Siońnia ŭ Homielskim abłasnym sudzie adbyłosia pasiadžeńnie pa jašče adnoj apielacyjnaj skarzie Siarhieja Cichanoŭskaha, jakuju jon padaŭ jašče ŭ mai — kali paśla adnaho z administracyjnych pracesaŭ jamu dali čarhovyja 15 sutak aryštu za jaho strym u Miorach i Salihorsku. Siońnia Cichanoŭski — užo abvinavačany pa kryminalnaj spravie — znoŭ udzielničaŭ u pracesie pa videasuviazi ź SIZA, piša Tut.by.
19 maja sud Savieckaha rajona Homiela za mitynhi ŭ Miorach i Salihorsku asudziŭ błohiera na čarhovyja 15 sutak aryštu. Tady Siarhiej Cichanoŭski padaŭ apielacyjnuju skarhu ŭ sud vyšejšaj instancyi. Siońnia jaje razhladali ŭ Homielskim abłasnym sudzie.
Praces viali z dapamohaj videasuviazi. Z sudździoj Vasilom Biehunom i svaim abaroncam Aleham Jurčankam Cichanoŭski mieŭ znosiny ź SIZA №1 praź vielizarny manitor televizara. Ludzi, jakija sabralisia, prasili sud dazvolić maci Cichanoŭskaha paviarnuć manitor, kab jana zmahła pabačyć syna, ale sudździa nie dazvoliŭ.
U apielacyi Cichanoŭski skazaŭ, što nijakich supraćpraŭnych dziejańniaŭ nie ździajśniaŭ, a realizoŭvaŭ kanstytucyjnaje prava na svabodu praviadzieńnia masavych mierapryjemstvaŭ, što, na jaho dumku, sud niapravilna zrazumieŭ zakon i nie pryniaŭ da ŭvahi Kanstytucyju Biełarusi. I prasiŭ pastanovu suda Savieckaha rajona admianić.
Cichanoŭski akcentavaŭ, što Kanstytucyja i zakony ŭ krainie nie vykonvajucca, niama svabody słova, svabody schodaŭ, fabrykujucca kryminalnyja spravy.
Sudździa pierapyniŭ: «Prašu pa spravie, my nie zakranajem taho, što z vami adbyvajecca jašče. Davajcie pa hetaj spravie».
— Ja sudździ [suda Savieckaha rajona] tłumačyŭ, što intervju — heta nie mitynh i nie zbor hramadzian. Sapraŭdy hetak u čarzie ŭ kramie ludzi razmaŭlajuć. Ale tut navat čarhi nie było. Choć pa Kanstytucyi my možam źbiracca.
U svaim vystupie advakat Siarhieja Aleh Jurčanka taksama źviarnuŭ uvahu, što ŭ sudovaj pastanovie niapravilna interpretujucca padziei ŭ Miorach i Salihorsku.
— Sud pryvodzić paniaćcie «mitynh». U pracesie 19 maja byli prahledžany videa — nijakaha mitynhu tam nie było, było intervju. Čałaviek svaje dumki i «bolki» Siarhieju svabodna vykazvaŭ. Čamu sud paličyŭ, što heta źjaŭlajecca «sposabam zavualiravańnia» masavaha mierapryjemstva? Ludzi majuć prava svabodna pieramiaščacca, znachodzicca ŭ lubym miescy, stajać, havaryć i słuchać. Supracoŭnik milicyi vuń [na videa] z pakietam vychodziŭ z kramy — navat jon nie źviarnuŭ na hety tak zvany mitynh uvahi. Tym nie mienš sud ličyć, što Cichanoŭski pavinien byŭ atrymać śpiecyjalny dazvoł. Jaki dazvoł, kali mitynhu nie było?
Sud vynies rašeńnie: pakinuć apielacyju Cichanoŭskaha biez zadavalnieńnia.
Siabry i rodnyja pravodzili sudździu vykrykami «hańba!».
Kamientary