. U Danii pamierli 580 čałaviek, u Narviehii — 237, u Finlandyi — 321. U Šviecyi ž tolki ŭ sieradu ad COVID-19 pamierli 74 čałavieki.

• 0
• 0
• 0
• 0
• 0
• 0
• 0
• 0