«Pieradvybarnaja kampanija»: zatrymańni, pieratrusy ŭ praciŭnikaŭ Łukašenki pa ŭsioj krainie

Siurpryzam dla hramadstva stali čerhi da vybarčych pikietaŭ praciŭnikaŭ Alaksandra Łukašenki. Prychilniki pieramien zrazumieli, što ich nie prosta šmat, a absalutnaja bolšaść. Pabačyŭ heta i Alaksandr Łukašenka. 30 i 31 maja ludzi stajali ŭ čerhach, kab padpisacca. A 1 červienia adzin z pretendentaŭ na pasadu prezidenta, Alaksandr Łukašenka, vyklikaŭ da siabie kiraŭnika Kamiteta dziaržaŭnaj biaśpieki Valeryja Vakulčyka.

Vakulčyk pra pikiety: Ničoha dziŭnaha nie adbyvajecca

Siarhiej Cichanoŭski — adzin z samych papularnych u krainie videabłohieraŭ. Jon zaklikaŭ da vuličnych akcyj pratestu suprać režymu Alaksandra Łukašenki i kazaŭ, što pieramien možna dabicca tolki šlacham vuličnych pratestaŭ i zabastovak, što nadziei na spraviadlivy padlik hałasoŭ pry hetaj sistemie niama. 

Kali Cichanoŭskaha aryštavali na 15 sutak pierad abviaščeńniem prezidenckich vybaraŭ, kab nie dać jamu mahčymaści bałatavacca, dakumienty na rehistracyju padała jaho žonka Śviatłana Cichanoŭskaja — nastaŭnica, jakaja ciapier siadzić doma z małymi dziećmi. Jana vyrašyła zrabić toje, pra što maryŭ jaje muž. Jarmošynaj nie zastavałasia vybaru, akramia jak jaje zarehistravać.

Ale kampaniju vioŭ sam Siarhiej. Jon naniaŭ aŭtadom i jeździŭ na im z horada ŭ horad. Sotni ludziej źbiralisia viečarami na płoščach haradoŭ, kab pastavić podpis i pahavaryć ź im. Z saboj jany brali tapki, jakimi bjuć tarakanaŭ. Paśla taho jak piensijanierka z Hłybokaha zhadała dziciačy vierš «Tarakanišča» — pra toje, jak adno maleńkaje nasiakomaje pahrozami trymaje ŭ strachu vialikich źviaroŭ — Cichanoŭski zrabiŭ tapak simvałam svajoj kampanii. Hety vobraz vyklikaŭ i śmiech, i entuzijazm ludziej.

29 maja Siarhieja Cichanoŭskaha zatrymali ŭ Hrodnie. Ale pravakacyja, jakaja papiaredničała zatrymańniu, trapiła na videa, i za noč karystalniki internetu identyfikavali žančynu ź Minska, jakaja adyhrała ŭ joj centralnuju rolu.

Čytajcie taksama: «Pryjemnaja dziaŭčyna pyšnych form». Identyfikavali pravakatarku z sustrečy ź Cichanoŭskim

Niahledziačy na jaho zatrymańnie, u subotu i niadzielu ludzi znoŭ masava stajali ŭ čerhach, kab padpisacca za Śviatłanu Cichanoŭskuju. Heta zdaryłasia ŭ Minsku, Breście, Homieli, Hrodnie, Viciebsku, Mahilovie, Žodzinie, Lidzie, Maładziečnie, Stoŭbcach, Hłybokim, Žłobinie, inšych haradach.

Čytajcie taksama: Čerhi, kab padpisacca «suprać Łukašenki». FOTY, VIDEA ź Minska, Viciebska, Bresta, Žłobina, Stoŭbcaŭ, inšych haradoŭ…

Ludzi ŭ čerhach byli nastrojenyja radykalna. «Kolki možna? Kolki ŭžo možna? Voś čamu ja tut!» — adkazała karespandentu «Našaj Nivy» žančyna ŭ čarzie da punkta zboru podpisaŭ za Śviatłanu Cichanoŭskuju ŭ Minsku. Jana skazała, što źbirajecca «pastavić podpis i za Babaryku, i za Capkału. Chto zaŭhodna, tolki nie jon [Alaksandr Łukašenka]».

Čytajcie taksama: 78-hadovaja žančyna pra Łukašenku: «Kolki ž jon budzie nas mučyć?» VIDEA

Zatrymańnie Siarhieja Cichanoŭskaha dało taksama impuls abjadnańniu alternatyŭnych kandydataŭ.

Valeryj Capkała z žonkaj publična addali svaje podpisy Śviatłanie Cichanoŭskaj.

Papularny lidar chryścijanskich demakrataŭ Pavieł Sieviaryniec zaklikaŭ ludziej pa ŭsioj krainie ŭ niadzielu a 12-j hadzinie źbiracca na pikietach pa zbory podpisaŭ za Śviatłanu Cichanoŭskuju.

Supolny pikiet alternatyŭnych kandydataŭ pa zbory podpisaŭ zapłanavany i na 5 červienia, 18.00, kala HUMa.

A bankir i miecenat Viktar Babaryka, jaki, pavodle źviestak internet-apytańniaŭ, vyrvaŭsia ŭ lidary prezidenckaj kampanii, nazvaŭ zatrymańnie Cichanoŭskaha «niezakonnym» i paabiacaŭ jurydyčnuju i finansavuju padtrymku ŭsim, kaho začepiać represii ci na kaho buduć cisnuć.

Hramadzianskaja supolnaść adreahavała mabilizacyjaj. Pakazalny epizod: na sajcie syna Babaryki ludzi sabrali hrošy na štraf pikietoŭcu za 10 chvilin.

Nahadajem, 1 červienia adzin z pretendentaŭ na pasadu prezidenta, Alaksandr Łukašenka, vyklikaŭ da siabie staršyniu KDB. I voś što adbyłosia za 2 i 3 červienia.

Siłaviki pravodziać pieratrus u Cichanoŭskich. Pryjechali na vaśmi mašynach.

Kala doma palityka Jaŭhiena Afnahiela ŭ Minsku ź viečara 2 červienia dziažurać nieviadomyja ŭ cyvilnym. Niekalki mašyn ź ludźmi, padobnymi na supracoŭnikaŭ milicyi, stajać na bližejšych da doma skryžavańniach i kala ŭvachodu. 

Ranicaj 3 červienia byŭ zatrymany Valancin Trocki.

U Połacku troje ŭ cyvilnym pryjechali dadomu da błohiera Alesia Krutkina. Kala 6 viečara jaho zatrymali. U zatrymańni brali ŭdzieł i supracoŭniki AMAP.

U Minsku ŭ milicyju vyklikali ŭdzielnikaŭ pikieta 31 maja Valeryja Rabcava i Siarhieja Mackojcia.

U Navapołacku zatrymany Andrej Zujeŭ — vałancior inicyjatyŭnaj hrupy Śviatłany Cichanoŭskaj. Raniej Andrej Zujeŭ adbyŭ 7 sutak aryštu za ŭdzieł u strymie Cichanoŭskaha.

U Navapołacku zatrymany siabra inicyjatyŭnaj hrupy Śviatłany Cichanoŭskaj Artur Sinieha. 

U Minsku zatrymanyja žychary Łahojskaha rajona, aktyvisty Maładoha Frontu Maksim i Dzianis Urbanovičy.

Pad aryštam zastajucca i siem čałaviek, zatrymanych 29 maja ŭ Hrodnie.

I, narešcie, na leciščy Cichanoŭskaha «znajšli» $900 tysiač.

Heta ŭžo druhaja chvala zastrašvańnia. Pieršaja adbyłasia pierad 9 Maja — tady va ŭsioj krainie štrafavali i sadzili na sutki ludziej, jakija krytykavali Alaksandra Łukašenku i ekanamičnuju palityku ŭładaŭ, skardzilisia na biezhaspadarčaść u videa, źniatych Cichanoŭskim. Ale tady nie było kryminalnych spraŭ. Ciapier i takuju zaviali — abvinavačvajuć va ŭžyvańni siły suprać milicyi. 

Pakolki ŭsie sustrečy Cichanoŭskaha ź ludźmi zdymalisia na videa, pravaabaroncy nijakaha ŭžyvańnia siły nie vyjavili i tamu pryznali zatrymanych palityčnymi źniavolenymi. Heta daje padstavy dla dapamohi im i ich siemjam z boku mižnarodnaj supolnaści.

Padčas minułych vybarčych kampanij pieratrusaŭ u pretendentaŭ na pasadu prezidenta nie byvała. U hetym sensie sioletniaja kampanija biesprecedentnaja. Analityki źviazvajuć takija zachady z padzieńniem papularnaści jak Alaksandra Łukašenki, tak i stvoranaj im sistemy. Pa lubovi nie atrymałasia, pajšła ŭ chod siła.

• 0
• 0
• 0
• 0
• 0
• 0
• 0
• 0