Dačka biznesoŭca-ŭciekača Aviarjanava za 700 tysiač niaspłačanych padatkaŭ praviadzie ŭ kałonii 2 hady
Frunzenski rajonny sud 12 červienia asudziŭ na dva hady hady źniavoleńnia za niaspłatu padatkaŭ u asabliva vialikim pamiery pradprymalnicu Viktoryju Aviarjanavu, dačku viadomaha biznesmena Juryja Aviarjanava. Joj prysudzili 3 hady kalonii, ale hod źniali pa amnistyi. Straty pryznali na 700 tysiač, pieradaje Radyjo Svaboda.
Aviarjanaŭ u 2017 hodzie źjechaŭ u Niamieččynu i nie viartajecca ŭ Biełaruś, dzie suprać jaho taksama zaviali spravu za niaspłatu padatkaŭ. Viktoryja Aviarjanava z 2018 hodu žyła ŭ Rasiei, ale nadalej kiravała biełaruskimi firmami «Bistrof» i «Inteks» i praz apošniuju — mienskimi načnymi klubami «Medysan», «Afrykana» i «Tabu».
Pradprymalnicu abvinavacili ŭ niaspłacie padatkaŭ u asabliva vialikim pamiery. Pavodle śledztva, za peryjad z 2010 pa 2015 hod firma «Inteks» pad kiraŭnictvam Aviarjanavaj nia vypłaciła ŭ biudžet zvyš 892 tysiač rubloŭ. Nibyta ŭtojvałasia vyručka za akazanyja pasłuhi, što dazvalała značna pamienšyć padatki.
Baćka asudžanaj, viadomy ŭ Biełarusi pradprymalnik Jury Aviarjanaŭ, vałodaŭ parkam zabavaŭ «Drymłend», kantralavaŭ «Handlovy śviet — «Kolca»», aŭtarynak u Malinaŭcy, budaŭničy rynak va Ŭruččy dy inšyja aktyvy. Hieneralnaja prakuratura Biełarusi abvinavačvaje Juryja Aviarjanava ŭ niaspłacie padatkaŭ u asabliva vialikim pamiery, a taksama ŭ złoŭžyvańni słužbovym stanoviščam, i damahajecca ad Niamieččyny jahonaj vydačy ŭ Biełaruś.
Da zatrymańnia Viktoryja Aviarjanava žyła ŭ Maskvie z dvuma niepaŭnaletnimi dziećmi. U 2019 hodzie na zapyt biełaruskich pravaachoŭnikaŭ jaje dvojčy zatrymlivali, ale vyzvalali rašeńniem sudu. Paśla treciaha zatrymańnia ŭ kancy 2019 hodu Aviarjanavu ekstradavali ŭ Biełaruś.
Sud nad Viktoryjaj Aviarjanavaj ciahnuŭsia amal miesiac. U spravie było 10 tamoŭ, u joj prachodzili kala 40 śviedak, niekatoryja ź ich u sud nie źjavilisia, sud zasłuchaŭ ichnyja pakazańni, dadzienyja na śledztvie.
Kamientary