Błohieru Piatruchinu abmiežavali vyjezd za miažu i mahčymaść kiravać aŭtamabilem z-za nieapłačanych štrafaŭ
U sudzie Leninskaha rajona horada Bresta 11 červienia razhledžany pazoŭ adździeła prymusovaha spahnańnia hetaha rajona da Siarhieja Piatruchina. Sutnaść pazovu ŭ tym, što błohier maje nieapłačanyja štrafy ahułam amal na 20 tysiač rubloŭ, piša BAŽ.
U minułym hodzie Piatruchin čakaŭ sudovych vykanaŭcaŭ, jakija buduć apisvać majomaść.
U svaim pazovie adździeł prymusovaha spahnańnia prasiŭ sud zrabić nieabchodnyja zachady da Siarhieja Piatruchina padčas vykanańnia byłych sudovych rašeńniaŭ, pavodle jakich bresckaha błohiera pakarali bujnymi štrafami.
Cikava, što hetuju spravu sudzia Ała Vinahradava razhladała biez udzielnikaŭ pracesu: abodva baki byli prainfarmavanyja pra sudovaje pasiadžeńnie i prasili, kab jano adbyłosia bieź ich prysutnaści.
Z materyjałaŭ spravy vyśvietliłasia, što štrafy nie byli apłačanyja Siarhiejem Piatruchinym na praciahu amal dvuch hadoŭ. Pra heta raspavioŭ pravaabaronca Uładzimir Vialičkin, jaki prysutničaŭ na pracesie.
Błohier maje rachunki ŭ banku, ale na ich niama srodkaŭ. Akramia taho, u Siarhieja Piatruchina jość adnapakajovaja kvatera, majomaść u jakoj apisana. Adnak zabrać jaje supracoŭniki adździeła prymusovaha spahnańnia nibyta nie zmahli, bo nie majuć dostupu da pamiaškańnia.
Uładzimir Vialičkin ździŭleny vialikaj sumaj zapazyčanaści błohiera: na dumku pravaabaroncy, jana nasamreč na dźvie traciny mienšaja.
«Ja źviarnuŭsia da sudździ z pytańniem: adkul takaja vialikaja summa, bo nieadnarazova na ŭłasnyja vočy bačyŭ, jak Siarhiej Piatruchin pakazvaŭ kvitancyi ab apłacie štrafaŭ sudovym vykanaŭcam», — raspavioŭ Uładzimir Vialičkin.
U adkaz sudździa Ała Vinahradava patłumačyła, što mahčyma sudovyja vykanaŭcy nie ŭličyli ŭsie apłaty, bo nie majuć času prahladać ruch pastupleńnia hrošaj na rachunki.
U takich vypadkach, pa mierkavańni sudździ, Siarhieju Piatruchinu treba asabista prynosić kvitancyi da vykanaŭcaŭ, kab jany viedali pra zroblenyja apłaty i paznačali ŭ dakumientach.
U vyniku sud paličyŭ, što jość usie padstavy z-za niavypłaty štrafaŭ abmiežavać Siarhieju Piatruchinu vyjezd za miežy Biełarusi, a taksama kiravańnie aŭtamabilem (bo błohier maje paśviedčańnie kiroŭcy) da momantu apłaty štrafaŭ, adnak nie paźniej za 2025 hod. Kali ž Siarhiej Piatruchin nie likviduje zapazyčanaść pa štrafach, da jaho buduć prymienienyja bolš žorstkija sankcyi.
Kamientary