27 traŭnia, paśla praciahłaj chvaroby, pajšła z žyćcia biełaruska-amierykanskaja opiernaja śpiavačka (saprana) Iryna Mozyleva. Pra jaje ŭzhadvaje Viačasłaŭ Bortnik.
Iryna naradziłasia 31 traŭnia 1968 hoda ŭ Miorach Viciebskaj vobłaści. Jejny talent śpiecyjalisty razhledzieli, kali joj było 6 hadoŭ. Paśla śpiecyjalnaj muzyčnaj škoły-internata i kaledža Iryna trapiła ŭ Maskoŭskuju kansiervatoryju. Adtul jana adpraviła kasietu sa svaimi śpievami ŭ škołu Džulijarda ŭ Ńju-Jorku, i jaje zaprasili vučycca ŭ Amieryku. Praciahvała vučobu ŭ prystyžnym Instytucie muzyki Kiorcisa ŭ Fiładelfii, atrymaŭšy tam poŭnuju stypiendyju.
U 1997 hodzie Iryna pierajechała ŭ Ńju-Jork, dzie adrazu ŭstalavała kantakty ź biełaruskaj dyjasparaj. Niahledziačy na ščylny raskład (jana ŭžo vystupała ŭ «Karnehi chole» dy «Linkoln centry»), zaŭsiody znachodziła čas, kab paśpiavać na sustrečach biełarusaŭ Paŭnočnaj Amieryki, śviatkavańniach 25 Sakavika dy inšych biełaruskich imprezach u Ńju-Jorku i Ńju-Džersi. Mnohija dasiul pamiatajuć «Moj rodny kut» i «Zorku Vienieru» ŭ jejnym vykananni.
Iryna taksama zajmałasia vykładnickaj dziejnaściu, kiravała carkoŭnym choram. U 2016 hodzie, straciŭšy zdolnaść śpiavać z-za radykalnaj chirurhičnaj apieracyi, Iryna pieranakiravała svaju tvorčaść na dyzajn adzieńnia. Čatyry dni jana nie dažyła da svajho 52-hodździa.
U Iryny zastaŭsia muž Arja i dačka Lija, jakija žyvuć u Bikanie, štat Ńju-Jork, a taksama baćka Mikałaj i siastra Tamara, jakija žyvuć u Biełarusi.
My nie časta bačylisia z Irynaj, bo žyli ŭ roznych krainach, a paśla ŭ roznych štatach, ale ŭsie sustrečy byli niezabyvalnyja. Daviałosia paznajomicca i ź jejnaj maci Lijaj (my sustrakalisia ŭ Miensku).
Iryna nazaŭsiody zastaniecca ŭ maim sercy. Jana była čałaviekam vialikaj dušy i svaim talentam prasłaviła rodnuju Biełaruś. Viečnaja pamiać!
Ciapier čytajuć
«Jany čamuści dumajuć, što ich zaraz zhvałciać». Prapahanda kinułasia tušyć abureńnie biełarusaŭ 150 tysiačami pakistancaŭ16
Kamientary