Łukašenka pra Babaryku: Niahodnik. Kali rylca ŭ puchu, nie leź u prezidenty
Alaksandr Łukašenka padčas sustrečy ź dziaržaŭnymi žurnalistami ŭ Połacku vykazaŭsia pra Viktara Babaryku i pieratrus u Biełhazprambanku, nie nazyvajučy imia svajho asnoŭnaha kankurenta na vybarach. Cytaty pryvodzić BiełTA.
«Što mianie ŭraziła: hety niahodnik, inakš nie nazavu: ja, maŭlaŭ, ni pry čym, da mianie pretenzij nichto nie maje, heta jany tam…», — zajaviŭ Łukašenka.
Uskosna jon paćvierdziŭ, što pad udar trapili byłyja namieśniki Babaryki ŭ banku. Pavodle čutak, u dačynieńni da dvuch ź ich raspačatyja kryminalnyja spravy.
«Słuchajcie, jany ŭsie byli nie tolki ŭ jaho namieśnikami. Heta adna šajka-lejka. My heta bačym z 2016 hoda. My heta bačyli. Navošta ž ty na ich vališ siońnia. Ty byŭ kiraŭnikom, jany ŭ ciabie namieśnikami. I ŭsio, što tam tvaryłasia, mahło biez kiraŭnika adbyvacca? Nie», — adznačyŭ Łukašenka.
Pavodle jaho słoŭ, jość poŭnaja infarmacyja, što «heta byli jaho (Babaryki — NN) zadumy, jon utvaryŭ hetyja strukturnyja prakładki typu «PryvatLizinha».
«Pracavali pa hetym banku i pa ich z 2016 hoda. Vyjavili vyvad hrošaj, zamiežnyja rachunki, zamiežnaja ŭłasnaść ich. Na Kipry. U Łatvii rachunki, Łondanie… — raskazaŭ Łukašenka. — Ale zamiežniki infarmacyju nam (z 2016 hoda my prasili) — dali tolki ŭ śniežni minułaha hoda. Pravaachoŭnyja orhany aktyvizavali hetyja dziejańni. Tamu źjavilisia pytańni».
Łukašenka prapanavaŭ zadać Babaryku pytańnie, čamu jon pajšoŭ u prezidenty.
«Kali rylca ŭ pušku, nie leź tudy. Bo ciabie zmarduje sam narod. Čaho palez — bo zrazumieŭ, što da jaho pryjduć i nadzienuć kajdanki. A ŭ nas ža ciapier vyhadna zajmacca palitykaj, kab stać viaźniem sumleńnia. Voś čamu jon pajšoŭ tudy. Ale heta jamu nie dapamoža», — zajaviŭ kiraŭnik krainy.
Pavodle słovaŭ Łukašenki, zatrymana prykładna 15 čałaviek:
«Ale jon nie razumieje inšaha. Kali jaho saŭdzielnikaŭ adpravili na nary, jany ŭžo ŭčora ŭviečary ŭsie raspaviali. Za dźvie hadziny prynieśli $14 tysiač, potym jašče $600 tysiač abo $800 tysiač. Tam źlitki zołata, karciny, usio prynieśli adrazu, tolki nie čapajcie. Ź imi akuratna abyšlisia. Jany ŭsio raskazvajuć. Tamu jamu pryjdziecca heta ŭsio raspavieści».
«I ja chaču, kab jon trapiŭ na vybary. Kab jon pryjšoŭ i raskazaŭ, adkul ułasnaść na Kipry, jak pry takoj łukašenkaŭskaj dyktatury jon stvaryŭ hetuju ŭłasnaść, jak jon chabary davaŭ, dzialiŭ hrošy, čamu zamiežny bank hetym zajmaŭsia… Heta ŭsio treba raspavieści biełarusam. I jany niachaj potym vyznačacca. Ale viaźniem sumleńnia my jaho nie zrobim», — paabiacaŭ Łukašenka.
Jon zajaviŭ, što pa vynikach rasśledavańnia zaprosić Interpał i zamiežnych śpiecyjalistaŭ, kab jany praanalizavali dakumienty. «Buduć adkazvać pa zakonie. Treba — siaduć. Pierad zakonam usie roŭnyja», — zajaviŭ Łukašenka.
Jon dadaŭ, što paprasiŭ adnaho z členaŭ urada skazać Babaryku: «Usio, što skraŭ, viarni narodu. Moža być, sud heta ŭličyć».
A staršyni Dziaržkantrolu, maŭlaŭ, daručyŭ apublikavać infarmacyju pa kryminalnaj spravie, «kab nie dumali, što tut idzie niejki štučny nakat».
***
Nahadajem, što ŭčora, 11 červienia, u hałoŭny ofis Biełhazprambanka pryjšli supracoŭniki Departamienta finansavych rasśledavańniaŭ Kamiteta dziaržkantrolu dla ažyćciaŭleńnia pracesualnych dziejańniaŭ u dačynieńni da šerahu jurydyčnych i fizičnych asob, paviedamiła pres-słužba banka. Siłaviki praviarali bank da poźniaj nočy. Taksama pravierki pryjšli ŭ «Pryvatlizinh» i strachavuju kampaniju «Kientaŭr».
20 hod Biełhazprambank uznačalvaŭ Viktar Babaryka, jaki vyrašyŭ bałatavacca ŭ prezidenty. Paśla taho jak Babaryka zajaviŭ pra prezidenckija ambicyi, jon pakinuŭ pasadu staršyni praŭleńnia banka.
Kamientary